ރަޝިއާގެ ރައީސް ޕޫޓިންއާ މަޝްވަރާ ނުކުރައްވައި ދުނިޔޭގެ ތަރުތީބު ދަމަހައްޓަން ދަތިވާނެ ކަމަށް އެމެރިކާގެ ރައީސް ކަމަށް އިންތިހާބުވެވަޑައިގެންނެވި ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ވަނީ އިންތިހާބުގެ ކެމްޕޭނުގެ ތެރޭގައި ރަޝިޔާ-ޔުކްރޭން ހަނގުރާމަ އެއް ދުވަސްތެރޭ ނިމުމަކަށް ގެންނާނެ ކަމަށް ވިދާޅުވެފަ އެވެ. އަދި ސަހުޔޫނީން ފަލަސްތީނުގެ ގާޒާގައި ހިންގާ ގަތުލްއާންމު ވެސް ވީހާވެސް އަވަހަކަށް ނިމުމަކަށް ގެނައުމަށް ޓްރަމްޕް ވަނީ މިދިޔަ ޖުލައި މަހުގެ ތެރޭގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަށް ގޮވާލާފަ އެވެ.

ޓްރަމްޕް ވިދާޅުވި ގޮތުން އިންތިޚާބުގެ ކާމިޔާބަށް ފަހު ދުނިޔޭގެ 70 ވަރަކަށް ލީޑަރުންނާ މިހާތަނަށް ވާނީ ވާހަކަދައްކަވާފަ އެވެ. އޭގެ ތެރޭގައި ރަޝިއާގެ ރައީސް ހިމެނިވަޑައި ނުގަތް ނަމަވެސް، ޕޫޓިންއަށް ފޯނުކުރައްވާނެ ކަމަށް އޭނާ ވިދާޅުވި އެވެ.

ޓްރަމްޕް ވަނީ އިންތިހާބުގެ ކުރިންވެސް ޕޫޓިންއާ ބެހޭ ގޮތުން ވާހަކަދައްކަވާފަ އެވެ. ޕޫޓިން އަކީ ދުނިޔޭގެ ސިޔާސަތު ރަނގަޅަށް އެނގިވަޑައިގެން ހުންނެވި ލީޑަރެއް ކަމަށްވެސް ޕޫޓިން ވިދާޅުވި އެވެ.

ޓްރަމްޕުގެ ސިޔާސަތުތަކުގެ ސަބަބުން ގައުމުތަކުގެ ގުޅުން ހީނަރުވާނެ ކަމުގެ ކަންބޮޑުވުން ވެސް ބައެއް ބޭފުޅުން ފާޅު ކުރައްވަ އެވެ. ހާއްސަކޮށް ނޭޓޯގެ ގައުމުތަކެވެ.

އެމެރިކާގެ ރިޔާސީ އިންތިހާބު ޓްރަމްޕް ކާމިޔާބު ކުރެއްވީ ޑިމޮކްރެޓިކްސްގެ ކެންޑިޑޭޓް އަދި މިހާރުގެ ނައިބު ރައީސް ކަމަލާ ހެރިސްއާ ވާދަކޮށްގެންނެވެ.

ޓްރަމްޕުގެ ވަރުގަދަ އެނބުރި އައުމާ އެކު އެކި ގައުމުތަކުގެ ވެރިން ގެންދަނީ މަރުހަބާ ކިޔަމުންނެވެ. މިއީ އެމެރިކާގައި ފަހުގެ ތާރީހެއްގައި ޖެހިޖެހިގެން ނޫން ގޮތަކަށް ރިޔާސީ ދެވަނަ ދައުރެއް ބޭފުޅަކު ކާމިޔާބު ކުރެއްވި ފުރަތަމަ ފަހަރެވެ.

ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި މިހާރު ނައިބު ރައީސް ކަމަލާ ހެރިސްއާ ވާދަކުރައްވައި، އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރެއްވީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ.

ޓްރަމްޕް މަގާމުގެ ހުވާކުރައްވާނީ އަންނަ އަހަރުގެ ޖެނުއަރީ މަހުގެ 20 ވަނަ ދުވަހު އެވެ.