"މޯލްޑިވްސް ކޮމިޔުނިޓީ ޕާޓީ" (އެމްސީޕީ)ގެ ނަމުގައި އާ ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން މިއަދު ދީފި އެވެ.

އެ ކޮމިޝަނުން ބުނީ "މޯލްޑިވްސް ކޮމިޔުނިޓީ ޕާޓީ"ގެ ނަމުގައި ސިޔާސީ ޕާޓީއެއް އުފެއްދުމަށްޓަކައި ކުރަންޖެހޭ މަސައްކަތްތައް ކުރިއަށްގެންދިއުމުގެ ހުއްދަ ދިނީ ގ. ކްރެބްޓްރީ، އަލީ އަހްމަދަށްކަަމަށެވެ.

އެ ޕާޓީ އުފެއްދުމަށް ބޭނުންވާ 3،000 މީހުންގެ ސޮއި ހޯދުމަށާއި، ޕާޓީ އުފެއްދުމަށްޓަކައި ކުރަންޖެހޭ އެހެނިހެން ކަންތައްތައް ކުރިއަށް ގެންދިއުމުގެ ހުއްދަ ދީފައިވާ ކަމަށް އިލެކްޝަންސް ކޮމިޝަނުން ބުނެއެވެ. އަދި އެ ޕާޓީ ރަޖިސްޓްރީ ކުރުމަށް ބޭނުންވާ 3،000 މީހުންގެ ފޯމު އެ ކޮމިޝަނަށް ހުށަހެޅުމަށް ތިން މަސް ދުވަހުގެ މުއްދަތެއް ދީފައިވާކަމަށްވެސް އީސީން ބުނެއެވެ.

ރާއްޖޭގައި މިވަގުތު 11 ޕާޓީއެއް ހިންގަ އެވެ އެވެ. އެއީ ޕީޕަލްސް ނޭޝަނަލް ފްރޮންޓް(ޕީއެންއެފް) އާއި ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަދާލަތު ޕާޓީ އާއި ޖުމްހޫރީ ޕާޓީއާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީއެންސީ އާއި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އާއި މޯލްޑިވްސް ރިޕޯމް މޫވްމަންޓް (އެމްއާރްއެމް) މޯލްޑިވްސް ނޭޝަނަލް ޕާޓީގެ އިތުުރުން ދަ ޑިމޮކްރެޓްސް އެވެ.