ގެދޮރުވެރިޔާ ސްކީމުގެ ދަށުން ދޫކުރާ 4،000 ފްލެޓުގެ ލިސްޓު އާންމުނުކުރާތީ ނުރުހުން ފާޅު ކޮށް ހައުސިން މިނިސްޓްރީ ދޮށުގައި މުޒާހަރާ ކޮށްފި އެވެ.
ހައުސިން މިނިސްޓްރީން އެންމެ ފަހުން ފުލެޓް ލިސްޓު ނެރޭނެ ކަމަށް އިއުލާންކޮށްފައި އޮތީ އިއްޔެއެވެ.
ނަމަވެސް އިއްޔެ މެންދުރު އެ މިނިސްޓްރީން ނެރުނު އިއުލާނެއްގައި ވަނީ އެ ސްކީމަށް ހުށަހަޅާއިފައިވާ 20،697 އެޕްލިކޭޝަން ފޯމް ބެލުމުގައި ކަަށަވަރުކުރަން ޖެހޭ ގިނަ ކަންކަން ހުރުމާ ގުޅިގެން އެ މަސައްކަތް ނިންމުމަށް އިތުރު މުއްދަތު ބޭނުންވާ ކަމަށެވެ.
މިކަމާއި ހިންހަމަ ނުޖެހި މިއަދު ގާތްގަނޑަށް 50 ވަރަކަށް މީހުން މިނިސްޓްރީއަށް ދިޔަ އެވެ. އެމީހުން އެދުނީ ހައުސިން މިނިސްޓަރު އަލީ ހައިދަރުއާ ބައްދަލު ކުރުމަށެވެ. ނަމަވެސް އެއްވި މީހުންނާ މިނިސްޓްރީގެ އޮފިޝަލަކު ވެސް ބައްދަލެއް ނުކުރެ އެވެ.
އޭގެ ކުރިން ބައެއް މީހުން މިނިސްޓްރީ ތެރެއަށް ވެސް ވަދެގަތެވެ. ވަންނަން އުޅުމުގެ ތެރޭގައި ބައެއް ހަމަނުޖެހުން ހިނގި މަންޒަރު ފެންނަ ވީޑިއޯތައް ވެސް ސޯޝަލް މީޑިއާގައި އެބަ ދައުރުވެ އެވެ.
ހައިދަރު މީގެ ކުރިން ވިދާޅުވީ ފްލެޓުގެ ހައްގުވެރިންނަށް މި އަހަރު ތެރޭގައި އެ ފްލެޓްތައް ހަވާލުކޮށް ނިންމާނެ ކަމަށެވެ.
ނިމިދިޔަ ސަރުކާރުން "އިވޭލުއޭޓް'' ކޮށް ފްލެޓްގެ ހައްގުވެރިންނަށް ލިޔުން ހަވާލުކޮށް އެއްބަސްވުންތަކުގައި ސޮއިކޮށްފައިވާ އިރު އާ ސަރުކާރަކުން އައިސް ރައްޔިތުންގެ ހައްގު ނިގުޅައި އެބަޔަކު ބޭނުންވާ ބަޔަކަށް ފްލެޓްތައް ދިނުމަށް މަަސައްކަތް ކުރަމުން އަންނަ ކަމަށް ގިނަ ފަރާތްތަކުން އަންނަނީ ބުނަމުންނެވެ.
ރައީސް ޑރ މުހައްމަދު މުއިއްޒުގެ ވެރިކަމަށް މިއަދު އަހަރެއް ވީ އިރު، ރައްޔިތުންގެ ހުރިހާ ހައްގުތަކެއް ނިގުޅައިގަންނަމުން އަންނަ ކަމަށާއި ރައްޔިތުންނަށް ހެޔޮ އެދިގެން މިހާތަނަށް ކުރެވުނު އެއްވެސް މަސައްކަތެއް ނެތް ކަމަށްވެސް މި ފަރާތްތަކުން އަންނަނީ ބުނަމުންނެވެ.
ގައުމުގެ އިގްތިސާދީ ހާލަތު ދަށްކަމަށް ބުނެ ރައްޔިތުންގެ ކަންކަމަށް މުއިއްޒުގެ އަނިޔާވެރި ސަރުކާރުން އަންނަނީ "ނޯ" ޖަހަމުންނެވެ.
