ގާނޫނީ ގޮތުން ގައުމެއްގެ ވެރިކަން ހިންގުމުގެ ބާރު ލިބިފައިވާ ފަރާތް ޖަވާބުދާރުނުކުރެވި، ޖަވާބުދާރީވެނިވި ދައުލަތެއް ބިނާކުރަން، ގާނޫނު އަސާސީ އާއި ގާނޫނުތަކުގެ ދަށުން އުފައްދާފައިވާ މިނިވަން މުއައްސަސާތަކާއި އިދާރާތައް ރައީސުލްޖުމްހޫރިއްޔާގެ އޯޑަރަށް "ހައިޖެކް" ކުރުމުން ގައުމަކަށް ޖެހޭނެ ހުރިހާ ބަލާ އާފާތެއް މިއަދު ދިވެހިން މިދަނީ ތަޖުރިބާ ކުރަމުންނެވެ.

ނަތީޖާއަކީ ރައްޔިތުން އިންތިހާބު ކޮށްގެން ރައްޔިތުންނަށް ޓަކައި ރައްޔިތުން އެދޭ ގޮތަށް ހިންގާ ސަރުކާރެއް ނުފެނި މިނިވަން ހިޔާލަށް ވަކިން ހާއްސަކޮށް ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަން ތަންމިނަށް ހުޅުވާލެވިފައި އޮންނަންވާނެ ކަމަށް ލިޔުނު ފެހި ގާނޫނު އަސާސީ ދިރިހުއްޓާ ވަޅުލުމެވެ.

މި ކަމުގެ އެއް މިސާލު މި ރިޕޯޓުގައި ފައިސަލާ މި ކޮށްލަނީއެވެ.

ކުރިން ވެސް ތިޔަ އެންމެ ބޭފުޅުން އަޑު އެއްސެވި ފަދައިން ރައީސް ޑރ. މުހައްމަދު މުއިއްޒުގެ ދޮންމަންމަ، ސްރީލަންކާގެ ރައްޔިތެއްކަމުގައިވާ، ޖީ ސްކީލާން ރާއްޖޭން ބްލެކްލިސްޓުކޮށް ޑީޕޯޓުކޮށްލި ގޮތާއި އޭނާ މުއިއްޒުއަށް ކުރި ތުހުމަތުތަކުގެ މައްޗަށް އޮންލައިން ނޫސް "އަދަދު" ން ތައްޔާރުކުރި "ސްކީލާން" ނުވަތަ ދިވެހިންގެ ތެރެއަށް މަޝްހޫރުވި "ދޮންއަމާ" ޑޮކިއުމެންޓަރީއަށް ވީޑިއޯ އޯޑިއޯ ކެޓެގަރީން ތަހުގީގީ ނޫސްވެރިކަމުގެ ދާއިރާގެ އެވޯޑު ލިބުނީ ނިމުނު މޯލްޑިވްސް މީޑިއާ ކައުންސިލް (އެމްއެމްސީ)ގެ 11 ވަނަ ނޫސްވެރިކަމުގެ އެވޯޑް ހަފްލާގައެވެ.

މި ހަފްލާގައި "ދޮންއަމާ" ޑޮކިއުމެންޓަރީއަށް އެވޯޑް ލިބޭނެކަން އިއުލާންކުރެވި އަދި އެ ޑޮކިއުމެންޓަރީގެ ވީޑިއޯ ހަފްލާގެ ހާޒިރީންނަށް ދައްކަމުން އަދި ދައުލަތުގެ މީޑިއާއިން ލައިވްކޮށް ދުރަށް ފޮނުވަމުން ދިޔައިރު، ރައީސުލްޖުމްހޫރިއްޔާގެ ނައިބާ އަދި ސަރުކާރުގެ އިސް ސިޔާސީ ވެރިންނާއި އަދި ވަކިން ހާއްސަކޮށް ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ހަލީލް އިންނެވީ ހިޔަޅުގެ ބުއްދިފިލާ ގޮސް "ދޮންއަމާ" ޑޮކިއުމެންޓަރީއަށް ގެއްލި އަތްޖަހާށެވެ. އަދި ތަހުގީގީ ނޫސްވެރިކަމުގެ އެވޯޑް ލިބުނު އަހުމަދު އާއިދަށް ސްޓޭޖަށް ގޮވާލުމާއިއެކު މިދެންނެވި ހަލީލުއާއި މުއިއްޒު ސަރުކާރުގެ އިސް ވެރިން އާއިދުއަށް ތަރުހީބު ދީ އަތް ޖެއްސެވީ އެފަދަ އިތުރު ރިޕޯޓެއް ދެކެން އެދޭކަމުގެ ހެއްކެއްގެ ގޮތުގައެވެ. އަދި މިނިވަން ނޫސްވެރިކަމެއްގެ ރަން ޒަމާނެއް ރައީސް މުއިއްޒުގެ ރިޔާސީ ދައުރުގައި ދިރެން ބޭނުންވާ ކަމުގެ ހިޔާލީ ރޫހެއްގައެވެ.

