ދިވެހިރާއްޖެއަށް އިސްލާމް ދީން ތައާރަފުވެގެން ގޮސްފައިވަނީ އަރަބި ދަތުރުވެރިންގެ ފަރާތުންކަން ތާރީޚީ ގޮތުން އެނގެން އޮވެއެވެ. އެގޮތުން ދިވެހިންގެ އެންމެ އަގު ބޮޑު މުދަލަކީ އަހަރުމެން މީގެ 900 އެތައް އަހަރެއް ކުރިން ގަބޫލުކުރި މާތްވެގެން އިސްލާމު ދީނެވެ. އިސްލާމު ދީނު މިބިން މަތިން ފޮހެލާ ގައުމު ހަފުސްކުރަން އައި ހަމަލާތައް ވެސް މަދެއް ނޫނެވެ.

ނަމަވެސް އެކަންކަމާ ދެކޮޅަށް ކާބަފައިން ކުރި ހަނގުރާމަތަކާ ވީ ގުރުބާނީއެކު އަހަރުމެންގެ ޖީލުތަކާ ހަމައަށް ދުނިޔޭގެ އެންމެ މާތްކަން އައިސްފައިވާއިރު އެ މާތްކަން ދަމަހައްޓާ އެ ނޫރު ލެހެއްޓުމަށްޓަކައި ކުރެވެން ހުރި ހުރިހާ ކަމެއް ކުރަން ޖެހޭނެއެވެ. އެކަމުގެ ޒިންމާ އެންމެ ބޮޑީ އޭރެއްގައި ތިބޭ ވެރިންނަށެވެ.

މި ވާހަކަ މިހެން ދައްކަން ފެށުމުން ޔަގީނުންވެސް ކިޔުންތެރިން ހިތަށް އަރާނެ ސުވާލަކީ މީނާ މިއުޅެނީ ކޮން ވާހަކައެއް ދައްކަން ބާއޭ އެވެ. ތިޔަ ސުވާލުގެ ޖަވާބު މި ރިޕޯޓު މަޑު މަޑުން ކިޔަމުން ކުރިއަށްދާ މިންވަރަކުން ހާމަވާނެއެވެ.

އިސްލާމީ އުސޫލުތަކާ ހަމަތަކުގެ މަތީގައި ހިފައިގެން ތިބި ދިވެހިންނަށް އެންމެ ފާޅުކަން ބޮޑު ގޮތެއްގައި ދީނަށް ގޮން ޖެހި މަންޒަރު މިފަހަކުން ފެނިގެން ދިޔައީ ނިމިދިޔަ ސަރުކާރުގެ ތެރޭގައެވެ. އެ ސަރުކާރުގެ އިސްވެރިންގެ ހިއްސާ އޮންނަ ޖަމްއިއްޔާއަކުން އެކަން ކުރިއިރު މުޅި ދައުރު ނިންމާލީ އޭގެ ތެރެއިން ގިނަ މީހުންނަށް އަހަރުމެންގެ ޓެކްސް ފައިސާއިން މުސާރަ ދިނުމުގައެވެ. އެމްޑީއެންގެ ވާހަކައަކި ތިޔައިގެ ތެރެއިން އެންމެންވެސް ދަންނާނެ އިވި ފަރިތަ ވާހަކައެއްކަން ޔަގީނެވެ. އެ ޖަމްއިއްޔާ ކަރުދާހުން އުވާލި ނަމަވެސް ޖަމްއިއްޔާގެ މަސްއޫލުވެރިންނާ މެދު އެއްވެސް ފިޔަވަޅެއް އަދި މިހާތަނަށް އައި އިރުވެސް އަޅާފައިނުވެއެވެ. މިދިޔަ ސަރުކާރުގައި އެކަން ނުކޮށްގެން ދެ ފަހަޔަށް ހިނި އަރައިގެން އުޅުނު މީހުން ވެރިކަމަށް އައިސް އެއް އަހަރާ ގާތްވެފައިވާއިރު ވެސް އެކަން އޮތީ ހަމަ އެހެންނެވެ.

