ދިވެހިން އިސްލާމްދީން ގަބޫލުކޮށް، ސައްތައިން ސައްތަ އިސްލާމީ ގައުމެއްގެ ގޮތުގައި ދެމިއޮންނަތާ ގާތްގަނޑަކަށް 871 އެއް އަހަރު ވެއްޖެއެވެ. ދިވެހިންނަކީ އިސްލާމްދީން ދެކެ ލޯބިވާ އެ ނޫން ދީނެއް މި ދިވެހި ފަސްގަނޑުގައި އަޅުކަން ކުރުމަށް ޖާގައެއް ދޭން ބޭނުންވާނެ ބަޔެއް ނޫނެވެ. އަދި އެފަދައިން އުޅެން ބޭނުންވާ މީހުންނަށްވެސް މި ގައުމުން ޖާގައެއް ދޭން ބޭނުންވާނެ ބަޔެއް ނޫނެވެ.

2023 ނޮވެމްބަރު 17 ވަނަ ދުވަހު އިންތިޚާބުވެ ވަޑައިގަތް މިހާރުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވެރިކަމަށް މިއަދު އަހަރެއް ވެގެން ދިޔަ އިރު މަންޒަރު މުޅިން ތަފާތު ވެއްޖެއެވެ. ތާރީޚީ ގޮތުން ސައްތައިން ސައްތަ މުސްލިމް ގައުމެއްގެ ގޮތުގައި ދިވެހިރާއްޖެ އޮތް އޮތުން މުޅިން ބަދަލުވެގެން ހިނގައްޖެއެވެ.

މި ގައުމުގައި "ލާދީނީ" ނަމުން ނަން މަޝްހޫރު ވެފައިވަނީ ކުރީގެ ރައީސް މުހައްމަދު ނަޝީދު (އަންނީ) އެވެ. މިވެސް ބައިވަރު ސަބަބަތަކާއި ހުރެކަން ގައިމެވެ. އެހެން ނަމަވެސް، "ލާދީނީ އަންނި" ގެ ވެރިކަމަށްވުރެވެސް އިސްލާމްދީނާއި ފުށުއަރާ ބައިވަރު ކަންކަން މުއިއްޒުގެ ސަރުކާރުގެ އެއް އަހަރުގެ ތެރޭގައި ވަނީ ކޮށްފައެވެ. އެހެންކަމުން "ލާދީނީ" ލަގަބު ހަމައެކަނި ވަކި މީހަކަށް ދެވޭނެ ޖާގައެއް އޮތްކަމަށް ދިވެހިން ގަބޫލެއް ނުކުރެއެވެ.

ބައިނަލްއަޤްވާމީ ޖަމްއިއްޔާ، ޖަމާޢަތް ނުވަތަ މުއައްސަސާތަކުން ހަދާ މުޢާހަދާތަކުގައި އިސްލާމްދީނާ ފުށުއަރާ ކަންކަން ހުރެއެވެ. އެގޮތުން މިހާރަކަށް އައިސް، އެފަދަ މުޢާހަދާތަކުގައި ޝަރުޠުކުރާ އެއްކަމަކީ ދީނީ މިނިވަންކަން އޮތުމެވެ. އެއީ އެމީހަކު ބޭނުން ދީނަކަށް އުޅުމުގެ މިނިވަންކަން ކޮންމެ ޤައުމެއްގައިވެސް، އެ ޤައުމެއްގެ ރައްޔިތުންނަށް ލިބިދޭން ޖެހޭނެކަމެވެ. ޙައްޤުތަކުގެ ނަމުގައި ގެންނަ އަނެއް ޝަރުޠަކީ، އިސްލާމްދީނުގައި ކަނޑައެޅިގެން ޙަރާމްކުރައްވާފައިވާ ބޮޑުވެގެންވާ މުންކަރާތެއްކަމުގައިވާ، އެއް ޖިންސުން ގުޅުން ހިންގުން ހުއްދަކުރުމެވެ. ނުވަތަ އެކަމުގެ އަހުލުވެރިން ޙިމާޔަތްކުރުމެވެ.

މިފަދަ އެއް އެގްރީމަންޓަކީ މި ސަރުކާރުން ސޮއި ކުރި ސަމޯއާ އެގްރީމެންޓްއެވެ. އެ އެގްރިމެންޓުގައި ދިވެހިރާއްޖޭން ސޮއިކޮށްފައިވަނީ ބައެއް ‘ރިޒަވޭޝަން’ތަކާ އެކުގައި ވީނަމަވެސް އެ ‘ރިޒަވޭޝަން’ތައް ލުމުގައި އެކަށީގެންވާ މިންވަރަށް ދީނީ ގޮތުން އެކަން ދިރާސާކޮށްފައި ނުވާކަން ފާހަގަވެއެވެ.

