ރައީސް ޑރ. މުހައްމަދު މުއިއްޒުގެ ސަރުކާރަށް އަހަރެއް ފުރޭތީ ބެރުދުންމާރި އާއިއެކު ވަރުގަދަ މިއުޒިކް ޝޯތަކެއް ބޭއްވުމަށް ނިންމައިފި އެވެ.

އެންސީއޭ އިން މިހާރު އިއުލާނުކޮށްފައިވާ ގޮތުން ސަރުކާރަށް އަހަރެއް ވެގެން ބާއްވާ ޝޯތައް އޮންނާނީ ނޮވެމްބަރު 17، 18 އަދި 19 ގަ އެވެ.

"އޮލިންޕިއަންސް ވިތް ޔޫތް- ލައިވް އިން ކޮންސާޓް" ނަމުގައި ބާއްވާ މި ޝޯތަކަށް މިހާރު ވަނީ ޓިކެޓް ވިއްކަން ފަށައިފަ އެވެ.

އޮލިމްޕަހުގައި ބާއްވާ މި ޝޯގެ ޓިކެޓް ވިއްކަނީ  200ރ. އަށް އަދި 250ރ. އަށެވެ.  މި ޝޯއަށް މުއިއްޒު ސަރުކާރުގެ ސިޔާސީ މަގާމުތަކުގައި ތިއްބެވި މީހުނަށް ދާން ސަރުކާރުން އަންނަނީ ބާރު އަޅަމުން ނެވެ. މިޝޯތައް ބައްލަވާލެއްވުމަށް މުއިއްޒުގެ ސަރުކާރުގެ މިނިސްޓަރުންނަށް މިހާރު ވަނީ ދައުވަތު ފޮނުވިފަ އެވެ.

އޮލިމްޕިއަންސްގެ އިތުރު ޒުވާން އިތުރު ފަންނާނުތަކެއްވެސް ބައިވެރިވާ މިޝޯގައި ޖުމުލަ 28 ފަންނާނަކު ލަވަތައް ހުށަހަޅައިދޭނެކަމަށް އެންސީއޭއިން ބުނެއެވެ.

މުއިއްޒު ވެރިކަމަށް އަހަރު ފުރޭތީ ޝޯ ބާއްވަން ނިންމިއިރު މުއިއްޒުގެ ސަރުކާރުން ފާއިތުވެ އެއް އަހަރަކީ ކޮރަޕްޝަނާއި ވައްކަމުގެ އެއް އަހަރެވެ. އަދި ވެރިއެއް ދެކެ ރައްޔިތުން އެހާ އަވަހަށް ފޫހިވި ވެރިއަކަށް މުއިއްޒު ވެއްޖެ ކަމަށް ބުނެ ގިނަބަޔަކު އަންނަނީ މުއިއްޒުގެ ސިޔާސަތުތަކަށް ފާޑު ކިޔަމުން ނެވެ.