ރައްޔިތުންގެ މެޖޯރިޓީއާ އެކު ގެނައި ވެރިކަމުގައި ވީ މަދު ދުވަސްކޮޅުގައި ހެދި ގިނަ ގޯސްތަކުގެ ސަބަބުން ރައްޔިތުން ސަރުކާރު މަތިން ފޫހިވެ އުއްމީދު ގެއްލުނު ނަމަވެސް އުފެދިފައި އޮތް ގާނޫނީ ވެރިކަމެއް ވައްޓާލުމަކީ ކުށަކަށްވުމުން މިއަދު ދިވެހިންނަށްވެސް މިވަނީ މި ވެރިކަމާ އެކު ކުރިއަށް އޮތް 4 އަހަރު އަހަރާ 3 ދުވަސް ހޭދަ ކުރަން ޖެހިފައެވެ.

ސަރުކާރަށް ނުވަ މަސްވެ ގަރުބަ ގަނެ ވިހެއިއިރު ސަރުކާރުގެ މަސް ފަހި ނުވުމުން ހާލަތު އޮތީ ނިކަން ދެރަވަރުކޮށެވެ. ފޫޅު ކަރަށް އޮޅި ނޭވާލާން ދަތިވުމުގެ ނަތީޖާއަކަށް ވެގެން ގޮސްފައިވަނީ އޮކްސިޖަން އެއްވަރެއްގައި ހިފެހެއްޓުމަށް ސަރުކާރުގެ މަގާމުތަކުގައި ތިބި މީހުން މަސައްކަތްކުރަން ޖެހުމެވެ.

އާދޭ! ސަރުކާރުގައި ބޮޑު މުސާރައިގައި ތިބި ހުރިހާ ބޭފުޅުނަށް ޖެހެނީ ރައީސް މުހައްމަދު މުއިއްޒުގެ ސަރުކާރު ދިފާއުކޮށް ވާހަކަ ދައްކަންށެވެ. އެއީ ކިތަންމެ ބޮޑު ދޮގެއް ހެދި ނަމަވެސް މެއެވެ.

އަސްތާއެވެ. ދޮގުގެ ވާހަކަ ދެއްކުމުން ހަމަ ލޮލަށް ސިފަވަނީ ރައީސް މުއިއްޒު ކަމަށް ގިނަ ބަޔަކު މިއަދު ބުނަމުން ދަނީ މަދުން ނޫނެވެ. ބަޑި ތަކުރު ވިހޭރޭ އަލަފަތްވެސް، މި ސަރުކާރުގެ ދިގުތައް ހާ ތިޔާގި ނޫން ކަމަށް ގިނަ ބަޔަކު ބުނެއެވެ.

އެގޮތުން ސަރުކާރަށް 11 މަހާ 27 ދުވަސްވީއިރު ވެރިންގެ ކިބައިން ފެންނަނީ ދޮގާ މަކަރާ އޮޅުވާލުމެވެ. މިއީ ރައްޔިތުންގެ ބުނާ ބުނުމެވެ. ރައީސް އަބްދުﷲ ޔާމީންގެ ނަންފުޅާ ހުސްގޮނޑި އަދި ފޮޓޯވެސް ދައްކައިންގެން ވެރިކަމަށް އައިސް މިހާރު ސަރުކާރުން ގެންދަނީ ބޮޑެތި މުޖުރިމުންގެ ގޮތުގައި ރާއްޖޭގެ ޝަރުއީ ނިޒާމުން ކަނޑައަޅަފައި ތިބި މީހުން މެދުވެރިކޮށް ރައީސް ޔާމީންގެ ތަރައްގީއަކީ މި ސަރުކާރުގެ ވެރިންގެ ޕްރޮޖެޓުތަކެއްގެ ގޮތުގައި ނަންކުރުމަށް މަސައްކަތްކުރުވަމުންނެވެ.

