ޖެލީފިޝް ފެންނަ މޫސުމުގައި މޫދައަށް އެރޭއިރު އެއަށް ސަމާލުވުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން ފޭސްބުކުގައި ކޮށްފައިވާ ޕޯސްޓެއްގައި ވަނީ ޖެލީފިޝްގައި ޖެހުމުން ފެންނާނެ އަލާމާތްތަކާއި، ޖެލީފިޝް ގައިގައި ޖެހިއްޖެނަމަ ކުރެވިދާނެ ކަންތައްތަކާއި، ޖެލީފިޝް ވިހަވުމުން ރައްކާތެރިވުމަށް ކުރެވިދާނެ ކަންތައްތައް އާންމުކޮށްފައެވެ.

އެގޮތުން އެޗްޕީއޭއިން ވަނީ މޫދަށް އެރޭ އިރު ޖެލީފިޝްއަށް ސަމާލުވުމަށް ގޮވާލައިފައެވެ. އަދި މޫދަށް އެރޭއިރު، ހަށިގަނޑުގެ ހުރިހާ ހިސާބެއް ނިވާވާ ޖެލީފިޝް ވިހައިގެ އަސަރު ނުކުރާނެ ފަދަ ހެދުމެއްގައި މޫދަށް އެރުމަށް ވެސް އެޗްޕީއޭއިން ވަނީ އިލްތިމާސްކުރައްވާފައެވެ.

ޖެލީފިޝް ވިހައިގެ އަސަރުކޮށްފިނަމަ ވީހާވެސް އަވަހަށް އަވަސް ފަރުވާ ހޯދުމަށް، ސިއްޙީ ފަރުވާ ހޯދުމަށް ވެސް އެޗްޕީއޭއިން އިލްތިމާސްކޮށްފައިވެއެވެ.