ގައުމަށް ހެޔޮ ބަދަލެއް ގެންނަން ބޭނުންވާނަމަ އެކަން ކުރަން އިޚްލާސަތްރި ސާފު ނިޔަތެއް އޮންނަން ޖެހޭނެއެވެ. އެހެންނޫންތޯއެވެ. ފާއިތުވި ސަރުކާރުތަކުން ގައުމަށް ޚިޔާނާތްރެރިވެފައިވާ ކަމަށް ތުހުމަތުކޮށް ވާހަކަ ދައްކާ " ދިވެހީންގެ ރާއްޖެ" އެއްގެ ދަޅަ ދިވެހިންނަށް ދައްކާ މި ސަރުކާރުން ވަނީ ރައްޔިތުންނަށް ހެޔޮ ބަދަލުތަކެއް ގެނެސްދެއްވާނެ ކަމަށް ވައުދުވެވަޑައިގެންފައެވެ.

ރައީސް މުއިއްޒު ރައްޔިތުންނަށް ދެއްކެވި ގައުމިއްޔުތަކަން ފެނި، އެމުނުވި ފަށުއި ބަސްތަކަށް ގިނަ ދިވެހިން ހެއްލި ވޯޓު ދިނީ އެބުނާ ހެޔޮ ބަދަލެއްގެ އުއްމީދުގައެވެ. ނަމަވެސް ހުވާ ކުރެއްވިތާ މަދު ވަގުތުކޮޅެއްގެ ތެރޭ މުއިއްޒުގެ އަސްލު ސޫރަ ވަނީ ފެނިގެން ގޮސްފައެވެ.

މުއިއްޒު މިއަދު އެ ހުންނެވި ހިސާބަށް ގެނެސްދެއްވުމުގެ އެންމެ ބޮޑު މޭސްތިރިއަކީ ރައީސް އަބްދުﷲ ޔާމީން އަބްދުލްގައްޔޫމް އަށް ވީ ހިނދު އެމަނިކުފާނުގެ ނަން ބޭނުންކޮށްގެން ރިޔާސީ ޓިކެޓް ހޯއްދަވާ، އެމަނިކުފާނުގެ ފޮޓޯ އާއި އެމަނިކުފާނުގެ ވިސްނުންފުޅު ވިއްކައިގެން ވެރިކަމަށް ވަޑައިގެން ރައީސް ޔާމީނާއި ދޭތެރޭ މުއިއްޒުއާއި ޕީއެންސީގެ އިސް ސަފުގައި ހަރަކާތްތެރިވަމުންދާ މީހުން ކަންތައްކުރެއްވި ގޮތެއް މި ގައުމު ދުވަހަކުވެސް ހަނދާން ނުނެތޭނެއެވެ.

ގައުމު އޮތީ ދަރަނިވެރިވެފައި ކަމަށް ބުނެ ގައުމު އޮތް އިގްތިސާދީ ހާލަތުން އަރައިގަނެ އާރާސްތުކޮށްދެއްވާނެ ކަމަށް ވިދާޅުވެ ވެރިކަމަށް އަހަރެއް ވެގެން ދާއިރު ފެނިގެން ދިޔައީ ނުކަތާ ވަރަށް ސިޔާސީ މަގާމުތައް އުފައްދާ އެމީހުންގެ މުސާރައަށް ކުރާ ހޭދަ 600 މިލިއަން ވަރު ބޮޑުކޮށްލި މަންޒަރެވެ. ކުރިން ނުދައްކާ ލޯނެއް ދައްކަން ކަމަށް ބުނެ ބޭންކް އޮފް މޯލްޑިވްސް އިން އެމްއޭސީއެލް އަށް ލޯނެއް ނަގައި 50 މިލިއަން އިންޑިއާއަށް ދައްކާ ގައުމުގެ މިނިވަންކަމާއި ސިޔާދަތު ވެއްޔާ މޮޑެލައިފިއެވެ.

30 މިލިއަން ޑޮލަރު ޑްރޯން ގަންނަން ޚަރަދުކުރި އިރު މިއަދާ ޖެހެންދެންވެސް އެ ދުއްވާނެ ދިވެއްސެއް ތަމްރީނު ކުރެވުނު ކަމަކަށް ނުވިއެވެ.

ސަރުކާރުގެ ނާގާބިލުކަމުން މިއަދު އޭގެ އަގު އަދާކުރަން މިޖެހުނީ އެއްކަލަ ނިކަމެތި ރައްޔިތުމީހާއެވެ.ދިވެހިންގެ ރާއްޖޭގައި ދިވެހިން ނިކަމެތިވެ މިއަދި މިވަނީ ހިތި ބޭސް ބޯން ޖެހިފައެވެ.

