ނިމުނު ރިޔާސީ އިންތިހާބުގައި ފުރަތަމަ ބުރުގައި ރައީސް ޑރ. މުއިއްޒުއަށް ލިބުނީ 101635 ވޯޓެވެ. އަދި ރިޔާސީ އިންތިހާބު ދެވަނަ ބުރަކަށް ގޮސް 129159 މީހުންގެ ވޯޓުން ޕީޕީއެމްޕީއެންސީގެ ރިޔާސީ ކެންޑިޑޭޓް މޮޅުވިކަން އިލެކްޝަނުން އިއުލާން ކުރި އެވެ. މި ސަރުކާރު ގެނައުމަށް ވޯޓު ދިން މީހުން ރިޔާސީ އިންތިހާބުގައި މުއިއްޒު އިހްތިޔާރުކޮށް ވޯޓު ދިނީ ބޮޑެތި އުންމީދުތަކަކާ އެކު އެވެ. ޖުމްލަކޮށް ހުރިހާ ދިވެހިން އުންމީދުކުރީ ހެޔޮވެރިކަމަކަށެވެ.

17 ނޮވެމްބަރު، 2023 ގައި ރައީސް މުއިއްޒު ވެރިކަމުގެ ހުވާ ކުރެއްވި ދުވަހު، މުއިއްޒުގެ ފަރާތްޕުޅުން ރައްޔިތުން އެދުނީ ނިމިދިޔަ ފަސް އަހަރުގެ ގޯސްތައް ތަކުރާރު ނުކުރެއްވުމަށެވެ. ބޭއިންސާފުގެ ކުރިމަތީގައި އިންސާފު ވަރުގަދަ ކުރުމަށެވެ. ކޮރަޕްޝަނުން ގައުމު ސަލާމަތް ކުރުމާއިއެކު އެންމެންނާ މެދު އެއް ހަމައަކުން ކަން ކުރާނެ ދުވަހެއް ދެކެން އެތައް ބަޔަކު ތިބީ ކެތްމަދުވެފަ އެވެ.

މިދިޔަ އަހަރު ބޭއްވި ރިޔާސީ އިންތިހާބުގައި ރައީސް ޔާމީންއަށް ވާދަ ނުކުރެއްވުނީ ޖަލު ހުކުމެއްގައި ހުންނެވުމުން އިންތިހާބުގައި ވާދަ ކުރެއްވުމަށް ޝަރުތު ހަމަނުވާ ކަމަށް ސުޕްރީމް ކޯޓުން ކަނޑައެޅުމުންނެވެ. އެއަށްފަހު ޕީޕީއެމްޕީއެންސީގެ ކެންޑިޑޭޓެއްގެ ގޮތުގައި، މިހާރުގެ ރައީސް ޑރ. މުއިއްޒު ނިކުންނެވުމުން ޕީޕީއެމްޕީއެންސީ ސަޕޯޓަރުން އުންމީދު ކުރީ ގެއްލެމުން ދިޔަ ރައީސް ޔާމީން ހައްގުތަކަށް އިންސާފު އަލުން ހޯދައިދީ، މުޖުތަމައު ގައި އުފެދިފައި އޮތް "ސެލެކްޓިވް ޖަސްޓިސް"ގެ ބިރުވެރިކަން ނައްތާލަން މުއިއްޒު މަސައްކަތް ކުރައްވާނެ ކަމަށެވެ.

މި ސަރުކާރަށް މިއަދު އެއް އަހަރު ފުރޭއިރު ސުވާލަކީ ރައީސް މުއިއްޒު އަށް ވޯޓު ދިން އެތައް ލައްކަ މީހުންގެ އުންމީދުކުރި ވަރަށް ކަންކަން ހާސިލް ކޮށްދެއްވިއްޖެ ބާވަ އެވެ؟ އުންމީދު ކުރި މިންވަރާ ގާތަށް ވެސް އެއް އަހަރުގެ ތެރޭގައި ގެއްލުނު ކަނޑު ހޯދަން މަސައްކަތް ކުރެވި އިންޑިއާގެ ސިފައިންގެ އަޅުވެތިކަމުން ދިވެހި ވަތަން މިނިވަން ކުރަން އިހްލާސްތެރި ތެދުވެރި މަސައްކަތްތަކެއް ކޮށްދެއްވުނު ހެއްޔެވެ؟

ޖަވާބު ވަރަށް ސާދާ ވެފައި ކުރެވެ. ޖަވާބަކީ ނޫނެކެވެ. ސަރުކާރަށް އެއް އަހަރު ވީއިރު ވީކަމެއް ހަރާމެވެ. ވިއްޔާވި ކަމަކީ މުއިއްޒުގެ އަމަލުތަކުގެ ސަބަބުން ވެރިއެއްދެކެ ރައްޔިތުން އެންމެ އަވަހަށް "ފޫހިވި" ވެރިއަކަށް މުއިއްޒު ވުމެވެ. މުއިއްޒުއަށް އެއް އަހަރުން ވެވުނީ ހެޔޮލަފާ ވެރިއަކަށް ނޫނެވެ. ވެވުނީ ދޮގުވެރި އަކަށެވެ. އެއީ ޝަރަފެއް ނަމަ މުއިއްޒުގެ ބޮލުގައި އަޅުވަންވީ "ކައްޒާބު" ގެ ނަންދީ ރަން ތާޖެކެވެ.

