ބުރިޖު ހައިވޭގައި ހުރި ސޯލާ ޕެނަލްތަކުގައި ކާރަކުން ޖެހި ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުން މައުލޫމާތު ދީފައިވާ ގޮތުގައި މި އެކްސިޑެންޓް ހިނގާފައިވާ ކަމުގެ ރިޕޯޓް ފުލުހުންނަށް ލިބިފައިވަނީ މެންދުރު 12:31 އެހާކަންހާއިރު ކަމަށެވެ.
މި ހާދިސާގައި އެއްވެސް މީހަކަށް އަނިޔާއެއްވެފައި ނުވިނަމަވެސް، ކާރާއި ސޯލާ ޕެނަލްތަކަށް އެކި ވަރުގެ ބޮޑެތި ގެއްލުންތަކެއް ވެފައިވާކަމަށް ފުލުހުން ވަނީ މައުލޫމާތުދެއްވާފައެވެ.
އިތުރަށް ފުލުހުން ވަނީ މި މައްސަލަ ތަހުގީގުކުރަމުންދާކަމަށްވެސް ފާހަގަކުރައްވާފައެވެ.
މީގެ ކުރިން ވެސް އާންމު ރައްޔިތުން ވަނީ ހައިވޭގައި ސޯލާ ޕެނަލް ހަރުކުރުމާއި ދެކޮޅަށް ވާހަކަ ދައްވާފައެވެ.
އެހެން ނަމަވެސް ކުރީގެ ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހުގެ ވެރިކަމުގައި އެމަނިކުފާނު ވަނީ ސޯލާ ޕެނަލްތައް އެތައް ނުރުހުމަކާއި ކުރިމަތި ލުމަށްފަހު ވެސް ހައިވޭގައި ހަރުކޮށްފައެވެ.
މިއަދު ހިނގައިދިޔަ މި އެކްސިޑެންޓާއި ގުޅުވައި ގިނަ ބަޔަކު ދަނީ އެއީ ރައީސް އިބުރާހިމްގެ ހަމަ ނުޖެހޭ މަޝްރޫއުތަކުގެ ސަބަބުން ސޯލާ ޕެނަލްތަކަށްވެފައިވާ ގެއްލުމެއް ކަމަށް ތުހުމަތުކޮށްފައެވެ.
އަދި ބުނަމުންދަނީ އެތައް ރުފިޔާއެއްގެ މުދާ ބޭކާރު ގޮތުގައި ހަލާކުވީކަމަށެވެ.
