މި ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައި ބަޖެޓުގައި އުމުރުން ދުވަސްވީ މީހުންނަށް އޮޅުވާލުމާއި މަކަރު ހަދައިފައި ވާ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އަންނަ އަހަރަށް ދައުލަތުން ލަފައިކުރާ ޖުމުލަ ބަޖެޓުގެ ގޮތުގައި ރައްޔިތުންގެ މަޖިލީހަށް ފޮނުވީ 56.6 ބިލިއަން ރުފިޔާގެ ބަޖެޓެ އެކެވެ. މި ބަޖެޓުގައި ބޮޑެތި ގޯސް އެބަހުރި ކަމަށް އިދިކޮޅުން ފާހަގަކުރެއެވެ.

އެގޮތުން އެމްޑީޕީގެ ހަރުގެ ޖަލްސާފައި އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން ވިދާޅުވީ އެމްޑީޕީގެ ފުރަތަމަ ސަރުކާރުން ފެށިގެން ވުޖޫދުކުރި، އުމުރުން ދުވަސްވީ މީހުންނަށް ދޭން ކަނޑައެޅުނު ފައިސާ، އެފައިސާ 65 އަހަރުގެ ކޮންމެ ބޭފުޅަކަށްމެ، 5000 ރުފިޔާ ދެމުން އަންނަނިކޮށް މި ސަރުކާރުން މިފަހަރުގެ ބަޖެޓް ހުށަހެޅިފައި ހުރި ގޮތުން، 5000 ރުފިޔާ ދެވޭނެ އުމުރުން ދުވަސް ވީ މީހުނަށް ދެވޭނެ މިންވަރަކަށް ނެތް ކަމަށެވެ. ނަމަވެސް 5000 ރުފިޔާގެ ބަދަލުގައި 4000 ރުފިޔާ ދެވޭނެ މިންވަރު ބަޖެޓުން ފެންނަ ކަމަށެވެ.

ބިގޭ އިތުރަށް ވިދާޅުވީ ތަކެތީގެ އަގަށް ބަދަލު އައިސްފައިވާއިރު، ބަޖެޓުން އެނގެނީ ރައްޔިތުން ހަނާވާވަރަށް ޓެކްސް ބޮޑުކުރިތަން ކަމަށާއި، އަސާސީ ބާވަތްތަކުން ސަބްސިޑީގެ ބޮޑުބައެއް އުނިކޮށްފައިވާ ކަމަށާއި، ރައްޔިތުންގެ ޖީބަށް އާމްދަނީ ނުވަންނަ ނަމަ މިއީ ރައްޔިތުންނަށް ލިބޭނެ ތަކުލީފަކަށް ވެގެންދާނެކަމަށެވެ.

ކުރީގެ ފިނޭންސް މިނިސްޓަރު އިބްރާހިމް އަމީރު ވެސް ވިދާޅުވީ  ސަރުކާރުން އަންނަ އަހަރަށް ހުށަހަޅާފައިވާ ބަޖެޓަކީ ޓެކުހާއި ހަރަދާއި ދަރަނި ވެސް ބޮޑު ބަޖެޓެއް ކަމަށެވެ.

އަމީރު ވިދާޅުވީ ބަޖެޓުގައި އެއްވެސް ޓްރާންސްޕޭރެންސީއެއް ނުވަތަ ދެފުށް ފެންނާކަށް ނެތް ކަމަށެވެ.

އެގޮތުން ހުށަހަޅާފައިވަނީ 2023 ވަނަ އަހަރަށްވުރެ ހަ ބިލިއަން ރުފިޔާގެ ބޮޑު ބަޖެޓެއް ކަމަށް އަމީރު ވިދާޅުވިއެވެ. އަދި އަހަރުގެ މެދަކާ ހަމައަށް ދާއިރު އިތުރު ސަޕްލިމެންޓްރީ ބަޖެޓެއް ހުށަހަޅާނެކަމަށް ބެލެވޭ ކަމަށް ވެސް ވިދާޅުވި އެވެ.

އެމްޑީޕީގެ ރައީސް އަބްދުﷲ ޝާހިދު ވިދާޅުވި ގޮތުގައި ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައި ވަނީ ރައްޔިތުންގެ އުންމީދުތަކުގައި ކޮޅުފައިން ޖަހާ ބަޖެޓެއް ކަމަށެވެ.

ބަޖެޓު ހުށަހެޅުއްވި އިރު ފިނޭންސް މިނިސްޓަރު މޫސާ ޒަމީރު ވިދާޅުވީ ބަޖެޓުގައި 9.4 ބިލިއަން ރުފިޔާގެ ޑެފިސިޓެއް ހުންނާނެ ކަމަށާއި އެއީ ފަހުގެ ތާރީޚުގައި އެންމެ ކުޑަކޮށް ހުށަހެޅި ޑެފިސިޓު ބަޖެޓު ކަމަށެވެ.