ސުވާލުތައް އުފެދެނީ އެއްވެސް އިހްތިޔާރެއްނެތިއެވެ. ކަންތައްތައް ވާގޮތް ފެނުމުން ހައިރާންވެ އަންތަރީސްވެސް ވެއްޖެއެވެ. ނަމަވެސް ހައިރާންވެފައި އެވާހަކައެއް ދައްކާ މީހަކު ވަނީ އަބަދުވެސް ގޯހެވެ. ގޯސްވިޔަސް ހެޔޮކަމަށް އަޅުގަނޑުގެ ހިތުގައި އުފެދިފައިވާ ސުވާލުތައް ބަންޑުންކޮށްލާނަމެވެ.

ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރާ އަވަށްޓެރި ގައުމު އިންޑިޔާ އާއި ވަރަށް ގާތެވެ. ގައުމުގައި ވެރިކަންކުރި އެހެން ވެރިންވެސް އިންޑިޔާ އާއި ނުވާހާ ގާތެވެ. ސިއްރު އެއްބަސްވުންތައް އެކުލަވާލާ ރާއްޖޭގެ ހާރިޖީ ސިޔާސަތައް އަތްބޭނުމުގެ ފުރުސަތުވެސް އެ ގައުމުގެ ސިފައިންނަށް ދިނެވެ. މައްސަލަ ހޫނު ވީ އެހިސާބުންނެވެ. އިދިކޮޅުގައި އޮވެ، އެމަންޒަރު ބަލަން ރައީސް އަބްދުﷲ ޔާމީން އަބްދުލްގައްޔޫމަށް ކެތެއްނުކުރެވުނެވެ. "އެންމެ ފުރަތަމަ ޤައުމު" މިފަދައިން ވިދާޅުވެ އެމަނިކުފާނު ފެއްޓެވީ "އިންޑިޔާ އައުޓް" ނަމުގައި ވަރުގަދަ ކެމްޕެއިނެކެވެ. "އިންޑިޔާ އައުޓް" ކިޔައިން ކެމްޕެއިން ކުރައްވަން އެމަނިކުފާނަށް މަޖްބޫރުވީ އެ ގައުމުގެ ސިފައިން ހަތިޔާރާ އެކު އައިސް ރާއްޖޭގެ އެކި ކަންކޮޅުތަކުގައި ތިބުމުންނެވެ. މި ސުވާލުތައް މީހުން ސަރުކާރަށް އަމާޒު ކުރަން ފެށުމުން ސަރުކާރުން ފުރަތަމަ ހެދީ ދޮގެވެ. އޭރުގެ ޑިފެންސް މިނިސްޓަރ މާރިޔާ ދީދީ ވިދާޅުވީ " އިންޑިޔާގެ ސިފައިންނޭ؟ މިގައުމުގައޭ؟ ނުތިބޭނެ!" މިފަދައިންނެވެ.

ނަމަވެސް މީހުންގެ ލޮލަށް ސިފައިން ފެނުމުން ދެން މާރިޔާ ވިދާޅުވީ އެއީ ޑޯނިޔާ ދުއްވާ ބައެއްކަމަށެވެ. އެހެންވިޔަސް ކީއްވެގެންތޯ އޭ ހަތިޔާރު ހިފައިން ތިބެނީ؟ ދެން އުފެދުނު ސުވާލަކީ ތިބީ ކިތައް ސިފައިންތޯއެވެ. އެ ސަރުކާރުންވެސް އެ ސުވާލަކަށް ޖަވާބެއް ނުދިނެވެ. އިންޑިޔާ އައުޓް ސްލޯގަން ބޭނުންކުރާތީ އަވަށްޓެރި ގައުމާ އޮތް ސިއްރު ގުޅުން ހީނަރުވެދާނެތީ އެ ސްލޯގަން ބޭނުންކުރަން މަނާކޮށް ގަރާރެއް ނެރުނެވެ. "ބޭގަރާރު" ގެ ނަމުގައި މަޝްހޫރު އެ ގަރާރް ބާތިލް ކުރުމަށް އަދުގެ ސަރުކާރުގެ އިސް ފަޑީގައި ތިއްބެވި ބޭފުޅުން އިދިކޮޅުގައި އޮވެ ގޮވި އަޑު އަދިވެސް ކަންފަތުގައި ގުގުމާލައެވެ.

