ރައީސް ޑރ މުހައްމަދު މުއިއްޒުގެ ލެގަސީއަކީ ދިވެހި ގައުމަށާއި ރައީސް އަބްދުﷲ ޔާމީނަށް ވި ވަޢުދުތަކަށް ޣައްދާރުވުންކަމަށް ވިދާޅުވެ ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ފާޑުވިދާޅުވެއްޖެއެވެ.

ޑރ ޖަމީލު މިފަދަ ފާޑުކިޔުމެއް މި އަމާޒުކުރެއްވީ ޖުމްހޫރީދުވަހުގެ މުނާސަބާގައި ބޭއްވި ޖަލްސާގައި ރައީސް މުއިއްޒު އަމިއްލަފުޅަށް މެޑަލް ޖައްސަވާފައިވަނިކޮށް، އެކްސްގައި ކުރެއްވި ޕޯސްޓެއްގައެވެ.

ޑރ ޖަމީލު ވިދާޅުވީ، ރައީސް މުއިއްޒަކީ ކާންދޭ އަތުގައި ދަތްއަޅާ ފަދަ މީހެއްކަމަށެވެ. ޖަނަވާރުވެސް އެސޮރުމެން ގެންގުޅޭ މީހާ ދަންނައިރު އެވަރުވެސް ރައީސް މުއިއްޒަށް ނުވިކަމީ ސީރަތާއި އަޚްލާގު ނުބައި ކަމުގެ ހެއްކެއް ކަމަށް ވިދޅާުވެ ޑރ. ޖަމީލު ވަނީ ވަރަށް ބޮޑަށް ފާދުވިދާޅުވެފައެވެ.

ޑރ ޖަމީލު އިތުރަށް ވިދާޅުވީ، ރައީސް މުއިއްޒުގެ ބައްޕާފުޅު ދުނިޔޭގައި ހުންނެވިނަމަ މިއަދު ރައީސް މުއިއްޒުގެ އަޚްލާގާއިމެދު ހިތާމަކުރައްވާނެ ކަމަށާ ވެރިކަމުގެ 1 އަހަރުން ގައުމަށް ދަސްވީ ޚިޔާނާތްތެރި، މަކަރުވެރިކަމާ އިންތިހާއަށް ދޮގު ހެދުމާ އަނިޔާވެރިކަން ކަމަށްވެސް ޑރ ޖަމީލު ވިދާޅުވިއެވެ.

މީގެ އިތުރުން ރައީސް މުއިއްޒުގެ އަމަލުފުޅު ބައްޓަން ކުރައްވަމުން ގެންދަވާ ގޮތާމެދު ވަރަށް ބޮޑަށް ނުރުހުން ފާޅުކުރައްވާ ޑރ ޖަމީލުގެ ޕޯސްޓުގައި ވިދާޅުވެފައިވަނީ، އެ މަނިކުފާނުގެ ލެގަސީއަކީ ދިވެހި ގައުމަށާއި ރައީސް ޔާމީނަށް ވި ވަޢުދުތަކަށް ޢައްދާރުވުން ކަމަށެވެ. އަދި ރައީސް މުއިއްްޒުގެ ކޮންމެ ވާހަކައެއް މިހާރު ދިވެހިން ދެކެނީ ކަނޑުގައި އަޅާ ރޮނގެއް ފަދައިން ކަމަށް ވެސް ޑރ ޖަމީލު ވަނީ ވިދާޅުވެފައެވެ

ހަމައެހެންމެ ރައީސް މުއިއްޒުގެ ކަންކަން ހުރި ގޮތުން މިއަދު އެމަނިކުފާނުގެ އަގު ރައްޔިތުން ކުރިމަތީ ކެނޑިއްޖެކަން ޙާމަކުރައްވާ ޑރ ޖަމީލު ވިދާޅުވީ ރައީސް މުއިއްޒުގެ އޮފް ކެނޑިއްޖެކަމަށެވެ. އަދި "ކައްޒާބު" އެއީ އެ މަނިކުފާނަށް ޙައްގު ލަގަބު ކަމަށްވެސް ޑރ. ޖަމީލު ވިދާޅުވެފައިވެއެވެ.

ޕޯސްޓު ނިންމަވާލައްވަމުން ޑރ ޖަމީލު ވަނީ މިއަދު ރައީސް މުއިއްޒުގެ ވެރިކަން ނިމޭތޯ ރެއާއި ދުވާލު ދުޢާ ކުރާ ރައްޔިތުން ގިނަކަން ފާހަގަކުރައްވާފައެވެ. އަދި ވަނީ އެ މަނިކުފާނުގެ ޙީލަތްތެރި، އަނިޔާވެރިކަމުން ދިވެހި ގައުމު ސަލާމަތްކަން ﷲގެ އިރާދަފުޅުން ހޯދާނެކަމަށް ވިދާޅުވެފައެވެ.