ރަސްމާލެ ޓަނަލްއަކީ ވިޝަންއެއް ނޫން ކަމަށާ އެއީ ދޮގު ހެދުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ޕީއެންއެފްގެ ބުރާސްފަތި ދުވަހުގެރޭގެ ޖަލްސާގައި ވާހަކަ ދައްކަވަމުންނެވެ.

ރަސްމާލެ އާއި މާލެ އާއި ގުޅާލާ އަންޑަރވޯޓަރ ޓަނަލްގެ ވާހަކައަކީ އަކީ 2024، ޖެނުއަރީ 22 ވަނަ ދުވަހު ރައީސް މުހައްމަދު މުއިއްޒު ވިދާޅުވި ވާހަކަފުޅެކެވެ. ނަމަވެސް އޭގެ ފަހުން 28 އޮކްޓޯބަރ 2024 ވަނަ ދުވަހު ވަޒީރު އަބްދުﷲ މުޠައްލިބު ވިދާޅުވީ، އެއީ ރައީސްގެ ބޯލްޑް ވިޝަން އެއް ކަމަށެވެ. އަދި ވަޒީރު ވިދާޅުވީ، އެއީ އަދި ދުނިޔޭގައި ނެތް ޓެކްނޮލެޖީއެއް ކަމަށާ އެހެންކަމުން އެކަން ފެށޭނެ ތާރީޚަކާ ނިންމޭނެ މުއްދަތަކާ ޓައިމްލައިނެއް ދެވެން ނެތް ކަމަށެވެ. އަދި ޖެހޭނީ އެއީ ފައިނޭންޝަލީ އަދި ޓެކްނިކަލީ ފީޒިބަލް ކަމެއްތޯ ބެލުމަށް ވެސް ބަޔަކާ ހަވާލު ކުރަން ކަމަށް ވެސް ވަޒީރު މުޠައްލިބު ވިދާޅުވިއެވެ.

މި ވާހަކައަށް އިޝާރާތްކުރައްވާ ރައީސް ޔާމީން ވިދާޅުވީ ދުރު ވިސްނުމޭ އެ ވިދާޅުވާ ބަހުގެ މާނައަކީ އެކަންކަމާ މެދު ވިސްނޭ ވަރަށް ވުރެ ވެސް އެކަން މާދުރުގައި އޮތުން ކަމަށެވެ. އަދި އެމަނިކުފާނު ވިދާޅުވީ ބޯލްޑް ވިޝަންއެއް ކަމަށް ވިދާޅުވެ ރައީސް މުއިއްޒާ ވަޒީރުންވެސް ހައްދަވަމުން ގެންދަވަނީ ދޮގު ކަމަށާ ގެންދަވަނީ ރިޔާސީ އިންތިހާބުތަގެ ވައުދުތައް ނުފުއްދާ ރައްޔިތުންނަށް އޮޅުވާލަމުން ކަމަށެވެ.

ރައީސް ޔާމީން ވަނީ ސަރުކާރުން ރައްޔިތުންނަށް ތަރައްގީ ގެނެސް ނުދީ އެކި ބަހަނާ ދައްކަވަމުން ގެންދަވާތީ ނުރުހުން ފާޅުކުރައްވާފައެވެ.