ކޮންމެ އަކަސް މިއުޅޭނީ އެވާހަކަ ދައްކާކަށް ނޫނެވެ. މިއުޅެނީ އެ ފަދަ ކަންކަމާ ދެކޮަޅަށް އަޑު އުފުލާ، މި ގައުމުގައި އިސްލާމު ދީން ދެމި އޮންނާނީ ތިމަންނާމެންގެ ވެރިކަމެއް އައިސްގެންކަމަށް ބުނެ އަޑު ގަދަ ކުރި ޕީއެންސީގެ ވެރިންގެ ވެރިކަމުގައި ކުރަމުންދާ ދެކޮޅު ނުޖެހޭ ދީނާ ގުޅުން ހުރި ކަމެއްގެ ވާހަކަ ދައްކަންށެވެ.

އެގޮތުން ރާއްޖޭގެ އަންހެނަކު ދުނިޔޭގެ ރީތީގެ ރާނީ ހޮވާ މުބާރާތެއްގައި ރާއްޖެ ތަމްސީލުކުރަން ބައިވެރިވާނެކަން ހާމަކުރުމާ އެކު ސަރުކާރާ ބައިވެރިންނަށް އެއީ ވަރަށް ބޮޑުކަމަށްވެގެން އެއީ އިސްލާމްދީނުގައި ހަރާމް ކަންކަންކަމަށާ ހަށިގަޑުގެ ވަނާތައް ދައްކައިގެން އައުރަ ކަޝްފުކުރުމަކީ އެއް ގޮތަށް ވެސް ސައްތަ ސައްތައިން އިސްލާމީ ގައުމަކަށްވެ ރާއްޖެއިން ކޮށްގެންވާނެކަމެއް ނޫން ކަަމަށް ބުނަމުންދިޔައެވެ. އަދިވެސް އެ ވާހަކަ ދައްކާ މިންވަރު މަދެއް ނޫނެވެ. އެންމެ ފަހުން އެކަމާ ދެކޮޅަށް ގައުމުގެ ވަލިއްޔުލް އަމުރުވެސް ބަސްފުޅު ވިދާޅުވިއެވެ. ގުރުއާނުން ދަލީލު ދައްކަވާ ރައީސް މުހައްމަދު މުއިއްޒު ޓްވީޓުކުރައްވާ ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ޤައުމަށް ލިބޭނެ ޙަޤީޤީ ރީތި ނަމެއް، އުފަލެއް، ކާމިޔާބީއެއް ނެތް ކަމަށް ވިދާޅުވިއެވެ.

ތެދު ހަގީގަތެވެ. ނަމަވެސް އެއީވެސް ކުޅުއްވި ޑްރާމާއެކޭ ބުނެވޭނެ ފަދަ މަންޒަރު ފެނިއްޖެއެވެ. މި ވާހަކަ މި ދައްކަނި ހިތާމަޔާއެކުއެވެ. ގައުމުގެ ވަލިއްޔުލްއަމުރަކީ ދެފުށަށް ކެނޑޭ ތާކުން ތާކު ނުޖެހޭ މީހަކަށް ވެގެން ނުވާނެއެވެ. ބަހެއް ބުނެފި ނަމަ އެ ބަހުގައި ހިފަން އެނގެން ޖެހޭނެއެވެ. އެހެންކަމުން އެ ޓްވީޓު އެގޮތަށް ކުރެއްވިއިރު އެ ފަދަ މުންކަރާތްތަކަށް އެމަނިކުފާނުގެ ޒައާމަތެއްގައި ޖާގަވެސް ދެއްވައިގެން ނުވާނެއެވެ.

ނަމަވެސް ކަންވީ ކިހިނަކުންކަން ތިޔަ ބޭފުޅުންނަށް އެނގިވަޑައިގަންނަވާތޯއެވެ؟ ދުނިޔޭގެ 15 ވަނަ ބޮޑީ ބިލްޑިން މުބާރާތް މިފަހަރު ބޭއްވީ މި ރާއްޖޭގައެވެ. އައުރަ ކަޝްފުވާތީ މިސް ވޯލްޑުގައި ރާއްޖެ ތަމްސީލުކޮށް ނުވާނެ ކަމަށް ވަކާލާތު ކުރި ސަރުކާރުން ހުއްދަދީގެން އައްޑޫ ސިޓީގައި ބޭއްވި އެ މުބާރާތުގައި ބައިވެރިން ތިބި ހާލު މިހާރު ޔަގީނުންވެސް ތިޔަ ހުރިހާ ރައްޔިތުންނަށްވާނީ ފެނިގެން ގޮސްފައިކަން ޔަގީނެވެ.

