2028ގެ ރިޔާސީ އިންތިޚާބުގައި އެމަނިކުފާނު ވާދަކުރައްވާނެކަމުގެ އިޝާރާތެއް ރައީސް އަބްދުﷲ ޔާމީން ކުރައްވައިފިއެވެ.

އެމަނިކުފާނު މިފަދަ އިޝާރާތެއް ކުރެއްވީ ރާއްޖެ ޓީވީގެ ފަށާއިރު ޕްރޮގްރާމަށް ދެއްވި ބަސްދީގަތުމެއްގައެވެ.

އަންނަ ރިޔާސީ އިންތިޚާބަށް ވާދަ ކުރައްވާނެތޯ ރައީސް ޔާމީންއާ ޕްރެޒެންޓަރ ކުރެއްވި ސުވާލަށް ރައީސް ޔާމީން ފުރަތަމަ ދެއްވީ މަޖާޒީ ޖަވާބެކެވެ.

އެއަށް ފަހު ރައީސް ޔާމީން ވިދާޅުވީ އެމަނިކުފާނު ސަލާމަތުން މިނިވަންކަމާ އެކު ހުންނަވައިފި ނަމަ އެ ޚިޔާލު އެބަހުރި ކަމަށެވެ. އަދި އެމަނިކުފާނަށް ވެރިކަން ކުރުމުގެ ފުރުސަތު ލިބިވަޑައިގެންފިނަމަ އެމަނިކުފާނު އެންމެ އިސްކަމެއް ދެއްވާނީ އިނދަޖެހިފައި އޮތް ގައުމުގެ އިގްތިސޯދު ނަގާ ކޮޅަށް ޖެހޭނެ ގޮތެއް ހޯއްދަވާ ގައުމުގެ ފުދުންތެރިކަން ހަމަ މަގަށް އެޅުވުން ކަމަށެވެ.

ރައީސް ޔާމީން އިތުރަށް ވިދާޅުވީ ރައީސް މުހައްމަދު މުއިއްޒަށް ތާއީދު ކުރެއްވުނީތީ މިއަދު "ރިގްރެޓް" ކުރައްވާ ކަމަށެވެ. އެގޮތުން އެމަނިފާނުގެ މުޑުވަކުން އުފެދުނު ސަރުކާރެއްގައި ގިނަ ގޯސްތަކެއް ހަދަމުންދާ ދިއުން ބަލައިނުގަނެވޭނެ ކަމަށް ވެސް ރައީސް ޔާމީން ވިދާޅިވިއެވެ.