ރައީސް ޑރ މުހައްމަދު މުއިއްޒުގެ ކެބިނެޓަކީ ބައު މުދާ ވިއްކާ ނީލަން ފިހާރައެއްގެ ގޮތުގައި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ސިފަކުރައްވައިފިއެވެ.

ޑރ. ޖަމީލު މިފަދައިން ސިފަކުރެއްވީ ބުރާސްފަތި ދުވަހުގެރޭ ބޭއްވި ޕީއެންްއެފް ޖަލްސާގައި ވާހަކަ ދައްކަވަމުންނެވެ.

ޑރ ޖަމީލު ވިދާޅުވީ، ކެބިނެޓެއް ބޭނުމަކީ ރައްޔިތުންނަށް ދޭންވާ ހިދުމަތްތައް އެންމެ ރަގަޅު ގޮތުގައި ފޯރުކޮށްދިނުމަށް ބޭނުންވަނެ މަގު ކޮށާ އެ ރާސްތާ، ރައީސުލްޖުމްހޫރިއްޔާއަށް ދައްކަން ތިބި ބޭފުޅުން ތިއްބަވާ ތަނަކަށްވީ ނަމަވެސް މިހާރު އޮތް ކެބިނެޓުގައި އެ ގާބިލުކަން ހުރި ބޭފުޅުން ނެތް ކަމަށެވެ. އަދި ފެންނަމުން ދަނީ ކެބިނެޓުގައި ތިބި ވަޒީރުންގެ ނާގާބިލުކަމުން ރައްޔިތުންނަށާ ގައުމަށް އޭގެ ނުރައްކަލާ ގެއްލުންވަމުންދާ މަންޒަރު ކަމަށާ އެގޮތުން މިސާލެއްގެ ގޮތުގައި ޑރ ޖަމީލު ނެންގެވީ ފޯޅަވަހި މޮރިޝަސްއަށް ދިނުމުން އެތަން އަނބުރާ ހޯދުމަށް އެޓަރނީ ޖެނެރަލު މަސައްކަތްނުކުރައްވާ ހުންނެވުމަށް ފަހު އެކަން އިނގިރޭސިވިލާތާ ޖާމިނުކުރުމަށް މަސައްކަތްކުރެއްވި ކުރެއްވުމުގެ މިސާލެވެ.

ޑރ ޖަމީލު ވިދާޅުވީ މަތިބަރު ސަރުކާރެއް އޮތް ނަމަވެސް ރައްޔިތުންނަށް އޭގެ ފައިދާ ނުވާކަމަށާ އަހަރެއް ވެގެންދާއިރު ނީލަ ކޯރު ފުރެންދެން ރައީސް މުއިއްޒު ދިވެހިންނަށް ވީ ވައުދުގެ އެއްވެސް ވައުދެއް ނުފުއްދޭ ކަމަށް ވެސް ޑރ. ޖަމީލު ވިދާޅުވިއެވެ.