އެތައް ހާސް ބަޔަކު ޝަހީދުވެ މިލިއަނެއްހާ މީހުންގެ ގެދޮރު ގެއްލި، އެތައް ކުދިންނެއް ޔަތީމްވެ، އަންހެނުން ހުވަފަތްވެ، މައިންނާއި ދަރިން ގެއްލި، އެތައް ބައެއްގެ ހަޔާތް އަނދިރިވެގެންދާތާ މިަފަހަކުން އަހަރެއް ވީއެވެ. ނަމަވެސް މި ކަމަކީ އަހަރުތަކަކަށް ދިގު ލައިގެން ގޮސްފައިވާ ހިތްދަތި ކަމެކެވެ.

އާދޭހެވެ. އަޅުގަޑު މި އިޝާރާތްކުރަނީ ފަލަސްތީނުގައި ސަހްޔޫނީންގެ ނިރުބަވެރިން ހިންގަމުން ދާ ގަތުލު އާންމުގެ ވާހަކައެވެ.

ނަސްލެއް ނައްތާލުމުގެ ނިޔަތުގައި ނިރުބަވެރިންގެ ކަނޑި ބަޑީގެ ޝިކާރައަކަށް މައުސޫމު ތުއްތު ކުދިންނާ އަންހެނުންނަށް އަދި އުމުރުން ދުވަސްވީ މީހުން ވަމުންދަނީއެވެ. ސަހްޔޫނީން ބުނަނީ އެމީހުންގެ މައްސަލައެއް ނޫން ކަމަށެވެ. އެމީހުން ހަމާސްއަށް އަމާޒުކުރާ ހަމަލާތަކުގައި އާންމުން ޝަހީދުވަނީ ހަމާސްއިން އަމާޒުފަތްގަނޑަކަސް އާންމުން ހަދާތީ ކަމަށެވެ. ނަމަވެސް ހަގީގަތަކީ ސަހްޔޫނީން ގަސްތުގައި އާންމުން ދިރިއުޅޭ ތަންތަނަށާ ހޮސްޕިޓަލުތަކަށް އަމާޒުކޮސް ހަމަލާ ދެނީ ތުއްތު ކުދިން މަރުވުމުން ފަލަސްތީނުގެ މުސްތަގުބަލު މަރާލެވޭނެތީއެވެ.

ކަންމިހެން ހުރިއިރު އިސްލާމީ އުއްމަތްތަކުން މިކަން ނިކަން ވަޅޯކޮށް ނަގާ ވާހަަކައަކީ އަބަދުވެސް އިވޭ އަޑެކެވެ. ދިވެހިރާއްޖެއަކީ ނަމަވެސް ޒަމާނުއްސުރެެވެސް ފަަލަސްތީނުގެ މައްސަލައިގައި ގައުމުގައި އަޑު އުފުލާ އެ ރައްޔިތުންނަށް ނަސްރު ދިނުމަށް އެދި ދުއާކޮށް ހަދާ ބައެކެވެ. ދިވެހީންގެ އެހީއަކި މެދު ނުކެނޑި ފަަލސްތީނުގެ ރައްޔިތުންނަށް ޒަމާނުއްސުރެ ލިބެމުންދާ އެހީއެކެވެ.

އެއާއެކު ދިވެހި ރައްޔިތުން އެދޭ އެހެން އެދުމެއް އޮވެއެވެ. އެއީ ރަހުމެއް ނެތި މުސްލިމުން މަރާ ގަތުލުކޮށް ނަސް ހޭދަ ކުރަމުންދާ އެ ޝަހިދުންގެ ލެއިން އަތްތައް ފޯވެފައިވާ ނިރުބަވެރި ސަހްޔޫނީން ރާއްޖެ އެތެރެ ކުރުމެވެ. އެކަމަށް މަގުފަހި ކުރަން ސަހްޔޫނީންގެ ޕާސްޕޯޓު ރާއްޖެއިން މަނާ ކުރުމަކީ ނިމިދިޔަ ސަރުކާރުން ފެށިގެން ވެސް ދިވެހިން ގޮވަމުންދާ ގޮވުމެކެވެ. ނަމަވެސް އަދިވެސް އެކަން މިއޮތީ ނުވެއެވެ.

