އެއްވެސް ޤައުމެއްގެ ރައްޔިތުން އަޅުވެތި ކަމެއްގެ ތެރެއަށްވެއްޓޭކަށް ނޭދޭނެއެވެ. އަދި އެފަދަ އަލާމާތްތަކެއް ފެންނަ ނަމަ ހިތްވަރު ގަދަ އެތައް ފަހުލަވާނަކު ފާޅުވެގެންދާނެވެސްމެއެވެ.
ނަޒަރު ހިންގާލަން މިއުޅެނީ، ދާދި އިހަކަށް ދުވަހު ފެންމަތި މައްސަލައެކެވެ.
ދިވެހިރާއްޖޭގެ އިޙްތިޞާސް ތެރޭގައި މަސްވެރިކަން ކުރަމުން ދިޔަ ދިވެހި މަސްބޯޓަކަށް އިންޑިއާ ބަޔަކު އެރި ހަބަރު އަޑު އިވުމާއެކު މުޅި ސޯޝަލް މީޑިއާގައި ސުވާލުތަައް ފުނި ޖެހި ބަންޑުން ވާން ފެށިއެވެ.. އެއީ ކޮންބައެއްތޯ އާއި ކީއްކުރާ ބައެއް ތޯއެވެ. ބޮޑުކަންނެލި މަސްވެރިންގެ ޔޫނިއަނުން ބުނެފައިވާ ގޮތުން އެމީހުންގެ ހަބަރެއް ނުވެ ވެސް ދިޔައެވެ.
އިސާހިތަކު ދެން ފެތުނު އަޑަކީ އެ މަސްދޯންނިތަކަށް އަރައި އުޅުނީ އަވައްޓެރިންގެ ގޮތުގައި ތިބި ބޮޑުބޭބެ ކަމަށް ދައުވާ ކުރާ އިންޑިއާ ސިފައިން ކަމަށެވެ. މިހާ ހިސާބުން ދެން އުފެދިގެން އައި ސުވާލުތަކުގައި ޖަހަން ޖެހުނު ސުވާލުމާކުތައް ބޮޑުވިއެވެ. އެންމެ ފުރަތަމަ ވެސް އުފެދޭ ސުވާލަކީ ރާއްޖޭގެ އިހުތިޞާސް ތެރޭގައި އިންޑިއާ ސިފައިން ކީއްކުރަނީ ބާއެވެ؟ އެމީހުން ރާއްޖެއަށް ވަދެ އެއުޅެނީ ކޮން ބޭނުމަކު ތޯއެވެ؟ މިއީ ހައްތަހާވެސް އުފެދޭ ސުވާލުތަކެކެވެ.
މާ ލަސްތަކެއް ނުވެ ސޯޝަލް މީޑިއާގައި ވީޑިއޯތަކެއް ދައުރުވާން ފެށިއެެވެ. އިންޑިއާ ސިފައިން އަރައި ތިބި ދިިވެހި މަސްބޯޓުތަކުގެއެވެ. ވީޑިއޯތަކުގައި ވަރަށް ސާފުކޮށް އިންޑިއާ ސިފައިން ހަތިޔާރާއެކު ތިބި މަންޒަރު ފެނިގެންދެއެވެ. ބިރުގަންނާނެއެވެ. އެހެން ޤައުމެއްގެ ސިފައިން މިތިބީ ހަތިޔާރާއެކު އަރައެވެ. ނަމެވެސް މަސްދޯނީގައި ތިބި މަސްވެރިން ދެއްކީ ނަމޫނާ މިސާލެވެ. ގޮވަމުން ދިޔައީ މަސްދޯނިން ފޭބުމަށެވެ. އަދި ރާއްޖޭގެ އިހުތިޞާސް ތެރެއަށް ވަދެ އެތިބީ ގަވާއިދާއި ޚިލާފަށް ކަމަށެވެ.
ހަތިޔާރާއެކު ބޭރުގެ ސިފައިންތަކެއް އަރައި ތިއްބާ ދިފާއުގައި އަޑު އުފުލައި މިފަދައިން ހިތްވަރު ދެއްކޭނީ ކިހާ ގައުމިއްޔަތު ކަމެއް ލޭގައި ހުރީމަތޯއެވެ. މިއީ އަޅުގަނޑުމެން ފަހުރުވެރިވާން ޖެހޭ ވަރުގެ މަސްވެރިންނެވެ. ފަޚްރުވެރިކަމާ އެކު ދިފާއީ ބާރުން ދިން އިރުޝާދާ ލަފާގެ އަޑު އެ ސިފައިން ކުރިމަތީ އިއްވާލީ ބިރެއް ނެތި ފަސް ޖެހުމެއް ނެތިއެވެ.
މަސްވެރިން މިފަދަ ހިތްވަރެއް ހަތިޔާރާ ބާރާގެ ކުރިމަތީ ދެއްކި އިރު ފިނި ކޮޓަރީގައި ތިބި ގައުމުގެ އިސްވެރިނަށް މިކަމާއި ގުޅިގެން މާ ބޮޑު އަހައްމިއްޔަތު ކަމެއްނުދެވުނެވެ. މައްސަލަ ބަލަމުންދަނީއެވެ. ނުވަތަ ބަލާނަމެވެ. އަބަދުވެސް މިހާވަރަކުންނެވެ. އަވައްޓެރި އިންޑިއާ އިން ކެނޑިނޭޅި ރާއްޖެއަށް ދެމުންދާ މިފަދަ އިންޒާރު ތަކާއި ދެކޮޅަށް ސަރުކާރު ނިކުންނާނެ ދުވަހެއް އަންނާނެބާ؟ ނޫނީ ހަމަ ނިމިދިޔަ ސަރުކާރުގައި ރައީސުލްޖުމްހޫރިއްޔާ އިބުރާހިމް މުހައްމަދު ސޯލިހު ފަދައިން ޕަޕެޓަކަށްވެ، ޤައުމު ގުރުބާންކުރާނީތޯއެވެ.