ދިވެހިރާއްޖޭގެ ތަރައްގީގެ އޮއިވަރު ބަދަލުކޮށްލި ތާރީޚީ ބުރިޖަކީ ރައީސް މުއިއްޒުގެ މަޝްރޫއެއްކަމަށް ދެއްކުމަށް ނިދާ މެޝިންގައި އޮތް މުޖުރިމަކު ހޭލައްވައިގެން މިސަރުކާރުން މަސައްކަތްކުރަމުންދާއިރު ސަރުކާރަށް 11 މަހުގެ ތެރޭގައި ރައްޔިތުންގެ ހައްގުގައި ކޮށްދެވުނީ ކޮން ކަމެއްތޯ މިއީ މިއަދު ސުވާލު އުފައްދަން ޖެހޭ ކަމެކެވެ. އެންމެ ފުރަތަމަ އައިސް މެޑަލް ޖަހަން، ނަން ބަދަލުކޮށް ވެސް ފެށީ ރައީސް ޔާމީންގެ ޕްރޮޖެކުޓެކެވެ. ފުށިދިއްގަރު ފަޅުން ރަސްމާލެއަށް ނަން ބަދަލުކޮށް ކަނދިކަމަނާގެ މަސް ތެލުލާން ފެށިއެވެ. އެކަން ވެސް ތެޔޮ އެތި ހޫނުވެ ދުން އެރިއިރުވެސް ގުޑާ ނުލައެވެ.

ރަސްމާލެ ޓަނަލްގެ ވައުދު "ދުރު ވިސްނުމަކަށް" ބަދަލުކޮށް އެކަމުގައިވެސް ދޮގާ މަކަރެވެ.

ދެން އޮތީ ކުރީ ސަރުކާރުން ދިން ގޯތިތަކާ ފްލެޓުތަކުގެ ވާހަކައެވެ. އެކަންކަން ކުރުމުގައިވެސް ނުކުޅެދުމުން ދެން ފެށީ ދޮގުހަދަންށެވެ. އެ ދޮފުތައް ފަޅާއަރަން ފެށުމުން ދެން ފެށީ ވަޒީރުންނާ މަޖިލިސް މެމްބަރުން މެދުވެރިކޮށް ދޮގުތަކުން ނެއްޓެން ދޮގު ހައްދަން ފެށި މަންޒަރެވެ. ދޮގުތައް ވަރުގަދަ ކުރުމަށް ވަކަރަށް ޖަހުވާތަނެވެ.

ރައްޔިތުންނަށް ލިބެމުންދިޔަ އެއްވެސް ޚިދުމަތަކަށް ބުރުލެއް ނާރާނެ ކަމަށް ވިދާޅުވުމަށް ފަހު ދެން ފެނުނީ އެކަންކަން ވެސް ވަކަރަށް ޖެއްސެވި މަންޒަރެވެ. އާސަންދައެއް އެންސްޕާއެއް އިސްރަށްވެހިންގެ އެލަވަންސެއް މިހެން ގޮސް ނުކިޔާނެ ކަމެއް ނެތެވެ.

ލޭނުގެ މަސްވެރިކަން ކުރުމުގެ މައްސަލަ ބޮޑުވެ ރައްޔިތުން ރަތަށް އަރާފައި ތިއްބާ ދެން އިވުނީ ލޭނެއް ކަނޑުއޮޅި ގިރާކޮށް ގޮސްގެން ގެއްލިގެން އުޅޭ ވާހަކައެވެ. ގޮސް މާފަންނުކޮށްގައި އެ ލޭނު ކޮޅަށް ޖެހިފައި ހުރި ވާހަކއެއްވެސް އަޑުއިވެއެވެ. އެކަމަށްވެސް ދޮގެވެ. ހުސް ދޮގެވެ. ދޮގުން ނެއްޓެންވެސް ދޮގެވެ.

ސިއްރު ކުރާނެ އެއްވެސް ކަމެއް ނޯންނާނެ ކަމަށް ވިދާޅުވި ނަމަވެސް އަދިވެސް ކުރީ ސަރުކާރުން އިންޑިއާއާ އެކުވި އެއްބަސްވުންތައް ހުރީ ހާމަނުކޮށެވެ. ވެރިކަން ލިބުމުން ކުރިން ބުނި ހުރިހާ އެއްޗެއް އެކަމުގައި ކެންސަލްވެ ކުރީ ސަރުކާރުން ކީ ލަވަ މި ސަރުކާރުންވެސް އައު ގޮތަކަށް ކިޔަން ފެށިއެވެ.