ދިވެހި ސަރުކާރު އަބަދުވެސް ދެމި އޮންނާނީ ފަލަސްތީނު ރައްޔިތުންނާ އެކު ކަމަށް ބުނާ ބުނުން އަމަލު ނުފެނެއެވެ. އެއް ފަހަރު ސަހްޔޫނީންގެ ޕާސްޕޯޓު މަނާކޮށްފި ކަމަށް ބުނެ ރައީސް މުހައްމަދު މުއިއްޒުއާ ސަރުކާރުން މެޑަލްވެސް ޖެހިއެވެ.

ނަމަވެސް އެއީ ވެސް ދެއްކި ނަނާ ހުވަފެނެއްކަން ހާމަވިއެވެ. ސަހްޔޫނީންެ ޕާސްޕޯޓު މަނާ ކުރާނީ އަހަރުމެން ކަމަށް ބުނެ ފޮނި ކަނޑަމުންދާއިރު ހެޔޮ ނިޔަތުގައި އެކަން ކުރަން ކެރޭތޯ މިއީ ގިނަ ބަޔަކު އުފައްދާ ސުވާލެކެވެ. އެމެރިާއާއެކު އެންމެ ގާތް ގުޅުމެއް ބާއްވަން ފެށި ސަރުކާރަކަށް މި ސަރުކާރުވާއިރު އެމެރިކާއާ ދެކޮޅަށް އެކަން ކުރަން ރައީސް މުއިއްޒަށް ކެރިދާނެތޯ ސުވާލު އުފެދެއެވެ.

ޣައްޒާގައި ހިންގަމުން އަންނަި ގަތުލު އާންމެއް ކަަމަށް މީގެ ކުރީ ހުރިހާ ދިވެހި ސަރުކާރުތަކުގައި ބުނި ނަމަވެސް މިސަރުކާރުން ވަނީ އެ ބުނުން ވެސް ހުއްޓުވާފައެވެ.

މަޖިލީހުގައި ބިލު ޕާކުކޮށްފައި އޮންނަތާ 200 އެތައް ދުވަހެއް ވެއްޖެއެވެ. ސަރުކާރުގެ މެޖޯރިޓީ އޮވެމެ އެ ބިލުަގއި އަތްނުލައެވެ. މަޖިލީހުގެ ފުރަތަމަ ދައުރު ނިމި ޗުއްޓީއަށް ދިޔުމުން ސަހްޔޫނީންގެ ޕާސްޕޯޓް މަނާ ނުކުރެވުނީ ކަމަށް ވިދާޅުވެ ރައީސް އޮފީހުގެ އިސް ތަރުޖަމާނު ހީނާ ވަލީދު ބަހަނާ ދެއްކެވިއިރު ދައުރުން ދެ ޖަލްސާ ބާއްވާ ސަރުކާރުން ބޭނުންވާ ކަންކަން އޭރުވެސް ނިންމިއެވެ. އަދި އޭގެ ފަހުން މިހާރުވެސް ހަތް ޖަލްސާއެއް މި ދައުރުގައިވެސް ބޭއްވިއްޖެއެވެ. ސަހްޔޫނީންގެ ޕާސްޕޯޓުގެ ވާހަކައެއް ނެތެވެ. ސަހްޔޫނީންގެ ޕާސްޕޯޓް މަނާނުކޮށް ލަސްވާތީ، އެމްޑީޕީގެ ފަރާތުން މަޖިލީހަށް ހުށަހެޅި ކުއްލި މައްސަލަ ވެސް ބޭރުކޮށްލީއެވެ.

ފަލަސްތީނުގެ ހައްގުގައި ތިބި ކަމަށް ބުނާއިރު ސަރުކާރުން، ސަހްޔޫނީންގެ ޕާސްޕޯޓް މަނާ ނުކޮށް ބަހަނާއަކަށްފަހު ބަހަނާއެއް ދައްކަމުން ދަނި ކީއްވެބާއެވެ؟