ރައީސުލްޖުމްހޫރިއްޔާ ޑރ މުހައްމަދު މުއިއްޒުވެސް އެ ވެރިކަމެއްގައި ހިމެނިވަޑައިގެންނެވި، ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމަކީ އެ ޒައާމަތުގައި މުއިއްޒުގެވެސް ހިއްސާ އޮތް ސަރުކާރެކެވެ. އެ ސަރުކާރުގެ ހައުސިންގ މިނިސްޓަރުގެ މަގާމު އަދާކުރައްވާ މުއިއްޒު ވަނީ ޕީޕީއެމްގެ އިސް ސަފުގައި އޭރު މަސައްކަތް ކޮށް ރައީސް ޔާމީނަށް ވަފާތެރި މީހެއްގެ ގޮތުގައި  ދައްކަން މަސައްކަތްކޮށްފައެވެ.

ނަމަވެސް ސިޔާސީ ބޭނުމަށްޓަކައި ނުހައްގު ދައުވާތަކެއް އެމަނިކުފާނު ބޮލުގައި އެޅުއްވުމަށްފަހު ޖަލަށް ލި ހިސާބުން މުއިއްޒު ވަނީ އޭނާގެ "އަސްލު ސޫރަ" ދައްކާލާފައެވެ. އޭރުވެސް ވެރިކަމަށް ދަހިވެތިވެ ވަޑައިގެން ހުންނެވި މުއިއްޒު ވަނީ ދަނޑިވަޅުގެ ބޭނުން ހިފާ ދިވެހިރާއްޖޭގެ ވެރިކަމަށް އައުމަށް ދުރާލާ ތައްޔާރުވާން ފަށާފައެވެ.

ޕިޕީއެމް ތެރެއިން ވަކި "ގްރޫޕް" އެއް ހަދާ އޭރުގެ އެމްޑީޕީ ސަރުކާރާއި މަޝްވަރާކޮށް އެމަނިކުފާނަށް 2023 ވަނަ އަހަރުގެ ރިޔާސީ އިންތިޚާބުގައި ބައިވެރިވުމުގެ ހުރިހާ ދޮރެއް ބަންދުކުރުމަށް ދިޔައީ ހޭބޯނާރާ މަސައްކަތް ކުރައްވަމުންނެވެ. އެންމެފަހުން ރައީސް ޔާމީން "އެންޑޯޒް ކުރެއްވި ކެންޑިޑޭޓްގެ" ލަގަބު އަމިއްލަފުޅަށް ދީ އެމަނިކުފާނުގެ ފޮޓޯފުޅު ދައްކަވައިގެން ވެރިކަމަށް އައިސް ކަންތައް ކުރެއްވި ގޮތް "ޖަޖް" ކުރުމަށް ތިޔަ ބޭފުޅުންނަށް ދޫކޮށްލާނަމެވެ.

ރައީސް ޔާމީން މިނިވަން ކުރުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށާއި އެމަނިކުފާނު ގެއަށް ގެންދަވާނީ މުއިއްޒު އާއި އެކު ހިންގަވާފައި ކަމަށް ބުނި ބުނުން މިހާރު ހަނދާންވެސް ނުހުންނާނެކަން ގައިމެވެ. ރައީސް ޔާމީން މިނިވަން ކުރައްވާނެ ކަމުގެ ފޮނި އުއްމީދުގައި ދިވެހިން މުއިއްޒަށް ވޯޓުދީ ވެރިކަމުގެ ތަޚުތައް ރެނދަލި ކުރީ އެއްވެސް ހާލެއްގައި މުއިއްޒު އޭރު ކީހާ ޅެންތައް ފަރިއްސަށް ވާނެ ކަމަކަށް ނޫނެވެ.

