މެދުއިރުމަތީގެ ސުލްހައިގެ ވާހަކަތައް ފެށޭނީ ސަހްޔޫނީންގެ ލާއިންސާނީ ޖަރީމާތައް މެދުކަނޑައި ލުމުން ކަމަށް ލުބްނާންގެ މުޖާހިދުންގެ ޖަމާއަތް, ހިޒްބުﷲގެ ވެރިޔާ އަލް ޝައިހު ނައީމް ގާސިމް ވިދާޅުވެއްޖެ އެވެ.

ސަހްޔޫނީން އެތައް އަހަރެއް ވަންދެން ހިސާރުކޮށް، ކާބޯތަކެއްޗާއި ބޭސްފަރުވާއިން މަހުރޫމްކޮށްފައިވާ ގާޒާގެ ރައްްޔިތުންގެ ދިފާއުގައި ހަނގުރާމަކުރާ ހަމާސް ޖަމާއަތުން މިދިޔަ އަހަރުގެ އޮކްޓޯބަރުމަހު ސަހްޔޫނީނަށް ވަރުގަދަ ހަމަލާއެއް ދިނެވެ. އެ އީ އުޒުރަކަށް ހަދައިގެން، މުޅި ގާޒާއަށް ބޮން އަޅައި އެ ޝަހަރު މުޅީންހެން ސުންނާފަތިކޮށް، 44،000 އަށް ވުރެ ގިނަ މީހުން މަރައިލުމަށް ފަހު މިހާރު ވަނީ ލުބުނާނު ވެސް އަމާޒަކަށް ހަދައިފަ އެވެ.

ލުބުނާނުގެ އެކި ސަރަހައްދުތަކަށް ކޮންމެ ދުވަހަކު ބޮންއެޅުމުގެ އިތުރުން ބިމުގެ ލަޝްކަރުތައް ވެސް ފޮނުވަައިގެން ކޮންމެ ދުވަހަކު މީހުން މަރަމުން އައިސް، އިޒްރޭލުން އެންމެ ފަހުން ބޮން އެޅީ އީރާނަށެވެ.

އެހެން ނަމަވެސް އެއީ ބަދަލުހިފުމުގެ ގޮތުން ދިން ހަމަލާއެއް ކަމަށް ފުރަތަމަ ބުންޏެވެ. ނަތީޖާއެއްގެ ގޮތުން މިހާރު މުޅި މެދުއިރުމަތީގައި ހަގުރާމައިގެ ރަގަބީލެވެ.

މެދުއިރުމަތިން އަދިވެސް ސުލްހަ ފެންނަން ނެތި، މަންޒަރު ބަދަލުވަމުން ދަނީ ނަގޫރޯޅިއެއް ފަދަ ހަނގުރާމަ އަކަށެވެ. ހަނގުރާމައިގެ ތެރެއަށް ގިނަ ގައުމުތަކެއް ދަމައިގަތުން އެއީ ނުރައްކާތެރި ކަމެއްގެ ގޮތުގައި މަޝްރަހު ދިރާސާކުރައްވާ ބޭބޭފުޅުން ސިފަކުރައްވަ އެވެ.

ލުބްނާންގެ މުޖާހިދުންގެ ޖަމާއަތުގެ ވެރިޔާ އަލް-ޝައިހު ނައީމް ގާސިމް ވިދާޅުވީ, މިއަދުގެ ހާލަތަށް ބަލާއިރު, ސަހްޔޫނީންނާ ދެކޮޅަށް ޖިހާދު ކުރުން ނޫން އިތުރު ގޮތެއް ހިޒްބުﷲށް ނެތް ކަމުގަ އެވެ. އަދި, މައްސަލަތަކަށް ސިޔާސީ ހައްލުތަކެއް ހޯދޭނެ ކަމުގެ އުންމީދެއް ވެސް ނެތް ކަމުގަ އެވެ.

ނަމަވެސް ސަހްޔޫނީންނާ އެކު ސުލްހައިގެ މަޝްވަރާތަކުގައި ބައިވެރިވެވޭނީ, ލުބްނާންގެ މުސްލިމުންގެ ނަސްލު ނައްތާލަން ދެމުންދާ އުދުވާނީ ހަމަލާތައް މެދުކަނޑައިލުމުން ކަމުގަ އެވެ. އަދި ގާޒާއާއި މުޅި ފަލަސްތީނަށް ކުރަމުންދާ ހަތިޔާރީ ޖެއްސުންތައް ނުވަތަ ޖެނޮސައިޑް ހުއްޓާލުމުން ނެވެ.

ލުބްނާނުގެ މުސްލިމުންނާ ދެކޮޅަށް ހިންގަމުންދާ އުދުވާނުގައި ޝަހީދު ކޮށްލާފައިވާ އާންމުންގެ އަދަދު ވަނީ 3150އަށް އުފުލިފަ އެވެ. އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ހެލް މިނިސްޓްރީ ބުންޏެވެ.