2023 ވަނަ އަހަރު ބޭއްވުނު ރިޔާސީ އިންތިޚާބުގެ ދުވަސްވަރު މިހާރުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ދައްކަވަމުން ގެންދެވި އެންމެ ބޮޑު އެއް ވާހަކައަކީ ޑޮލަރުގެ މައްސަލަ ހައްލުކޮށް ޑޮލަރު ކަޅު ބާޒާރުގައި ލިބޭ ރޭޓް ކުޑަކޮށްދެއްވާނެ ވާހަކައެވެ.

ވެރިކަން ލިބުމަށްފަހު ރައީސް މުއިއްޒު ވިދާޅުވަމުން ގެންދެވީ ޑޮލަރުގެ އަގު މައްޗަށް ނާރާނެ ވާހަކައާއި ދިވެހި ފައިސާގެ އަގު މައްޗަށް ދާ ވާހަކައެވެ.

ނަމަވެސް ހަގީގަތަކީ ޑޮލަރުގެ މައްސަލަ އޮތީ އެހެން މައްސަލަތަކެކޭ އެއްގޮތަށް ހައްލުކުރެވޭ ވަރަށް ވުރެ ގޯހުން ގޯހަށް ގޮސްފައިކަމެވެ. ރައީސް އިބްރާހީމް މުހައްމަދު ސޯލިހްގެ ވެރިކަމުގައި ޑޮލަރު ގަންނަން ލިބޭ އަގު ބޮޑުވެގެން އެކަމަށް އެންމެ ފާޑުކިޔަމުން އައި މީހުންގެ ޒައާމަތުގައި ކަޅު ބާޒާރުގައި ޑޮލަރު ގަންނަ ރޭޓް މިއަދު މިވަނީ 19ރ އަށް ޖެހިފައެވެ. އަހަރެއްހާ ދުވަސް ކުރިން 17ރ އާއި 18ރ ދެމެދު ގަންނަން ލިބުނު ޑޮލަރު މިހާރު މިވަނީ 19.50ރ އާއި  19.70 އަށް މައްޗަށް ޖެހިފައެވެ.

ބޮޑެތި މެނިފެސްޓޯތަކުން ދިވެހި ރައްޔިތުން ގުނބޯ ހައްދާ، ޑޮލަރުގެ މައްސަލަ ހައްލުކޮށްދެއްވާނެ ކަމުގެ ދުރު ރާސްތާ ޕްލޭން ވިއްކައިގެން ވެރިކަމަށް ވަޑައިގެން އަހަރެއް ވެގެން ދާއިރު މިފަދަ އެއްވެސް މައްސަލައަކަށް އަމަލީ ސިފައެއް ނުޖެހި ރައްޔިތުން އަދިވެސް ތިބެން މިޖެހެނީ ވާނުވާގަނޑެއްގެ ތެރޭގައެވެ.

ކަޅު ބާޒާރުގައި ޑޮލަރުގެ ރޭޓް ހިފަހައްޓަން ރައީސް މުއިއްޒު އޭރު ވިދާޅުވަމުން ގެންދެވީ ފަތުރުވެރިކަމުގެ ދާއިރާއިން ރާއްޖެއަށް ވަންނަ ފައިސާ ވަކި މުއްދަތެއް ވަންދެން ރާއްޖޭގައި ބަހައްޓަން މަޖުބޫރު ކުރުމެވެ. ނަމަވެސް މިހާތަނަށްވެސް މިކަން ކުރިއަށް ގެންދާނެ ގޮތެއް ހާމަކޮށްފައިނުވެއެވެ. ދައުލަތުގެ ޚަރަދުން ބޮޑެތި ހޭދަތައް ކުރައްވާ، ގައުމު ވެއްޓާލާފައިވާ އިގްތިސާދީ ހީނަރުކަމުން އަރައިގަތުމަށް އެހީ ހޯދުމުގެ ނަމުގައި ސަލާން ޖެހުން ނޫން ކަމެއް ކުރައްވާ ތަނެއް ނުފެނެއެވެ.