އެހެންނަމަވެސް، ވެރިކަމުގެ ބާރު ލިބިވަޑައިގަތުމާއި އެކު އެމަނިކުފާނަށް ފެން ކައްކާ ބޮލީގެ އިއްޒަށް އަރުވާ، ފާޅުގައި ރައީސް ޔާމީނަށް ފާޑު ކިޔާ މަލާމާތް ކުރައްވަމުންނެވެ. މިގޮތުން ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން އެ ވެރިކަމެއްގައި މުއިއްޒުގެ ހިއްސާވެސް އޮތް ސަރުކާރަށް ނުސީދާކޮށް ބަސްބުނެފައެވެ. ރައީސް ޔާމީންގެ ވެރިކަމުގައި ސިޔާސީ ގޮތުން ބަދަލު ހިފުމަށް އަނިޔާވެރިކަމާއެކު އެމަނިކުފާނު މަސައްކަތް ކުރެއްވި ކަމަށް ތުހުމަތުކޮށް ވާހަކަފުޅު ދެއްކެވީ ކޮން މަގުސަދެއް ހާސިލުކުރުމަށްތޯ ގިނަ ބަޔަކު އަންނަނީ ސުވާލު އުފައްދަވަމުންނެވެ. ފަހަރެއްގައި މުއިއްޒަށް ވުރެ ރައީސް ޔާމީނަށް އަދިވެސް ދިވެހި ރައްޔިތުން ކުރާ ތާއީދާއި އޮތް ލޯބި ފެނި ހަޖަމް ނުވަނީ ކަމަށްވެސް ވެދާނެއެވެ.

"ކުށްކޮށްގެން އޮންނަ ޕްރޮސީޖާގެ ތެރެއިން ކަމާބެހޭ ފަރާތްތަކުން، [އޮންނަ] އުސޫލުގެ ތެރެއިން ނޫނީ ނެތް އެއްވެސް ފަރާތަކަށް ފިޔަވަޅެއް އަޅާފައެއް. އެ ފިޔަވަޅު އެޅިގެން ދިޔަ ފަރާތްތަކާއި އެފަރާތްތަކާ ގުޅިފައި ހުރި ފަރާތްތަކުން އެ ވާހަކަ ދައްކާ. ދެއްކިޔަސް ހަމަ ބެއްލެވީމާ ފެނިވަޑައިގަންނަވާނީ ހަމަ އިޖުރާއަތްތަކުގެ ތެރެއިން ގާނޫނީ ހަމަތަކުގެ މަތިން ގާނޫނީ ވެރިކަމެއް ކުރެއްވީ،" މިއީ އޭރު ރައީސް ޔާމީނަށް ސަނާ ކިޔާ މުއިއްޒު ދެއްކެވި ވާހަކައެވެ. އާރާއި ބާރު ލިބުމުން ތިމާ މީހާ މީހަކަށް ހަދައިދިން މީހާ މަތިން ހަނދާން ނައްތާލުމަކީ ދުނިޔޭގެ އުސޫލެވެ. ލޯފަން މީހާ ލޮލަށް ފެނުމުން އެންމެ ފުރަތަމަވެސް އެއްލާލަނީ އޭނާ ގެންގުޅުނު އަސާގަނޑެވެ. މުއިއްޒަށްވެސް މީ އެކަހަލަ ގޮތެކެވެ.

ފާއިތުވެގެން ދިޔަ އަހަރުތަކުގައި ރައީސް ޔާމީންގެ މައްޗަށް އިއްވާފައިވަނީ ނުހައްގު ހުކުމެއް ކަމަށް ރައީސް މުއިއްޒު ހިމެނޭހެން ޕީއެންސީގެ މިހާރުގެ އިސްވެރިން ހުއްޓުމެއް ނެތި ކަރުން އޮހޮރޭ ހާލު ބުނަމުން ދިޔަ އިރު މިހާރު އެމަނިކުފާނުގެ އެކައުންޓަށް ޖަމާވެފައިވާ ކަމަށް ބުނާ ފައިސާ އާއި ގުޅޭގޮތުން ސުވާލު އުފައްދަވައި ކޮރަޕްޝަންގެ ތުހުމަތު އަމާޒުވާ މޭރުމުން ތަކުރާރުކޮށް ވާހަކަދައްކަވަމުން ގެންދަވަނީ މުއިއްޒު ކިތައް ބައި ލައްކަ ދީގެންތޯ ސުވާލު އުފެދެއެވެ.

މީހުންގެ ގޮތް އެނގޭނީ އެއް އޮޑިން ދަތުރުކޮށްލީމައެވެ. އެހެންނޫންތޯ؟ ރައީސް ޔާމީން ވަރެއް ނެތިގެން އެމަނިކުފާނަށް ސަނާ ކިޔާ އުޅުނު މިހާރުގެ ރައީސް މުއިއްޒު ކުރިން ބުނި އެތި ކެންސަލް ކޮށް އެމަނިކުފާނު ވެރިކަން ކުރެއްވީ ގާނޫނާއި ޚިލާފަށް ކަމަށް ބުނެ އަނެއްކާވެސް އެ އެޅުއްވީ ބޮޑު ތުހުމަތެކެވެ.