އެ މީހުން ތިބީ އައުރަ ނިވާކޮށް އިސްލާމީ ރީތި އުސޫލުތަކުގެ ތެރެއިން ހެނދުން އަޅައިގެންތޯއެވެ؟ ނޫނެކެވެ. އޭގެ ތެރެއިން އަންހެނުން ތިބީ ދެ ފޮތިކޮޅުގެ އެހީގައެވެ. ފިރިހެނުން ތިބި އެއް ފޮތުގެ އެހީގައެވެ. ހަށިގަނޑުގެ ބާކީ ބައި އޮތީ ހާމައަށް އެންމެންނަށް ފެންނަންށެވެ. މަންޒަރުތައް ދިޔައީ ޓީވީތަކުން ފެންނަމުންނެވެ. އޭގެ ތެރޭގައި ދިވެހި ފިރިހެނުން ވެސް ތިއްބެވެ. މުބާރާތް ފެށީ އަޅުގަޑުމެން މުސްލިމުން އެ ފޮތަކަށް އެންމެ އިހުތިރާމު ކުރާ އެންމެ ލޯބިވާ ﷲގެ ކަލާމްފުޅު، ކީރިތި ގުރުއާނުގެ މޫރިތި އާޔަތްތަކުންނެވެ.

މިހާ ހިސާބުން ރުޅި ވެސް އައެވެ. ހިތަށް އެރިއެވެ. "އިޒް ދިސް ދަ ބިގެސްޓް ޖޯކު އޮފް ދަ ސެންޗަރީ" (މިއި ގަރުނުގެ ބޮޑު ޖޯކު)ބާއެވެ. އެހެނީ ގުރުއާނުގެ ހުރުމަތް ކަނޑާ "އޮރިޔާން" ހާލުގައި ތިބި ބަޔަކު ޕްރޮމޯޓުކުރުމުންނެވެ. މިހާ ހިސާބުން ދެން ހިތަށް އެރި އެހެން ވާހަކައެއް އެބަ އަދި އޮތެވެ. ސްޕޯޓްސް މިނިސްޓްރީއިން މިފަހަރު ނެރޭނެ ބަޔާނެއް ހަމަ ނެތީބާއެވެ؟ ނޫނީ ރައީސުލްޖުމްހޫރިއްޔާގެ ޓްވީޓު ޑްރާފްޓު ކޮށްދެއްވާ ބޭފުޅާ މިފަހަރު ކޮބައިބާއެވެ؟

ކޮންމެ އަކަސް އަންހެނަކު ކުރިޔަސް ފިރިހެނަކު ކުރިޔަސް އައުރަ ކަޝްފުކޮށްގެން ކުރާކަމުން ކާމިޔާބު ނުލިބޭނެއިރު އަންހެނަކު ކުރިޔަސް ފިރިހެނަކު ކުރިޔަސް އަދި ގައުމީ ވިޔަސް ބައިނަލްއަގްވާމީ ވިޔަސް ގޯސް ވާނީ ގޯހަށް ކަމަށްވީ ހިނދު މި ފަހަރު ރައީސުލްޖުމްހޫރިއްޔާގެ ބަސްފުޅެއް ނެތުމަކީ ބޮޑީ ބިލްޑިން މުބާރާތަކީ ދިވެހި ސަރުކާރުގެ ފުރިހަމަ އެއްބާރުލުމާ އެކު ކުރިއަށް ގެންދިޔަ އައުރަ ކަޝްފުކުރުމުގެ މުބާރާތެއްކަން ޔަގީންވުމުގެ ހިމޭން ޖަވާބެވެ.

ކީރިތި ގުރުއާނުގެ މޫރިތި އާޔަތްތަކުން ޓްވީޓުކުރައްވާ ދަލީލު ދެއްކެވުމަށް ފަހު އަނެއްކާވެސް ރައީސް މުއިއްޒު ގޮއްވާލީ އަތަށެވެ. ފަތިސް ނަމާދުން ދުވަސް ފަށާކަން ޕްރޮމޯޓުކުރުވާ ދީނީ ތާކިހަލުގެ ހިޔަނީގައި ހުންނެވިޔަސް އަދި ކަމަކު ނުދާނެއެވެ. ދަމު ނަމާދާ ދެ ޙަރަމްފުޅުގައި ނަމާދުކުރުމަކުންވެސް އަދި ނުފުދޭނެއެވެ. މުންކަރާތްތައް މަނާކުރުމުގައި ޓްވީޓުކުރުމަކުންވެސް ނުފުދޭނެއެވެ. އަމަލުންވެސް އެކަން ކަން ދައްކަވާށެވެ.