"އުއްމަތް ފަލަސްތީނާއި އެކު: ނަމުގައި ތ.މަޑިފުށީގައި ބޮޑު ހަރަކާތެއް މިއަދު ހަވީރު ބާއްވައިފިއެވެ.

މި ހަރަކާތަކީ ޔޫތް ފޯ ޔުނިޓީ ނަމަކަށް ކިޔާ ޖަމިއްޔާއަކުން އޮކްޓޯބަރު 25 ވަނަ ދުވަހު މާލޭގައި ކުރިއަށް ގެންދިޔަ ހަރަކާތްތަކުގެ ސިލްސިލާ ހަރަކާތެއް ކަމަށް މައުލޫމާތު ލިބިފައިވެއެވެ.

މި އެއްވުމުގައި ފަލަސްތީން މިނިވަން ކުރުމަށް ގޮވާލާ، ސަހްޔޫނީންނަކީ ޓެރަރިސްޓް ގައުމެއް ކަމަށް އެއްވުމުގެ ބައިވެރިން ވަނީ ގޮވާލާފައެވެ.

މީގެ އިތުރުން، ސަހްޔޫނީންގެ ޕާސްޕޯޓް ރާއްޖޭގައި މަނާކުރުމަށް އެއްވުމުގެ ބައިވެރިން ވަނީ އަނެއްކާވެސް ސަރުކާރަށް ހަނދާންކޮށްދީފައެވެ. އަދި އެ ގައުމަށް ވާގިވެރިވާ ގައުމުތަކުގެ ކުންފުނިތައް މިހާރުން މިހާރަށް ބޮއިކޮޓް ކުރުމަށް ވެސް ގޮވާލާފައިވާ ކަން ފާހަގަކުރެވިފައިވެއެވެ.

މިދިޔަ އަހަރުގެ އޮކްޓޫބަރު 07 ވަނަ ދުވަހުން ފެށިގެން ފަލަސްތީނާއި ދެކޮޅަށް ހިންގަމުން އަންނަ ގަތުލުއާންމުގައި މިހާތަނަށް 43،000 އަށް ވުރެ ގިނަ މީހުން ޝަހީދުވެފައިވެއެވެ.

ފަލަސްތީނާއި އަބަދުވެސް ޚާއްސަ ގާތްކަމެއް ބާއްވަމުން އަންނަ ދިވެހިން އަންނަނީ ފަލަސްތީން މިނިވަން ކުރުމަށް އެކި ޕްލެޓްފޯމްތަކުގައި ގޮވާލައި، އެ ގައުމުގެ ޕާސްޕޯޓް މަނާކުރުމަށް ހުއްޓުމެއްނެތި ސަރުކާރަށް އާދޭސް ދަންނަވަމުންނެވެ.

ނަމަވެސް، ސަރުކާރުން މި ކަމަށް އެދެވޭ ފިޔަވަޅެއް ނަގާފައި ނުވާއިރު، ފަލަސްތީނުގެ ހައްގުގައި އަޑު އުފުލަމުންދާ ފަރާތްތައް ހައްޔަރުކޮށް، އެ ފަރާތްތަކަށް ދައުވާ އުފުލަމުން އަންނަކަން ފާހަގަކުރެވިފައިވެއެވެ.