މަގުމަތީގައި ދިރިއުޅޭ ބުޅާތަކަށް ޚާއްސަކޮށް، 24ގަޑިއިރުގެ ޚިދުމަތާ އެކު ސަރުކާރުން ގާއިމްކުރި ޕެޓް ކެއާ ފެސިލިޓީއެއް ގާއިމުކުރެވުނު ވެރިކަމަށް އަހަރެއް ވެގެން ދިޔަ އިރު އާންމު ރައްޔިތު މީހާ އަދިވެސް ވަނީ މަގުމަތިވެފައެވެ.
މިދިޔަ ސަރުކާރުގައި ޝަރުތު ހަމަވެ ލިޔުންދީ އެގްރީމެންޓް ހަދައިފައިވާ ތަންތަން މައްސަލަ އުޅޭ ކަމަށް ބުނެ މި ސަރުކާރުން އަންނަނީ އެތަންތަން ހައްގުވާ ފަރާތްތަކަށް ނުދީ ސަރުކާރުގެ ވެރިންގެ އަރިސް މީހުންނަށް ދިނުމަށް މަސައްކަތް ކުރަމުންނެވެ.
ގެދޮރުވެރިކަމުގެ މަޝްރޫއު އަކީ ބޯހިޔާވަހި ކަމަށް ދަތިވެފައިވާ ފަރާތްތަކަށް އިސްކަން ދީގެން ދިނުމަށް ހަމަޖެހިފައިވާ ސްކީމަކަށް ވާއިރު މި ސަރުކާރުން އަންނަނީ އެ ހައްގު ވެސް އާންމުންގެ ފަރާތުން ނިގުޅައިގަންނަމުންނެވެ.
މަގުމަތީގައި އުޅޭ ބުޅާތަކަށް ހިޔާވަހިކަން ކުޑަ ދުވަސްކޮޅެއްގެ ތެރޭގައި ހަމަޖައްސަވައިދެއްވުނުއިރު، ނިމިފައި ހުރި ފްލެޓްތައް ނުދީ ސަރުކާރުން ވަނީ އަހަރެއް ދުއްވާލާފައެވެ.
ފްލެޓް މައްސަލައިގައި އާންމުންގެ ނުރުހުން ސަރުކާރަށް އަމާޒުވެފައިވާއިރު، މި މައްސަލަ ވީ އެންމެ އަވަހަށް ހައްލުކޮށްދެއްވާ އިންސާފުވެރިކަމާއި އެކު ކުރިއަށް ގެންދިޔުމަށް ރައީސް އަބްދުﷲ ޔާމީން އަބްދުލްގައްޔޫމް ވަނީ ގޮވާލާ، ސަރުކާރު ޒިންމާދާރު ކުރުވުމަށް ބުރަ މަސައްކަތް ކުރައްވަމުންކަން ފާހަގަކުރެވެއެވެ.
އާންމުންނާއި އިދިކޮޅުގެ ޝަކުވާތައް އިތުރުވެ. ފްލެޓް ލިސްޓް އާންމުކުރުން "އަންނަ ހަފްތާ" އަށް ތާވަލުކޮށްފައިވާ ކަން ފާހަގަކުރެވިފައިވެއެވެ.
