ރައީސް ޑރ މުޙައްމަދު މުއިއްޒު އެއްޗެއް ވިދާޅުވުމުން އެ ދެއްކެވި ވާހަކަފުޅަކާ މެދު ރައްޔިތުން އިތުބާރު ކުރަން ޖެހޭތޯ ބަލާ މި ފަހަކަށް އައިސް ދިރާސާ ރައްޔިތުން ކުރަނީ ސަބަބުތަކެއް ނެތި އެއް ނޫނެވެ. އެހެނީ ގިނަ ފަހަރު އެމަނިކުފާނާ އެމަނިކުފާނުގެ ކެބިނެޓުންވެސް އިއުލާންކުރައްވާ ކަންކަން ފަހުން އޮންނަނީ ކެންސަލްވެ ނުވަތަ ބުނި ގޮތް ނޫން ގޮތަކަށް ބަދަލުވެފައި ކަމަށް ވާތީއެވެ.

އެގޮތުން ބަލާއިރު، ކަނޑު އަޑިން ޓަނަލެއް އަޅާނެ ވާހަކަ އަކީ ތިޔަ ބޭފުޅުން ހަނދުމަ ހުންނާނެކަމެއް ޔަގީނެވެ. ރަސްމާލެ އާއި މާލެ އާއި ގުޅާލާ އަންޑަރވޯޓަރ ޓަނަލްގެ ވާހަކައަކީ އަކީ 2024، ޖެނުއަރީ 22 ވަނަ ދުވަހު ރައީސް މުއިއްޒު ވިދާޅުވި ވާހަކަފުޅެކެވެ. ހަމަ ޔަގީނުންވެސް އެކަމާ އުފަލުން މަރުހަބާކީ މީހުންވެސް މަދެއް ނޫނެވެ. އެއީ އެފަދަ ތަނެއް އެޅިއްޖެ ނަމަ އެއީ އަނެއްކާވެސް ތާރީޚުގެ ތެރެއަށް ރާއްޖެ ފަދަ ކުޑަ ގައުމަކަށް ވަނުމަށް ހުޅުވޭނެ ދޮރަކަށް ވެސް ވުމުންނެވެ.

ނަމަވެސް ރައީސް މުއިއްޒު އެ ދެއްކެވި ވާހަަކަފުޅުގެ މަފްހޫމުވެސް މިހާރު އަނެއްކާ މިއޮތީ އޮޅިފައެވެ. އެހެނީ ކޮންސްޓްރަކްޝަން މިނިސްޓަރު އެކަމާ ވިދާޅުވާ ބަސް ތަފާތުވުމުންނެވެ. އެގޮތުން 28 އޮކްޓޯބަރ 2024 ވަނަ ދުވަހު ވަޒީރު އަބްދުﷲ މުޠައްލިބު ވިދާޅުވީ، އެއީ ރައީސްގެ ބޯލްޑް ވިޝަން އެއް ކަމަށެވެ. އެހެން ގޮތަކަށް ބުނާ ނަމަ އެއީ ރައީސްގެ ތަސައްވުރެއް ކަމަށެވެ. ހަގީގަތަކަށް ހެދޭނެ ވާހަކައެއް ވިދާޅުނުވެއެވެ. އަދި ދެން ވިދާޅުވީ އަދި އެއަށް ވުރެވެސް މާ ފައްކާ ވާހަކައެކެވެ. އަޑު އަހަން އިނދެފައި އަޅުަގޑުވެސް ދިޔައީ ހިނިގަނޑު ފަޅައިގެންނެވެ.

ވަޒީރު ވިދާޅުވީ، އެއީ އަދި ދުނިޔޭގައި ނެތް ޓެކްނޮލެޖީއެއް ކަމަށާ އެހެންކަމުން އެކަން ފެށޭނެ ތާރީޚަކާ ނިންމޭނެ މުއްދަތަކާ ޓައިމްލައިނެއް ދެވެން ނެތް ކަމަށެވެ. އަދި ޖެހޭނީ އެއީ ފައިނޭންޝަލީ އަދި ޓެކްނިކަލީ ފީޒިބަލް ކަމެއްތޯ ބެލުމަށް ވެސް ބަޔަކާ ހަވާލު ކުރަން ކަމަށް ވެސް ވަޒީރު މުޠައްލިބު ވިދާޅުވިއެވެ.

މިހާ ހިސާބުން ހިތަށް އަރާފައިބަން ފެށި ސުވާލުތަކުގެ ފީންޏެކެވެ. އެގޮތުން މީގެ 9 މަސް ކުރިން ރައީސް ވިދާޅުވެފައިވަނީ ގާބިލްކަން ހުރި ކުންފުނިތަކަށް ހަވާލުކުރައްވައިގެން ފީޒިބިލިޓީ މަސައްކަތް ކުރައްވާ ކަމަށް ވާއިރު މިހާރު އެކަން ދިޔައީ ކޮން ދިމާއަކަށް ކަމާ މެދު ސުވާލު އުފެދުނެވެ. ނޫނީ ރައީސް އެފަދަ ކަމެއް ކުރައްވާކަން އިއުލާންކުރެއްވީ ވަޒީރާ އަދި ވުޒާރާއަށް ވެސް އެނގުމަކާ ނުލާބާއެވެ؟

ދެން އޮތް ވާހަކައަކީ އެކަމަކީ ޓައިމްލައިނެއް ދީގެން ކުރެވޭނެ ކަމެއް ނޫން ކަމަށް ވަޒީރު ވިދާޅުވުމުން ދެން ރައްޔިތުން ދެކެން ގޮތަކަށްތޯއެވެ؟ އެއީ ރައީސް މުއިއްޒު ރައްޔިތުންނަށް ދެއްކެވި ނަނާ ހުވަފެނެއްގެ ގޮތުގައި ދެކެންވީބާއެވެ؟

ހަމައެހެންމެ ވަޒީރު އެކަން ސިފަ ކުރެއްވީ އެމެރިކާ މީހުން ހަނދަށް ދިއުން ފަދަ ކަމެއްގެ ގޮތުގައި ކަމަށްވާއިރު ސުވާލަކީ ދެން ޓަނެލް ކަނޑު އަޑީގައި ނާޅާ ހަނދާ ދިމާއަށް ރާއްޖެއިން މިސްރާބު ޖަހާނީބާއެވެ؟ މިކަހަލަ އެތައް ސުވާލެއް މިކަމުގެ ތެރެއިން ވެސް އުފެދިގެންދާއިރު ބިއްލޫރި ޓަނެލުގެ ހުވަފެން ވިއްސި ވިހާލިވެ ބުރައިގެން ހިނގައްޖެކަމަށް ވަޒީރުގެ ވާހަކައިން ފަހުމުކުރަން މަޖްބޫރުވެއްޖެއެވެ.