ނަސްރުގެ ދުވަހުގެ ރަސްމީ ޖަލްސާގައި ޖަލްސާ ފަށަމުން ވަޑައިގެން ތިއްބެވި އިސް ފަރާތްތަކަށް ރައީސް ޑރ މުހައްމަދު މުއިއްޒު މުޚާތަބުކުރިއިރު ނައިބު ރައީސް ހުސައިން މުހައްމަދު ލަތީފަށް މުޚާތަބުކޮށްފައި ނުވާތީ ގިނަ ބައެއްގެ ފާޑު ކިޔުން އަމާޒުވެއްޖެއެވެ.

ރޭ ބޭއްވި މި ޖަލްސާގައި ވާހަކަފުޅު ދައްކަވަމުން ރައީސް މުއިއްޒު ވަނީ ނައިބު ރައީސްގެ ނަން ނުގަނެ ރައްޔިތުންގެ މަޖިލީހުގެ ރައީސް އަދުރޭގެ ނަން މުޚާތަބުކޮށް ނައިބު ރައީސަށްވުރެ އަދުރޭ އެމަނިކުފާނަށް މުހިއްމުކަން މުޅި ގައުމަށް ހާމަކޮށްފައެވެ.

ރައީސް މުއިއްޒު ވެރިކަމަށް ވަޑައިގަތުމަށް އެންމެ ބުރަކޮށް މަސައްކަތް ކޮށްދެއްވި އެއް ބޭފުޅަކީ ނައިބު ރައީސަށް ވާއިރު، ފާއިތުވި ދުވަސްތަކުގައި ސެންބެގެ އަޑު ވަނީ ވަރަށް މަޑުވެފައެވެ.

މިގޮތުން، ޒުވާނުންގެ ބޮޑު ބައެއް ކޮންޓްރޯލް ކުރަމުން އަންނަ ސެންބެގެ އެހީއާއެކު ޒުވާނުންގެ ތާއީދު ރައީސް މުއިއްޒު ހޯދާ، ވެރިކަން ލިބުމުން ރައީސް އަބްދުﷲ ޔާމީނަށް ކަންތައް ކުރި ފަދައިން ނައިބު ރައީސް ވަނީ "ބޮޑު މަންޒަރުން" އެއް ފަރާތްކޮށްފައި ކަމަށް ގިނަ ފަރާތްތަކުން އަންނަނީ ބުނަމުންނެވެ.

މީގެ އިތުރުން، ރައީސް މުއިއްޒު އަކީ އަމިއްލަ ފައިދާއަށް މަސައްކަތްކޮށް ބޭނުންވާ ކަމެއް ހާސިލުވުމުން އެކަމަކަށް އެންމެ މަސައްކަތް ކުރި މީހުންތަކަށް ލަނޑުދެމުންދާ ދޮގުވެރި މީހެއް ކަމަށްވެސް ވަނީ ސިފަކޮށްފައެވެ.