ސަހްޔޫނީ ރައްޔިތުން ރައްޖެއަށް އެތެރެވުން މަނާ ކުރުމަށް އިމިގްރޭޝަން ގާނޫނަށް އިދިކޮޅު އެމްޑީޕީގެ ފަރާތުން ހުށަހެޅި ބިލުގެ މަސައްކަތް އަންނަ އަހަރު ފެބްރުއަރީގައި ނިންމުމަށް އެ ބިލު ދިރާސާ ކުރާ މަޖިލީހުގެ ސަލާމަތީ ހިދުމަތްތަކާ ބެހޭ 241 ކޮމިޓީން މިއަދު ފާސްކޮށްފިއެވެ.

މިއަދު ކޮމިޓީއަށް އެ ހުށަހެޅުން ހުށަހެޅުއްވީ ތުޅާދޫ ދާއިރާގެ މެންބަރު އަބްދުލް ހަންނާނެވެ. ހުށަހެޅުމަށް ތާއީދުކުރެއްވީ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމެވެ.

އެގޮތުން 241 ކޮމިޓީން ނިންމީ ކަމާ ގުޅުން ހުރި އިދާރާތަކާ ބައްދަލުކޮށް، މަޝްވަރާ ބައްދަލުވުންތައް ބޭއްވުމަށެވެ.

ސަހްޔޫނީންގެ ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހަޅާފައި އޮތް ބިލުގެ މަސައްކަތް ލަސްވާތީ އެކަމާ ކަންބޮޑުވުން ފާޅުކޮށް، އެ ބިލު އަވަހަށް ފާސްކުރުމަށް ބާރު އަޅައިދިނުމަށް ސަރުކާރަށް ގޮވާލައި އިދިކޮޅު އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް އޮތީ މިދިޔަ މަހުގެ 28 ގައި ގަރާރެއް ވެސް ހުށަހަޅުއްވައިފައެވެ.

މީގެ ކުރިން ވެސް އެ ބިލުގެ މަސައްކަތް ލަސްވާތީ އެމްޑީޕީން ކުއްލި މައްސަލަތައް ހުށަހަޅާފައިވެއެވެ. ނަމަވެސް އެ މައްސަލަތައް ބަލައިނުގަނެ މަޖިލީހުން ވަނީ ބޭރުކޮށްފައެވެ. ހަމައެއާއެކު އެ ބިލު ލަސްވާ ސަބަބު ސާފުކުރުމަށް، ބިލު ހުށަހެޅުއްވި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީއެއް ވެސް ފޮނުއްވާފައެވެ. ނަމަވެސް މިހާތަނަށް އެ ސަބަބެއް ހާމަކޮށް ދީފައެއް ނުވެއެވެ.

އެ މައްސަލައިގައި މިހާރު ހުށަހަޅާފައި އޮތް ގަރާރުގައި މި ބިލު، ވަކިގޮތެއް ނުނިމި މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގައި (241 ކޮމިޓީ) ހުއްޓިފައި އޮތް ސަބަބު ބަލައިދިނުމަށް އެދިފައިވެއެވެ. އެ ބިލުގެ މަސައްކަތް އަވަސްކުރުމަށް ހުރި ގޮންޖެހުންތައް ދެނެގަނެ، ވީހާވެސް އަވަހަކަށް އެ ބިލުގެ މަސައްކަތް ނިންމާ ރައްޔިތުންގެ މަޖިލީހުން އެ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި ގަރާރު ވަނީ ހުށަހަޅާފައެވެ.

އެ ގަރާރުގައި ބުނެފައި ވަނީ ސަހްޔޫނީން ފަލަސްތީނުގެ ނަސްލު ނައްތާލުމަށްޓަކައި ދެމުންދާ ހަމަލާތަކަށް އަހަރެއްވެގެން ދިޔައިރު، އެ މައްސަލާގައި އިޒްރޭލު ކުށްވެރިކުރުން ފިޔަވައި އެކަމާ ގުޅިގެން ހަރުދަނާ އެއްވެސް ފިޔަވަޅެއް އެޅުމަށް ސަރުކާރުން ނުކުޅެދިފައިވާ ކަމަށެވެ.

ޖޫން މަހުގެ 10ވަނަ ދުވަހު މަޖިލީހަށް ބަލައިގަތުމަށް ފާސްކޮށް، 241 ކޮމިޓީއަށް ފޮނުވި ބިލުގެ މަސައްކަތް ކޮމިޓީގައި އޮންނަތާ ފަސް މަސްވެގެން ދިޔައިރު، އިދިކޮޅު އެމްޑީޕީން އަންނަނީ އެކަމާ ކަންބޮޑުވުން ފާޅުކުރަމުންނެވެ.

ފަލަސްތީނުގެ ދަރިފަސްކޮޅު ނައްތާލުމަށް ސަހްޔޫނީން ހިންގަމުންދާ ގަތުލުއާންމާ ދެކޮޅަށް އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ބިލެއް ހުށަހަޅުއްވާފައި އޮންނަތާ ފަސް މަސް ދުވަހުން ފަހުން ފުރަތަމަ ފަހަރަށް އެ ކޮމިޓީގެ ބައްދަލުވުމެއް މިއަދު ވަނީ ބާއްވައިފައެވެ.

މިއަދުގެ ބައްދަލުވުމުގައި އޮތީ، އެ ބިލުގެ ސުންގަޑި ކަނޑައެޅުމެވެ. އެ ބައްދަލުވުމުގެ ރިޔާސަތުގައި އިންނެވި އެ ކޮމިޓީގެ މުގައްރިރު، އޭދަފުށި ދާއިރާގެ ޕީއެންސީ މެންބަރު އަހްމަދު ސަލީމް (ރެޑްވޭވް ސަލީމް) ހުޅުވާލުމުން، ވާހަކަ ދެއްކެވި ހުރިހާ މެންބަރުން ބޭނުންވީ، މި ބިލު ރަނގަޅަށް ދިރާސާ ކުރުމަށް ދިގު މުއްދަތެއް ދިނުމަށެވެ.

އެހެންވެ އޭނާ ކޮމިޓީއަށް ހުށަހެޅުއްވީ އަންނަ އަހަރުގެ ފެބްރުއަރީ މަހުގެ ނިޔަލަށް ބިލުގެ މަސައްކަތް ނިންމުމަށެވެ.  އެހުށަހެޅުމަށް ތާއީދު ކުރެއްވީ ސަރުކާރު ކޯލިޝަންގައި ހިމެނޭ އެމްއެންޕީގެ ލީޑަރު މާފަންނު އުތުރު ދާއިރާގެ މެންބަރު މުހައްމަދު ނާޒިމްއެވެ.