ގައުމުގައި އިންސާފުން ކަންކަން ހިނގަމުންދާ ނަމަ ރައީސް އަބްދުﷲ ޔާމީންގެ ޝަރީއަތުގެ މައްސަލަ ދިގު ނުދަންމާނެ ކަމަށް އެމަނިކުފާނުގެ ދޮށީ ދަރިކަލުން ޒޭން އަބްދުﷲ ޔާމީން ވިދާޅުވެއްޖެއެވެ.

ޒޭން މިފަދައިން ވިދާޅުވީ ރައީސް ޔާމީންގެ އިސްތިއުނާފް މައްސަލަ ލަސްވަމުންދާ ދިއުމުގެ ކަންބޮޑުވުމާ އެކު އާދިއްތަ ދުވަހު ހައި ކޯޓަށް ވަޑައިގެންނެވުމަށް ފަހު މީޑިޔާތަކަށް މައުލޫމާތު ދެއްވަމުންނެވެ.

ޒޭން ވިދާޅުވީ، ރައީސް ޔާމީންއަށް ކޮށްފައިވަނީ ޝައްކެތް ނެތް މިންވަރަށް ނުހައްގު ހުކުމެއް ކަމަށާ ނަމަވެސް އެމަނިކުފާނު އެހުކުމުގައި ޣައިދުކޮށްގެން ކުރީ ސަރުކާރުންނާ މި ސަރުކާރުންވެސް ގެގުޅޫން ބަލައިނުގަނެވޭނެ ކަމަށެވެ.

އެގޮތުން ރައީސް ޔާމީންގެ މައްޗަށް ހުކުމްތައް ކޮށްފައިވަނީ އެމްއެމްޕީއާރުސީގެ ހިޔާނާތާ ގުޅުވާކަމުގައިވާއިރު އެމައްސަލައިގައި އެހެން ބަޔަކާ މެދު ދައުވާތަކެއްކޮށް މައްސަލަތަކެއް ބަލަމުން ނުދާ ސަބަބާ މެދު ޒޭންވަނީ ވާހަކަ ދައްކަވާފައެވެ.

ޒޭން ވިދާޅުވީ ރައީސް ޔާމީންއާ މެދު އަނިޔާވެރިވަމުންދާއިރު މުޅި ނިޒާމު އޮތީ ފެއިލްވެފައިވާ ކަމަށާ ސަރުކާރާ ވެރިންގެ ކިބައިގައި އިހްލާސްތެރިކަމެއް ނެތް ކަމަށެވެ. އިހްލާސްތެރިކަމެއް ހުރި ނަމަ ރައީސް ޔާމީންގެ މައްސަލަ ނުނިމި ދިގުލައިގެން ގޮސް އެތައް ދުވަހެއް ފާއިތުވީއިރު މައްސަލަ އަވަސްކުރުމަށް އެންމެ ކުޑަމިނުން ގޮވާލާނެ ކަމަށްވެސް ޒޭން ވިދާޅުވިއެވެ.

އިސްތިއުނާފުގެ ހުކުމުކުރުން ލަސްވަމުންދާ ދިއުމާ ގުޅިގެން އާއިލާގެ ކަންބޮޑުވުންތަކާއެކު ހައިކޯޓަށް ގޮސްފައިވާއިރު ހައިކޯޓު އޮތީ ރިސެސްގައެވެ. ހައިކޯޓު ރިސެސްއަށް ދިޔައިރުވެސް ރައީސް ޔާމީންގެ މައްސަލަ އޮތީ ހުކުމާ ހަމައަށް ވާސިލްވެފައިކަން ފާހަގަކޮށްލެވެއެވެ. ހުކުމު ނުކޮށް ކޯޓު ރިސެސްއަށް ދިއުމުން އެތައް ބަޔަކު ވަނީ އެކަމާ ފާޑުވެސް ކިޔާފައެވެ. ރައީސް ޔާމިންއަށް އިންސާފުނުލިބި ލަސްވަމުންދާއިރު އޭގެ ސަބަބުން އެމަނިކުފާނަށް އިއާދަނުކުރެވޭނެވަރުގެ ގެއްލުންތައް ލިބި އެތައް ހައްގަކުން ވަނީ މަހްރޫމުވެފައިކަމަށް އެމަނިކުފާނުގެ ގާނޫނީ ވަކީލުން ގެންދަވަނީ ވިދާޅުވަމުންނެވެ.