އިންޑިއާ ސިފައިން ބާލާނެ ކަމަށްވީ ވައުދު އެމީހުންގެ ޔުނިފޯމު ބާލާ ގަންޖުފަރާހަށް ބަދަލުކޮށް އޮޅުވާލާ އެ ދޮގުވެސް ވަކަރަށް ޖެހިއެވެ.

ސަހްޔޫނީންގެ ޕާސްޕޯޓުގެ މައްސަލައިގައިވެސް ގެންދަވަނީ ނުހަނު ރީތި ސްކްރިޕްޓަކަށް ޑްރާމާ ކުޅުއްވަމުންނެވެ. ނަމަވެސް ވިދާޅުވަނީ ދެމި ތިބީ ފަލަސްތީނާ އެކު ކަމަށެވެ.

އިޚުލާސްތެރިވެރި ހާމަކަން ބޮޑު ސަރުކާރެއްގެ ވައުދާއެކު އައިސް ރައީސް މުއިއްޒު ގެންދަވަނީ، ދޮގުތައް ވަކަރަށް ޖެހުމުގައާ ކަނދި ކަމަނާގެ މަސްތެލުލުމުގައި މެކުހަށް ޖަހަމުންނެވެ. މިއީ ބަޔަކު އުޑުގައި ޖެހިފައި ބިމުގައި ޖެހުނަސް މިއަދުގެ ހަގީގަތެކެވެ.

ޑރ މުއިއްޒުގެ ނަމުން ނަން މަޝްހޫރުވެވަޑައިގެން ހުންނަވާ ވެރިކަމަށް އައުމަށް ފަހު ހެއްދެވިހާ ދޮގުތަކާ އެކު މިހާރު އެއީ ގިނަ ރައްޔިތުން ދެކޭ ގޮތުގައި "ޑރ.ކައްޒާބެވެ" ފޮތެއް އޮތަކަސް އެދުރެއް ނުވާނެއޭ ބުނާ ބީދައިން ބައްޕާފުޅު ލިޔުއްވި ފޮތް އަޮތް ނަމަވެސް އޭގައި ބަޔާންކޮށް ކަޅާ ހުދުން ފެންނަން ހުރި ބަސްތަކުގެ ފޮނި މީރުކަން ދިވެހިންނަން އެ ފޮތުގެ ވެރިމީހާގެ ލެގަސީ ދަމަހައްޓަން އައި ދަރިކަލުންގެ ވެރިކަމުގައި ނުފެނެއެވެ.

ވެރިކަން ފުރޮޅި 11 މަސް ފުރި އަހަރަކަށް ލީ ނަމަވެސް ކަމަކު ދާކަށް ނެތެވެ. ރައީސް މީހާ ދެއްކެވި ހުރިހާ ވާހަކައެއް ފެން ބޮތްކަށް ވެއްޖެއެވެ. ޖަމަލު ފޮނޑިއަށް ވެއްޖެއެވެ. ރައްޔިތުންގެ އިތުބާރު ގެއްލިއްޖެއެވެ. ނުހަނު ފޮނި އުއްމީދާ އެކު ސަރުކާރު ގެނައި މީހުން މާޔޫސްވެއްޖެއެވެ. ފަހަތުގައި އޮތީ އިްނތިހާއަށް ހަދަމުްނ ގެންދާ ދޮގުތަކެވެ.

އެހެންކަމުން ރައީސް މުއިއްޒުގެ ކޮންމެ ވާހަކައެއް މިހާރު ދިވެހިން ދެކެނީ ކަނޑުގައި އަޅާ ރޮނގެއް ފަދައިންނެވެ. ލޮލަށް ނުފެންނަ އަތުން ނުބީހެވޭ ނަނާ ހުވަފެނެއްގެ ގޮތުގައެވެ.