ނިމިގެން ދިޔަ ސަރުކާރުގައި އިސްލާމްދީނަށް ފުރައްސަރަ ކުރުމުގެ ކަންތައްތައް ހާމަވެގެން ދިޔަ އިރު ކުރީ ސަރުކާރަށް އެކަމަށް އެންމެ ފާޑު ކިޔާ، އިސްލާމްދީނުގެ ހަމަތަކުގެ ބޭރުން ގައުމުގައި ކަންކަން ހިނގަމުންދާތީ އެކަމަށް އެންމެ ކަންބޮޑުވުން ފާޅު ކުރި އެއް ބަޔަކަށް މިއަދުގެ ވެރިކަމުގެ އިސްވެރިން ހިމެނެއެވެ. ތިމަންނާ މެންނަށް ވެރިކަން ލިބޭ ދުވަހަކުން "އިސްލާމީ ޝަރީއަތެއް" ގާއިމުކުރައްވާނެ ކަމުގެ ފޮނި ވާހަކަތައް ދައްކާ ދީނުގެ ނަމުގައި ރައްޔިތުންގެ ވޯޓު ހޯދާ މިއަދު މިވަނީ ދިވެހިންގެ ދީނީ މިނިވަންކަން އަޅުވެތިކޮށްފައެވެ.

ކަން މިހެން ހުރި އިރު، ރާއްޖޭގައި ހަރަކާތްތެރިވާ ދީނީ އިލްމުވެރިން މިފަދަ ކަންކަމަށް އެކަށީގެންވާ ކަންބޮޑުވުން ފާޅުކޮށްފައިނުވެއެވެ. އަދި ނުވެސް ނުކާރެކަން ގައިމެވެ. މުއިއްޒު ވަނީ ދީނީ އިލްމުވެރިންވެސް އޭނާގެ އަތްބޮނޑި ދަށުކޮށް އެމީހުންގެ އަނގަވެސް ބަންދުކޮށްފައެވެ. ވަގުތީ އުފަލާއި ފައިދާއަށްޓަކައި މިއަދުގެ އިލްމުވެރިން ދީންވެސް ވިއްކަން ފަހެއް ނުޖެހޭނެ ކަން ސާބިތުކޮށްދީއެވެ.

އެހެން ދީންތަކަށް މި ގައުމުން ޖާގަ ދިނުމަކީ ދިވެހިން ދުވަހަކުވެސް ރުހޭނެ ކަމެއް ނޫނެވެ. އަދި އެފަދައިން ކަންތައް ކުރާތަން ބަލަން ހަމަ ގައިމުވެސް ދިވެހިން މަޑުން ނުތިބޭނެެއެވެ.

އިޚްލާޞްތެރި ގައުމު ދެކެ ލޯބިވާ ވެރިއެއްގެ އަތްމައްޗަށް މެނުވީ މިފަދަ ކަންކަމެއް ޙާޞިލެއް ނުވާނެއެވެ. އަދި އަމާނާތްތެރި، ޢިލްމުވެރި، ވަރުގަދަ އަދި އެ ހަވާލުކުރެވޭ ކަމަކަށް ރައްކާތެރިވާ ބައެއްކަމުގައި އެފަދަ ވެރިޔަކު ވާންޖެހޭނެއެވެ.

ޔޫސުފުގެފާނު، އެކަލޭގެފާނަށް މަޤާމު ހަވާލުކޮށްދެއްވުމަށް އެދިވަޑައިގެންނެވިއިރު ވިދާޅުވިއެވެ.

‎﴿اجْعَلْنِي عَلَىٰ خَزَائِنِ الْأَرْضِ ۖ إِنِّي حَفِيظٌ عَلِيمٌ﴾‏ [سورة يوسف: ٥٥]

މާނައީ: ” (މިޞްރުގެ) ބިމުގެ ޚަޒާނާތަކުގެ ވެރިޔަކަށް ތިމަންކަލޭގެފާނު ލައްވާށެވެ! ހަމަކަށަވަރުން، ތިމަންކަލޭގެފާނީ (އެއަށް) ރައްކާތެރިވާ (އެއާބެހޭ ކަންތައްތައް) ރަނގަޅަށް ދަންނަ ބޭކަލަކީމެވެ.”

އެހެންކަމުން ގައުމަށް ބޭނުން ޖެހިފައިމިވަނީ ވެރިކަމަކީ ކޯއްޗެއްކަން އިނގޭ ވަރުގެ މީހެކެވެ. ޒަމާންވީ ދިވެހިންގެ ސަގާފަތާއި އިސްލާމީ ވަންތަކަން ހިފަހައްޓާނެ ވަރުގެ މީހެކެވެ. އެ އުއްމީދުގައި ދިވެހީންގެ ރާއްޖެ ނަމަވެސް ބިލާހަކަށްވެ އުއްމީދު ގެއްލި ބަނަ ވެއްޖެއެވެ.