ތިންބާރު ވަކިވެފައި އޮތް ވެރިކަމެއް ކުރައްވަން ދެކޮޅު ހައްދަވާ މުއިއްޒު އިހްތިޔާރު ކުރެއްވީ ގާނޫނުހެދުމުގެ ބާރާއި އަދުލުއިންސާފުގެ ބާރު ވެސް މުށުތެރެއަށް ލުމަށެވެ. މުއިއްޒުގެ ވެރިކަމަށް އަހަރެއް ފުރުނުއިރު، ކިތައްމެހާ ވެސް ރަގަނޅަކަށް މި ދެ ބާރުވެސް އަތްދަށުލައިފި އެވެ.

މިއަދު ރައްޔިތުންގެ މަޖިލީހަކީ ގާނޫނީ ފަންނުގެ ބަހުސައްވުރެ ބޮޑަށް މުއިއްޒުއަށާއި އޭނާގެ ވެރިކަމަށް ހުށާމަތު ކުރާ ތަނެކެވެ. އަބަދުވެސް އެތަނުން އިވެނީ ޝުކުރިއްޔާ ރައީސް، ސުކުރިއްޔާ ސަރުކާރު ކިޔާ އަޑެވެ. ދެން އޮތް ބާރު އިސްލާކުރުމުގެ ނަމުގައި ޖޭއެއްސީ އެ ހިންގަވަނީ މުއިއްޒުގެ އަމިއްލަ ގެކޮޅު ދިމްޔާތުގައި އޭ ހީވާ ފަހަރު ވެސް އާދެ އެވެ.

މިނިވަން މުއައްސަސާތަކާއި އަދި މިނިވަންކަމާއިއެކު ހިނގަމުން އައި ބޭންކްތައް ފަދަ މާލީ އިންސްޓިޓިއުޓްތައް މުއިއްޒުގެ "ކޮންޓްރޯލް" ދަށަށް ގެންދެވީ އަމިއްލަ ފުޅަށް ހިންގެވި ބަގާވާތަކުން ނެވެ. މިއަދު މިނިވަން މުއްސަސާއިތަކާއި ކުންފުނިތަކާއި ބޯޓުތަކާއި އެމްއެމްއޭގައި އެ ތިއްބެވީ މުއިއްޒުއަށް މަރުދޭ ސިޔާސީ މީހުންނެވެ. ނަތީޖާއަކީ މުއިއްޒުގެ ވެރިކަމަށް އެއް އަހަރު ފުރުނުއިރު އިލެކްޝަން ކޮމިޝަނާއި އޭސީސީ ހިމެނޭހެން ދެންހުރި ހުރިހާ މިނިވަން މުއައްސަސާތަކުގެ ހުރިހާ ބާރެއްގައި މުއިއްޒު އެ ހުންނެވީ ބަގުނޑި ބައްދައިގެންނެވެ.

ރިޔާސީ އިންތިހާބުގެ ކެމްޕެއިނުގެ ތެރެއިން މުއިއްޒު ވެވަޑައިގެންނެވި ވައުދުތަކަކީ ކުޅޭކުޅޭ އެއްޗަކަށް ހައްދަވައިފި އެވެ. ރައްޔިތުން މުއިއްޒުއަށް ވޯޓު ދިނީ އިސްކޮޅުން މާ، ދިގުވެފައި "އަމީތާބަށް" ވީމަ އެއް ނޫނެވެ. ވޯޓު ދިނީ ވައުދުތަކަށް ބަލައިގެންނެވެ. ވެރިކަމަށް ވަޑައިގެން ވައުދާ ހިލާފުވުމުން ރައްޔިތުންނަށް އެ ލިބެނީ ވަރަށް ބޮޑު ލަނޑެކެވެ. އޭގެ ޒިންމާ މުއިއްޒު ސީދާ ނަންގަވަންޖެހެ އެވެ. މަސްވެރިން ބާނާ މަހަށް ފައިސާ ނުދެވި މަސްވެރިންނަށް ވީ ވައުދާ ހިލާފުވުމުން ދިވެހި ކަނޑުފަޅުތަކުގައި މުއިއްޒު ދަތުރުކުރެއްވުމަށް ލަދުގަންނަން ޖެހެ އެވެ.

ވެރިކަމަށް އަހަރެއްވީއިރު، އާސަންދަ ހިދުމަތުން ދިވެހިންނަށް ދަތިކޮށް ސަރުކާރުގެ ވަޒީފާތަކުގައި ތިބި މީހުން ވަޒީފާއިން ވަކިކޮށް ތިޔަ ޖައްސަވަން އުޅެނީ ކޮންސަކަރާތެއް ހެއްޔެވެ.؟ ތިޔަ ވިދާޅުވާން އުޅުއްވާ އެއްޗެއް ނިކަން ސާފުކޮށް ވިދާޅުވެ ބައްލަވާށެވެ.؟

މަނިކުފާނުގެ ސަރުކާރަށް އެއް އަހަރު ފުރުނުއިރު، ރައްޔިތުންގެ ބަސް މިއަދު ވަނީ އިއްވައިފި އެވެ. އެއީ ރައީސް މުއިއްޒަށް ތާއީދު ކުރެއްވުނީތީ މިހާރު "ރިގްރެޓް" ނުވަތަ ހިތާމަ ނުކުރައްވާ ހަމަ އެކަކުވެސް ނެތެވެ.

މަނިކުފާނަށް އޮތީ ހަމައެއްމެ ހައްލެކެވެ. ތިމާގެ ފުށުން ގައުމާއި ރައްޔިތުންނަށް ލިބިދާނެ އިތުރު ގެއްލުމަކަށް ފުރުސަތު ނުދެއްވާ އަވަހަށް އަމިއްލަ ފުޅަށް "އިސްތިއުފާ" ދެއްވާށެވެ. ނޫނީ ރައްޔިތުންގެ ދަރުބާރުން ބަސް އިއްވުން ދާދިގާތެވެ.