މީގެ އިތުރުން، ސަރުކާރުގެ ފުލް ކޮންޓްރޯލް އޮތް ބޭންކަކަށް ސަރުކާރާއި ދެކޮޅަށް ބަޣާވާތް ކުރި ކަމުގެ ތުހުމަތުގައި ބޭންކް ނުރައްކަލެއްގެ ތެރެއަށް ވައްޓާލާ ބައިނަލްއަގްވާމީ ގޮތުން ރާއްޖޭގެ ނަން މިވަނީ ކިލަނބުވެފައެވެ.

ޚިޔާލު ފާޅުކުރުމުގެ މިނިވަންކަން މި ސަރުކާރުގައި ލިބިގެން ދާނެ ކަމަށާއި ނުހައްގުން އަނިޔާ ދިނުން މިސަރުކާރުން ހުއްޓޭނެ ކަމަށް ވިދާޅުވިއިރު މީޑިޔާތަކުން ތިބެން ޖެހެނީ އަނގަމަތީ ޓޭޕް އަޅައިގެން ގައުމު ވީ ހާލެއްވާން ދޫކޮށްލައިގެންނެވެ. ނޫސްވެރިކަން ކުރެވެނީ ސަރުކާރަށް ސަނާ ކިޔާ ބަޔަކަށް އެކަންޏެވެ.

ބެންކޮކް ދުބާއީ ފަދަ ގައުމުތަކުން އާސަންދަ ހަމަޖެހިގެންދާނެ ކަމަށާއި ބޭސްފަރުވާއަށް ދިވެހިން ސަލާން ޖެހުން ހުއްޓިގެންދާނެ ކަމަށް ރައީސް މުއިއްޒު ވިދާޅުވިއރު އިންޑިއާ ހަމައަށްވެސް ބޭސްފަރުވާ އަށް ދިވެހިން ދާން މިޖެހެނީ ސަރުކާރަށް އެތަކެއް އާދެއް ދެންނެވުމަށްފަހުގައެވެ. ކަންމިހެން އޮތް އިރު ނިކަމެތި ދިވެހި ރައްޔިތުން އެއަށްވުރެ ދުރަށް ބޭސްފަރުވާ އަށް ދާން ކިހާ ގަނެތެޅެން ޖެހޭނެބާއޭ ހިތަށްއަރައެވެ.

ރައީސް މުއިއްޒުގެ ބަހާއި އަމަލު ދިމާނުވާކަން މިދަނީ ވަރަށް ރަނގަޅަށް ސާފުވަމުންނެވެ. އިރު އަރާ އޮއްސިގެންދަނީ އެމަނިކުފާނުގެ ދޮގުގެ ގުލްދަސްތާތަކުން ފުރެމުންނެވެ.

ގޯތިތަކާއި ފްލެޓްތައް ބަނޑުއަޅައި އޭގެ ހައްގުވެރިންނަށް ނުދީ ހިފަހައްޓާ، މިނިވަން މުއައްސަސާތައް މުއިއްޒުގެ މުށުތެރެއަށްލާ ޑިމޮކްރަޓިކް ނިޒާމް އަންނަނީ ފުޑާލަމުންނެވެ. ރައްޔިތުންނަށް ދަތުރުފަތުރު ކުރުމަށް ލުއި ތަކެއް ހޯދައިދިނުމަށް ގާއިމުކުރެވުނު އާރްޓީއެލް އިން ވެސް ޓިކެޓްއަގު ބޮޑުކޮށް ވެވެން އޮތް ހުރިހާ ގޮތަކުން ރައްޔިތުންގެ ފައިސާ ނަގަމުން ސަރުކާރުން ދަނީ އަމިއްލަ ސިޔާސީ ފައިދާ ނަގަމުންނެވެ.ދައުލަތުގެ ޚަރަދުން ފަސްޓް ލޭޑީ ރަސްމީ ދަތުރުފުޅުތައް ކުރައްވާ ވަކި އެޖެންޑާއެއްގެ ސިލްސިލާ ފެށުމެއް މިވަނީ ފެށިފައެވެ. މިވަރުން ދަންޏާ ރައީސް އޮފީސް ވެސް ދިމްޔާތަށް ބަދަލުވެގެން ދިޔުމަކީ މާ ދުރުގައި އޮތް ކަމެއް ނޫނެވެ.

އެހެންކަމުން މިއަދު އުފެދޭ ސުވާލަކީ ބަދަލަކަށް ދިވެހި ރައްޔިތުން ގެނައި ވެރިކަން ސަޅިތަ؟