ރައީސް އިބްރާހިމު މުހައްމަދު ސޯލިހުގެ ވެރިކަމާ ރައީސް ޑރ. މުހައްމަދު މުއިއްޒުގެ ވެރިކަމަކީ އެއް ފޮތަކުން ކިޔަވައިގެން އެއް މަގަކުން ދަތުރުކުރާ ވެރިކަންތަކެއްގެ ގޮތުގައި ޕީއެންއެފްގެ އިސް ސަފުގައި މަސައްކަތް ކުރައްވާ ޑރ އަބްދުﷲ އިބްރާހިމް ސިފަކުރައްވައިފިއެވެ.

ޑރ އަބްދުﷲ އެކްސްގައި ކުރެއްވި ޕޯސްޓެއްގައި ވިދާޅުވީ ރޮކެޓް ސްޕީޑުގައި ރައީސް އަބްދުﷲ ޔާމީން ތަރައްގީކުރަން ފެށި ދިވެހިރާއްޖެ، 10 އަހަރު ފަހަތަށް ސޮއްސާލައިގެން މިހާރު ދަނީ ކަމަށެވެ. އަދި ފާއިތު ވެގެން މިދާ ދެ ވެރިކަމަކީވެސް އެއް ފޮތަކުން ކިޔަވައިގެން އެއް މަގަކުން ގައުމު ބަގުރޫޓް ކުރަން އުޅޭ ދެ ބައެއްކަން ފެނި ހާމަ ވަމުންދާ ކަމަށް ޑރ. އަބްދުﷲ ވިދާޅުވިއެވެ.

ގައުމާއި ރައްޔިތުންނަށް މިހާތަނަށް ހެޔޮވެރިކަމެއް ކޮށްދެއްވީ ރައީސް ޔާމީން ކަން ފާހަގަކުރައްވާ ޑރ. އަބްދުﷲ ވިދާޅުވީ ދެންވެސް ހެޔޮވެރިކަން ކޮށްދެވޭނީ އެމަނިކުފާނަށް ކަން ޝައްކެއްނެތް މިންވަރަށް މިއަދު ސާބިތުވެފައިވާ ކަމަށެވެ.

ޑރ އަބްދުﷲ މިފަދައިން ވިދާޅުވެފައިވާއިރު ރައީސް މުއިއްޒުގެ ސަރުކާރަށް އަހަރެއްވާން ގާތްވެފައިވާއިރު ރައްޔިތުން މި ސަރުކާރު ސިފަކުރަނީ ކުރީ ސަރުކާރަށް ވުރެވެސް ގޯސް "ސަކަރާތް" ވެރިކަމެއްގެ ގޮތުގައެވެ. ވައުދުތައް ކަދުރު ރުކަށް އެރި މީހާގެ ނަދުރަށްވެއްޖެ ކަމަށް ބުނެ ގިނަ ރައްޔިތުން ދަނީ ސަރުކާރަށް ވަރަށް ބޮޑަށް ފާޑުކިޔަމުންކަންވެސް ފާހަގަކޮށްލެވެއެވެ.