ކޮންމެއަކަސް ރައީސް މުހައްމަދު މުއިއްޒުގެ މައްޗަށް ކުރި ތުހުމަތުތަކެއްގެ މައްޗަށް، ރިޔާސީ އިންތިހާބުގެ ކެމްޕެއިން ތެރޭގައި ތައްޔާރުކުރި މި ޑޮކިއުމެންޓްރީއަށް ޝަރަފުވެރި އެވޯޑެއް ލިބި ހަފްލާ ނިމުނުއިރު އޮތީ ވަގުތު ފާއިތުވެފައެވެ. މުއިއްޒުގެ އާއިލީ ވެރިކަމުގެ ބޮޓުން ތަކަށް ހަމަ ހޭވެރިކަންވީއިރު ނޫސްވެރިކަމުގެ އެވޯޑް ހަފްލާ އޮތީ "ދޮންއަމާ" ވެފަ އެވެ. އިސާ ހިތަކު މިދެންނެވި ބޮޓުންތަކަށް މުލީއާގެއިން ގުޅަން ފެށިއެވެ. ލިބުނު ކޯލުތަކުގައި ބުނީ މުއިއްޒުގެ ސަޕޯޓަރުންގެ ފާޑުކިޔުން އެވޯޑް ހަފްލާއަށް އަމާޒު ކުރަން ފެށުމަށެވެ. ނަމަވެސް މަސްތުން ވީއްލި އެވެރިންގެ މީސް މީޑިއާގެ މަސައްކަތަށް ނިކުތްއިރު ވަގުތު ވަނީ ފާއިތުވެފަ އެވެ. ހަފްލާއަށްފަހު ބޭއްވި ބިލެތްމީރުކޮށްލެއްވުން ނިމި އިވެންޓަށް ސައި ތައްޔާރުކުރި މީހުން ވެސް ވަނީ އެވޯޑް ހަފްލާގެ ސީން ރޫޅާލައިފައެވެ.

ނަތީޖާއަކަށްވީ މީގެ ކުރިން މުއިއްޒު މީޑިއާ ކައުންސިލުން ކޮށި ދަނޑު ގެއްލި ކަތިވަޅި ގެއްލި މަރިޔަބު ގެއްލުމެވެ. އަދި  ގެއްލުނު މަރިޔަބުގެ މައްޗަށް މުއިއްޒުގެ ދޮންއަމާ ގަދަވެ ގަތުމެވެ. މި މައްސަލަ ބޮޑުވުމުން ޖުމްހޫރީ ސަރުކާރުގެ ރައީސް މުއިއްޒު މިހާރު އެ މަސައްކަތް ކުރައްވަނީ ދައުލަތުގެ މިނިވަން މުއައްސަސާތައް ހައިޖެކް ކޮށްގެން އަނެކާގެ އަތުގައި އޮތް އެއްކަލަ "ދޮންއަމާއެވޯޑް" އަތްދަށުލުމަށެވެ.

އޭ މިހިރަ ޖުމްހޫރީ ވެރިކަމުގެ ވެރިޔާ އެވެ.

ތިބާގެ އާއިލީ ވެރިކަމުގެ ބޮޑު ސިނަމާގައި، ނެތިމޮށުމަކީ ފޮރުވިފައިވާ ނުބައި މާނަތަކެއް ހިމެނޭ ކުލަގަދަ ފިލްމެއް ފަދަ އެއްޗެކެވެ. ހިޔާލު ފާޅުކުރުމުގެ މިނިވަންކަމުގެ ވާހަކަތަކަށް ޖާގަ ނުދިނުމަކީ، ތިބާގެ ވެރިކަމުގެ ހާންދާނީ މުނިފޫހިފިލުވުމުގެ ފޭރާމުގައިވާ ފިތުނަވެރިކަމެކެވެ. އަދި ތިބާ އިންތިހާބުން މޮޅުވުމަށް ނެތިމޮށުމުގެ އޮލަކަމުގައި އުފާކުރިއިރު، ޒަމާންވީ ހިކުމަތެއް ހަނދާން ނައްތާނުލަމާ ހިންގާށެވެ.

ވާރުތަވި، މުދާ ބެހުމުގައި ކެޔޮ ކޭވަރު އިނގޭނީ ބިތުފަންގި ނެގީމައެވެ.