ދިވެހީން ގޮވައިގެން ދިވެހީންގެރާއްޖެއަަކަށް މިސްރާބް ބެހެއްޓި ސަރުކާރުގެ ވެރިކަމުގައި ދިވެހިންނަށް ދިވެހީންގެރާއްޖެއަށް ދެވިއްޖެބާއޭ މިއީ އުފެދޭ ސުވާލެކެވެ. ނަމެއްގައި ކަންކަން ބަޔަކު ކޮށް ނިންމާފައި ދެން ކިޔާ އަޑު އިވެނީ ދިވެހީންގެރާއްޖެ އަށް ދެވިއްޖެއެވެ.

ނިމިދިޔަ ރިޔާސީ އިންތިޚާބްގެ ކެމްޕެއިން ދުވަސްވަރު "ދިވެހީންގެރާއްޖެ" މި ޝިއާރު ބޭނުންކޮށްގެން ވެރިކަން ހާސިލްކޮށްފައިވެއެވެ. މި ޝިއާރަކީ ރައީސް އަބްދުﷲ ޔާމީން އަބްދުލްގައްޔޫމްގެ ޝިއާރެއްކަމާ އެ ޝިއާރުގެ މައިގަނޑު މަގްސަދު ބަޔަކު މިއަދު ހަނދާން ނެތިއްޖެއެވެ. ވާނީވެސް އެހެންތާއެވެ. ބޮޑު ގޮނޑި ފެނުމުން ހުރިހާ އެންމެނަށް ވެސް އެހެން ކަން ކުރަން މަޖުބޫރުވީއެވެ.

ދިވެހީންގެރާއްޖޭގައި މަތިބަރު ސަރުކާރެއް ނޯންނާނެ ކަމަށް ބަޔަކު މީހުން ކޫ ކޫ ލައްވަމުން ވިދާޅުވި ވާހަކައެވެ. މިއަދު މިއޮތީ ނަމެއްގައި ދިވެހީންގެރާއްޖެއެކެވެ. މަތި ބަރޭ ބުންޏަސް މަތިބަރު ސަރުކާރެކެވެ. ޑެޕިޔުޓީން އައްޔަންކޮށްކޮށް މަތި ވަރަކަށް ބަރުކޮށްފިއެވެ. އެމީހުންނަށް ކޮންމެ މަހަކު ދޭ މުސާރަަ އަކީ ރައްޔިތުންގެ ޓެކްސް ފައިސާ ކަމެއް ނޭނގެނީތާއެވެ. އޭރުގައި ބަޔަކު ކުރީ ސަރުކާރަށް ޖޯކު ޖެހިއެވެ. ވެރިކަމަށް ރަނގަަޅަށް ހަފްތާއެއް ނުވަނީހެން ފެނުނީ ޖެހުނު މީހަކު ޑެޕިޔުޓީ މިނިސްޓަރުންނަށް އައްޔަންކުރެއްވި މަންޒަރެެވެ. މިހާރު މިއުޅެނީ "ރިގެރެޓް" ކުރެވިގެންނެވެ. މިހާރު އެމީހުން ވަކިކޮށްފައި، ދައުލަތުން ހޭދަވާ 5 މިލިއަން ރުފިޔާ ސަލާމަތް ކުރަން ވިދާޅުވި ވެރިޔާއަށް އެއީ މިއަދު އެއްވެސް ބަޔަކަށް ނުވިއެވެ. އޭރު ދެން ވަޒީފާތައް ބަހާލީ އެހެންވީމާ މަޖިލިސް އިންތިޚާބަށްތާއެވެ.

އާދެ، ދެން ދިވެހީންގެރާއްޖޭގައި ނުވާނެކަމަށް ބުނިކަމަކަމަށް އަލިއަޅުވާލާއިރު،13 ފެބްރުއަރީ 2024 ގައި ދުބާއީގައި ބޭއްވި އިންވެސްޓް މޯލްޑިވްސްގެ ހަވާސާގައި ނޫސްވެރިންނާ ވާހަކަ ދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ "ކުރިއަށް އޮތް ދެތިން ހަތަރު މަހެއްގެ ތެރޭގައި ޑޮލަރު ސިޓިއުޝަން ހަމައަކަށް އެޅިގެންދާނެ" ކަމަށެވެފެބްރުއަރީ، މާޗް، އޭޕްރިލް، މެއި، ޖޫން، ޖުލައި، އޮގަސްޓް ، ސެޕްޓެމްބަރު ނިމި އޮކްޓޯބަރު މަސް ވެސް ނިމުމަކާ ހަމަޔަށް އަތުވެއްޖެއެވެ. އަޅުގަނޑު ނޫނަސް ރާއްޖޭގެ ގިނަ ބަޔަކު އަދިވެސް އިންތިޒާރު ކުރަމުން އެ ދަނީ ޑޮލަރު ބޭންކު ރޭޓްގައި ގަންނަން ލިބޭނެ ދުވަހަކަށެވެ.ވާނީވެސް އެހެންތާއެވެ. މި ސަރުކާރުގެ އިކޮނޮމިކް މިނިސްޓާރ މުހައްމަދު ސައީދު އިންޓަވިޔުގައި އެފަދައިން "ދެތިން މަހޭ" ވިދާޅުވީމާ ރައްޔިތުންގެ އުންމީދު އައު ނުވާނެ ގޮތެއް ނޯންނާނެތާއެވެ. ނަމަވެސް ކުރާނެ ކަމެއްނެތެވެ.ޑޮލަރުގެ އަގު ވަނީ ދުވަހުން ދުވަހަށް ކަޅު ބާޒާރުގައި ބޮޑެވެ. 17 ރުފިޔާ އިން 18 ރުފިޔާ އަށް ޖަމްޕު ޖަހައި މިހާރު ޑޮލަރެއްގެ އަގު ކަޅު ބާޒާރުގައި ހުރީ 19 ރުފިޔާއަށެވެ. ހެޔޮ ވާނެ ކަމަށް މިނިސްޓާރ ސައީދު ވިދާޅުވި ޑޮލަރުގެ އަގެއް ހެޔޮވާ މަންޒަރެއް ނުފެނެއެވެ.

