ރާއްޖޭގެ ބައެއް އަތޮޅުތަކަށް މިރޭ ވިއްސާރަ ކުރުމާއެކު ގުގުރުން އެކަށީގެންވާކަމަށް މޫސުމާއި ބެހޭ ގައުމީ އިދާރާ (މެޓް) އިން ވިދާޅުވެއްޖެއެވެ.
މިރޭގެ މޫސުން ކުރިއަށް ލަފާކޮށް މެޓް އޮފީހުން ހާމަކޮށްފައިވާ ގޮތުގައި، ދެކުނުގެ މޫސުން އާންމުގޮތެއްގައި ރަނގަޅުވާނެ ކަމަށެވެ. ނަމަވެސް މެދު ރާއްޖެ ތެރެއާ އުތުރުގެ އަތޮޅުތަކަށް ވިއްސާރެ ކުރާނެ ކަމަށެވެ.
ހުޅަނގާއި، ހުޅަނގުއުތުރުން، އުތުރުގެ އަތޮޅުތަކަށް ގަޑިއަކު 3 މޭލާއި 10 މޭލު ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭއިރު މެދު ރާއްޖެތެރެއާއި ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 7 މޭލާއި 17 މޭލު ދެމެދުގެ ބާރުމިނުގައި ވައިޖެހޭނެ ކަމަށް މެޓުން ހާމަކޮށްފައިވެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 30 މޭލު ބާރު މިނުގައި ވައިޖެހުން އެކަށީގެންވާކަމަށް މެޓުން ވަނީ ލަފާކޮށްފައެވެ.
އުތުރުގެ އަތޮޅުތަކަށް ކަނޑުތައް މަޑުވާނެ ކަމަށް ލަފާކުރެވޭއިރު އެހެން ހިސާބުތަކަށް އާދައިގެ ވަރަކަށް ކަނޑުތައް ގަދަވާނެ ކަމަށްވެއެވެ.
މެދުރާއްޖެތެރެ އާއި ދެކުނުގެ އަތޮޅުތަކުގައި ރާޅުގެ އުސްމިން އުޅޭނީ 2 ފޫޓާއި 5 ފޫޓާއި ދެމެދުގައި ހުންނާނެ ކަމަށް ލަފާކުރެވޭއިރު އުތުރުގެ ކަނޑުތަކުގެ ރާޅުގެ އުސްމިން އުޅޭނީ 1 ފޫޓާއި 3 ފޫޓާއި ދެމެދު ކަމަށް ވެސް ވަނީ ލަފާކޮށްފައެވެ.
