ފަލަސްތީނާއި ދެކޮޅަށް ޔަހޫދީން ހިންގަމުން އަންނަ ގަތުލުއާންމުއާއި ދެކޮޅަށް އަޑު އުފުލަމުން އަންނަ ޑރ ޝަޒްރާ އަދި ޝާދިޔާގެ މައްޗަށް ދެ ދައުވާއެއް އުފުލައިފިއެވެ.

ޕްރޮސެކިއުޓާ ޖެނެރަލް އޮފީސް (ޕީޖީ) އިން އުފުލައިފައިވާ މި ދައުވާތަކަކީ ގާނޫނުލްއުގޫބާތުގެ 533 ވަަނަ މާއްދާގެ ދަށުން - ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ކުށުގެ ދައުވާ (އަސާސީ އަދަބު: ހަތަރު މަހާއި 24 ދުވަހުގެ މުއްދަތަކަށް ޖަލަށް ލުން) އަދި ގާނޫނުލްއުގޫބާތުގެ 615 ވަނަ މާއްދާގެ ދަށުން - އާންމު ތަނެއްގައި ހުރި މީހަކު، އެ މީހެއްގެ އަމަލުތަކުގެ ސަބަބުން އެހެން މީހަކަށް ގޯނާވާނެކަން، ނުވަތަ އުނދަގޫވާނެކަން، ނުވަތަ ބިރު ހީވާނެކަން އެނގިހުރެ، އެކަށީގެން ނުވާ ވަރަށް އަޑުގަދަކުރުމުގެ ކުށުގެ ދައުވާ. (އަސާސީ އަދަބު: އެއް މަހާއި ހަ ދުވަހުގެ މުއްދަތަކަށް ޖަލަށް ލުން) އެވެ.

މި ދެ ދައުވާ މި ފަރާތްތަކަށް ސާބިތުވެއްޖެނަމަ ހަ މަސް ދުވަހުގެ ޖަލު ހުކުމެއް އަންނާނެއެވެ.

ޑރ ޝަޒްރާ އަދި ޝާދިޔާ ހައްޔަރުކޮށްފައިވަނީ ފަލަސްތީނާއި ދެކޮޅަށް ކުރަމުންދާ ހަނގުރާމައިގައި އެ ގައުމުގެ މިނިވަންކަމަށް ގޮވާލާ ރާއްޖޭގައި ގާއިމުވެފައިވާ އެމްބަސީތައް ކައިރީގައި މުޒާހަރާ ކުރަމުން ގެންދިޔުމުގެ މައްސަލައިގައެވެ.

މި ދެ މީހުން ހައްޔަރުކުރީ އޯގަސްޓު 28، ގަ އެވެ. ދެ ފަހަރެއްގެ މަތިން އެ މީހުންގެ ބަންދުގެ މުއްދަތު އިތުރު ކޮށްފައިވާ އިރު އެ މީހުން ދޫކޮށްލީ ބަންދުކުރިތާ ނުވަ ދުވަސް ފަހުންނެވެ.

ފަަލަސްތީނުގެ ހައްގުގައި އަޑުއުފުލަމުންދާ މިފަދަ ފަރާތްތަކާއި މެދު ސަރުކާރުން މިފަދައިން ކަންތައް ކުރަމުން އަންނައިރު ސަރުކާރުން ފަލަސްތީނުގެ ހައްގުގައި ސަހްޔޫނީންގެ ޕާސްޕޯޓް މަނާކުރުން ފަސްކުރަމުންދާތީ ބޮޑެތި ފާޑުކިޔުންތައް ސަރުކާރަށް ދަނީ އަމާޒުވަމުންނެވެ.