މޭމަތީ އިންޑިޔާ އައުޓް ޖައްސަވާފައިހުރި ޓީޝާޓްތަކެއް ތުރުކުރައްވައިގެން ގޮވަމުން ދިޔައީ، ވެރިކަން ލިބުމޭ ލަސްވާނީ، އިންޑިޔާގެ ސިފައިންނެއް ނުތިބެނޭކަމަށެވެ. އިންތިޚާބަށް ކެމްޕެއިން ކުރެއްވި އިރުގައި އަޑުހަރުކޮށް ވިދާޅުވަމުންދިޔައީ"އިންޑިޔާ ސިފައިން ބާލާނަމޭ". ވެރިކަންވެސް ލިބިއްޖެއެވެ. ހުރިހާ ބާރެއްވެސް ލިބިއްޖެއެވެ. ވެރިކަމުގެ 2 މަސް ފާއިތުވެއްޖެއެވެ. އެކުލަވާލި ވައުދުފޮތުގައި ސިފައިން ބޭލުމުގެ މަސައްކަތް ފައްޓަވާނެކަމަށް ފާހަގަކުރެއްވި ނަމަވެސް އޭރުގައި ވިދާޅުވީ ބާލުވާނެކަމަށެވެ. ސުވާލުތައް އުފެދެން ފެށިފަހުން ދެން ބުނަމުން އައީ މިހާރު ބޭލުމުގެ މަސައްކަތް ފެށި އެގައުމުން ވެސް އެކަމާ އެއްބަސްވެފައިވާކަމަށެވެ. ދެން އަޅުގަނޑުގެ ހިޔާލަށް އައީ އެއްދުވަހަކު ރައީސް މުއިއްޒު ކެމްޕެއިން ޖަލްސާއެއްގައި ވިދާޅުވި ބަސްކޮޅެކެވެ."އިންޑިޔާ ސިފައިންގެ އަދަދު ހާމަކުރާނަމެވެ. ހަދާ ކޮންމެ އެއްބަސްވުމެއް ރައްޔިތުންނަށް ފެންނާނެ" މިފަދައިންނެވެ.

އިންޑިޔާ ސިފައިން ބޭލުމުގެ ވާހަކަތައް ރައީސް އޮފީހުގެ ޕްރެސްތަކުގައި ފާހަގަކުރެއްވުމުން އަޅުގަނޑުމެން ކަހަލަ ނޫސްވެރިންތައް ގޮވަން ފެށީ ސިފައިންގެ އަދަދު ހާމަކުރުމަށެވެ. ޖަވާބުގައި ސަރުކާރުން ބުނީ އަދަދު މުހިންމު ނޫންކަމަށެވެ. ސިފައިން ބާލާނެކަމަށެވެ. އެކަމާ ހާސްނުވުމަށެވެ. އަޖައިބެއްނުވާނެ ނޫންހެއްޔެވެ؟ އޭރުގައި ވާހަކަ ދެއްކެވޮގޮތައް ކުޑަ ބަދަލެއް އައިސްފިއެވެ.

ދެން ބުނަމުން ދިޔައީ މާޗް މަހުގެ 15 ގެ ކުރިން އެ ސިފައިން އެ ގައުމަށް އެނބުރި ދާނެކަމަށެވެ. އަނެއްކާ ފެބްރުއަރީ 2 ވަނަ ދުވަހު މިވަނީ ތާރިހް ބަދަލުކޮށްލާފައެވެ. މިއީ ކުޅޭ ކުޅިވަރެއް ކަންނޭގެއެވެ. ކުޅިވަރަށް ކިޔާނަން ސާފުނުވާކަމެވެ. މިހާރު އަނެއްކާ ތާރިހް ބަދަލުކޮށްފައި މިވަނީ މެއި މަހުގެ 15 އަށެވެ. މިހާވަރުން މި ސިފައިން ބޭލޭނެބާއޭ އަޅުގަނޑުގެ ހިތައް އަރައެވެ.