ނިމިދިޔަ ސަރުކާރެކޭ އެއްފަދައިިން މި ސަރުކާރުން މަސްވެރިންނަށް އިހުމާލުވަމުންދާ ވާހަކަ އަކީ އެއްވެސް ވަރަކަށް އައު ވާހަކައަކަށް ނުވާނެއެވެ. ރައީސް ޑރ މުހައްމަދު މުއިއްޒުގެ ސަރުކާރަކީ މަސްވެރިންނަށް ފާގަތި ދުވަސްތަކެއް މިންވަރުކޮށްދިނުމުގެ ވައުދާއެކު އައި ސަރުކާރެއް ކަމީ އެއްވެސް ޝައްކެއް އޮތް ކަމެއް ނޫނެވެ. ރިޔާސީ އިންތިޚާބްގެ ކެމްޕެއިން ދުވަސްވަރު ބޮޑެތި ވައުދުތައް ވަމުން ގެންދެވި އިރު ފާހަގަކޮށްލެވޭގޮތުގައި އެންމެ ބޮޑެތި އަދި އެންމެ ގިނަ ވައުދުތައް ވެފައިވެސް ވަނީ މަސްވެރިންނަށެވެ. މަސް ގަންނަ އަގު ބޮޑު ކުރާނެކަމަށް ވިދާޅުވެ މަހުގެ އަގު ވެސް ކުޑަކޮށް 14 ރުފިޔާއަށް ހެދިއެވެ. ނުވީތާކަަށް މަސްވެރިން ކިރާ މަހަށް 48 ގަޑި އިރު ތެރޭ ފައިސާދޭނެކަމަށް ވައުދުވެ ވައުދާ ހިލާފްވުމުން މަސްވެރިންވެސް ދިވެހީންގެރާއްޖެ މަތިން ފޫހިވެއްޖެއެވެ. ހަގީގަތުގައި ފޫހިވީ މަސްވެރިކަމާ ބެހޭ ވަޒީރާ ރައީސް މުއިއްޒުގެ މަތިންނެވެ. ވާނީވެސް އެހެންތާއެވެ. މީގެ ކުރިން މަޖިލީހުގައި އަޑު ގަދަކޮށްފޭ "މަސްވެރިންނަށް ފައިސާ ނުދީ ޗަ ހަދަނީ ކޯއްޗެއް؟" ހޭ ވިދާޅުވި ބޭފުޅާ މަސްވެރި ވަޒީރަކަށް ހުންނަވޭ "މި ހަދަނީ ކޯއްޗެހޭ" މިއަދު މަސްވެރިން އެބަ ސުވާލުކުރެއެވެ.ކަނޑަށް ނުކުންނަން އޮޑިއަށް އަޅާނެ ތެޔޮ ގަންނާނެ މިންވަރުވެސް މިއަދު ގިނަ އޮޑިތަކުގައި ނެތެވެ.

މި ސަރުކާރަކީ ރައްޔިތުން އަތުން ނަގާ ޓެކްސް ބޮޑުކޮށްގެން ދައުލަތުގެ އާމްދަނީ އިތުރުކުރުމުގެ ވިސްނުން ނުގެންގުޅޭނެކަމުގެ ވައުދާ އެކު އައި ސަރުކާރެކެވެ. ނަމަވެސް ވައުދާއި ޚިލާފަށް މި އަހަރުގެ ޑިސެމްބަރު މަހުން ފެށިގެން ޓެކްސްތައް ބޮޑުކުރުމަށް ސަރުކާރުން ނިންމުމާއެކު ދެން ދޭހަވެގެންދިޔައީ އަނެއްކާވެސް މިއީ ހުދުމުހުތާރު ވެރިކަމެއް ކުރާ ބައެއްކަމެވެ.ސިޔާސީ މަގާމުތައް ދައުލަތުގެ ޚަރަދަށް ނުބައްދަލު މިންވަރަށް އިތުރުވެ މުސާރަ ދޭނެ ގޮތެއް ނެތުމުން ރައްޔިތުން އަތުން ނަގާ ޓެކްސް ބޮޑުކުރަން ނިންމާލީއެވެ. ރައްޔިތުން ރުޅިގަދަ ނުވެއްޖާ ދެރައެވެ.

ކުޑަކުރަން ބުނި ސަރުކާރު ވީ ބޮޑު، ބޮޑުކުރަން ބުނި މުސާރަ ވީ ކުޑަ،ކުޑަ ކުރަން ބުނި ޑޮލަރު ރޭޓް ވީ ބޮޑު،ބޮޑު ކުރަން ބުނި މަހުގެ އަގު ވީ ކުޑަ، ބޮޑު ނުކުރަން ބުނި ޓެކްސް ވީ ބޮޑު، މީތޯ ދިވެހީންގެ ރާއްޖެ އަކީ؟