ޑޮލަރުގެ މައްސަލައަށް ހައްލު ހޯއްދެވުމަށް ރައީސް އިތުރަށް ދެން ދެއްކެވި ވާހަކައަކީ ރާއްޖޭގެ ޔޫޒަބަލް ރިޒާވް އިތުރު ކުރުމެވެ. 500 މިލިއަން ޑޮލަރު ރިޒާވްގައި ބަހައްޓަން އަމާޒު ހިފާ މިކަން ހާސިލުކުރާނެ ގޮތުގެ އެކްޝަން ޕްލޭންވެސް ރިޔާސީ އިންތިޚާބުގެ ތެރޭގައި ތަފްސީލްކޮށްދެއްވި އިރު މިކަމަށްވެސް މިހާތަނަށް މަސައްކަތް ކޮށްފައިނުވެއެވެ. އޭރު ދެއްކެވި ވާހަކަތައް ގިނަ ކަމުން ހަނދާންނެތުނީ ކަމަށްވެސް ވެދާނެއެވެ. ނޫނީ މި ސަރުކާރަށް މަސައްކަތުގެ "އެންޑް ޕްރޮޑަކްޓް" ނެރެމުގެ ގާބިލުކަމެއް ނެތީ ކަމަށްވެސް ވެދާނެއެވެ.

މި ވެރިކަމުގައި ވުޒާރާތަކާއި ކުންފުނިތަކަށް އަދި އެ ނޫންވެސް މަގާމުތަކަށް އައްޔަނު ކުރައްވާނީ އެކަމަކަށް ގާބިލު އަދި ކިޔަވައިގެން ތިއްބެވި ފަރާތްތައް ކަމަށް ރައީސް މުއިއްޒު ވިދާޅުވުމުން ދިވެހި ރައްޔިތުން ހީފުޅުކޮށްގެން ތިއްބެވީ ކުރިއަށް އޮތް 05 އަހަރު ވެގެން ދާނީ ދިވެހިން ދުވަހަކުވެސް ތަޖުރިބާ ނުކުރާފަދަ ވެރިކަމެއްގެ ގޮތުގައި ކަމަށެވެ. ކަންވީވެސް ހަމަ އެހެންނެވެ. ދިވެހިން ދުވަހަކުވެސް ނުދެކޭ، އިހުސާސް ނުކުރާ ނިކަމެތިކަމެއް ރައްޔިތުންނަށް މި ނޫނީ ލިބިފައިނުވެއެވެ.

ގައުމަށް ޖެހިފައިމިވާ ޑޮލަރުގެ މައްސަލަ ހައްލުކޮށްދެއްވާނެ ކަމަށް އިކޮނޮމިކް މިނިސްޓަރ މުހައްމަދު ސައީދުވެސް ޔަގީންކަން ދެއްވިތާ 06 ވަރަކަށް މަސްވެގެން ދިޔައިރު އޭރު އޮތް ހާލަތަށްވުރެ ވެސް މިހާރު ޑޮލަރުގެ ހާލަތު ގޯސްވެއްޖެ އެވެ. އަދި ޑޮލަރުގެ މައްސަލަ ރަނގަޅުވާނެކަމުގެ އަލިމަގެއް ފެނުމާއި މެދުވެސް ޝައްކެވެ.

ރާއްޖޭގައި ރަސްމީ ބޭންކު ރޭޓުގައި ޑޮލަރުގެ އަގު ހުންނަނީ 15.42 ރުފިޔާގައެވެ. ނަމަވެސް ވިޔަފާރި ބޭންކުތަކުން ދުވާލަކަށް ޑޮލަރު ވިއްކާ އަދަދަށް ލިމިޓްކަނޑައަޅާފައިވެއެވެ.

އިގްތިސާދީ ބޮޑު ކާރިސާއެއް ގައުމަށް ކުރިމަތިވެފައިވާއިރު މިކަން ސީރިއަސްކަމާއި އެކު، ސިއްރުނުކޮށް ރައްޔިތުންނަށް ހާމަކުރުމަކީ ދިވެހި ކޮންމެ ރައްޔިތަކަށް ސަރުކާރުން އަދާކުރަންޖެހޭ ހައްގެކެވެ. ޕްލޭން އެއް އޮތް ކަމަށް ހަމައެކަނި ވިދާޅުވުމުން އަދި ފުދުނީއެއް ނޫނެވެ. އެކަމުގެ އަމަލީ ސިފަވެސް ފެންނަން އެބަޖެހެއެވެ.