އާމްދަނީ އިތުރު ކުރުމުގެ ފިޔަވަޅިތަކުން 4.9 ބިލިއަން ރުފިޔާ ދައުލަތަށް ލިބޭނެ ކަމަށް އަންނަ އަހަރަށް ލަފާކޮށް މަޖިލީހަށް ހުށަހެޅި ބަޖެޓުގައި އަންދާޒާ ކޮށްފި އެވެ.
ފިނޭންސް މިނިސްޓަރު މޫސާ ޒަމީރު މިއަދު މަޖިލީހަށް ހުށަހެޅުއްވި ބަޖެޓުގައި އަންދާޒާ ކޮށްފައިވާ ގޮތުން މިއަންނަ އަހަރު ދައުލަތަށް އެންމެ ބޮޑު އާމްދަނީއެއް ލިބޭނެ ކަމަށް ލަފާކޮށްފައި ވަނީ އެއާޕޯޓު ޓެކުހާއި ފީތަކުންނެވެ.
ދެވަނައަށް އެންމެ ބޮޑު އާމްދަނީއެއް އިމްޕޯޓު ޑިއުޓީން ލިބޭނެ ކަމަށް ލަފާ ކޮށްފައިވާއިރު، ތިންވަނައަށް އެންމެ ގިނަ އާމްދަނީ ލިބޭނެ ކަމަށް ލަފާ ކޮށްފައި ވަނީ ގްރީން ޓެކުހުންނެވެ.
އަންނަ އަހަރަށް ލަފާކޮށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ. އެއީ މި އަހަރުގެ ސަޕްލިމެންޓާ ލައިގެން ބަޖެޓު ކުރި 54.9 ބިލިއަން ރުފިޔާއަށް ވުރެ 1.7 ބިލިއަން ރުފިޔާ އިތުރު އަދަދެކެވެ.
މި ސަރުކާރު ވެރިކަމަށް އައީ ރައްޔިތުންގެ އަތުން ނަގާ ޓެކްސް ބޮޑު ނުކުރާނެކަމުގެ ވައުދާއެކުގައެވެ. އެހެންނަމަވެސް ފެނިގެންދަނީ މުޅިންވެސް ވައުދާ ހިލާފްވެ ސަރުކާރުން ކުރާ އިސްރާފަށް ފައިސާ ހޯދަން ރައްޔިތުން ފެލަމުން ގެންދާ މަންޒަރެވެ.
