ހައުސިން މިނިސްޓްރީ ސަރުކާރުން މިއަދު އުވައިލާ އެ މަގާމުގައު ހުންނެވި ޑރ. އަލީ ހައިދަރު ހަޔަ އެޑިއުކޭޝަން މިނިސްޓަރުގެ މަގާމަށް ބަދަލުކޮށްފި އެވެ.

މިބަދަލާއިއެކު، ހަޔާ އެޑިޔުކޭޝަން މިނިސްޓަރަކަށް ހުންނެވި ޑރ. މަރިޔަމް މާރިޔާ ދެން ހުންނަވާނީ އެނިމަލް ވެލްފެއާ އެންޑް އެގްރިކަލްޗާ މިނިސްޓަރަކަށެވެ. ކެބިނެޓަށް މި ބަދަލު ގެނައިއިރު، އޭނާ ހުންނެވީ އެ މިނިސްޓްރީގައި ކުރިން އިންނެވި ޑރ. އައިޝަތު ރަމީލާ މަގާމުން އިސްތިއުފާ ދެއްވުމާ ގުޅިގެން އެ މިނިސްޓްރީ ހިންގެވުމާ ވަގުތީ ގޮތުން ހަވާލުވެވަޑައިގެންނެވެ.

ރައީސް މުއިއްޒު ހައުސިން މިނިސްޓްރީ އުވައިލެއްވިއިރު އެ މިނިސްޓްރީއަކީ މި ސަރުކާރުގައި އެންމެ ގިނަ ބައެއްގެ ފާޑުކިޔުން އަމާޒުވެފައި އޮތް މިނިސްޓްރީ އެވެ. ހާއްސަކޮށް ކުރީ ސަރުކާރުން ހިންގި ގެދޮރުވެރިޔާ ސްކީމުގެ ދަށުން ފުލެޓު ލިބުނު ފަރާތްތަކުގެ ލިސްޓު އިއުލާނުނުކުރެވި ލަސްވަމުންދާތީ މިނިސްޓަރަށް ބޮޑެތި ފާޑުކިޔުންތައް އަމާޒުވެފައިވެ އެވެ.

ހައިދަރު ހައުސިން މިނިސްޓަރުގެ މަގާމުން ދުރުކޮށް އެހެން މިނިސްޓްރީއަކަށް ބަދަލުކޮށްފައި ވަނީ "ބިންވެރިޔާ" އާއި "ގެދޮރުވެރިޔާ" ސްކީމްގެ ތެރެއިން ގަވާއިދާ ހިލާފަށް ގޯއްޗާއި ފްލެޓްތަކެއް، ހައްގު ނޫން ބަޔަލަށް ދިން ކަމަށް ތުހުމަތު ކުރެވޭ މައްސަލަތަކެއް ފެންމަތިވެ، ފުލުހުންނާއި އޭސީސީން ވެސް އެ މައްސަލަ ތަހުގީގު ކުރަމުން އަންނަމިކޮށެވެ.

އަނެއްކޮޅުން ދާދި ފަހުން ހައުސިން މިނިސްޓްރީ ހިންގަމުން އައި އިމާރާތް އަނދައި ހުލުވި ހާދިސާގައި މިނިސްޓްރީގެ އެތަކެއް ލިޔެކިޔުންތަކެއް ގެއްލިގެން ގޮސްފައިވެ އެވެ.

ދެ މިނިސްޓްރީ އެއްކޮށްލައި ހައިދަރާއި މާރިޔާގެ މިނިސްޓްރީ ބަދަލުކުރި ސަބަބެއް އަދި ނޭނގެ އެވެ. މިނިސްޓްރީތަކަށް ގެނައި އަނެއް ބަދަލަކީ ކުރިން ހައުސިންއިން ކުރަމުން އައި ޕްލޭނިން މަސައްކަތްތައް ފިނޭންސް މިނިސްޓްރީގެ ދަށަށް ބަދަލުކުރުމެވެ. މިހާރު އެ މިނިސްޓްރީއަކީ ފިނޭންސް އެންޑް ޕްލޭނިން މިނިސްޓްރީ އެވެ.

ކެބިނެޓަށް މި ގެނައި ބަދަލާއެކީ، މިހާރު ސަރުކާރުގައި އޮންނަނީ 21 މިނިސްޓްރީއެކެވެ. މިއީ ވެރިކަމާ ހަވާލުވީ ފަހުން މި ހިނގި އަހަރަކާއި ދެ މަހެއްހާ ދުވަހުގެ ތެރޭގައި ކެބިނެޓަށް ގެނައި ދެވަނަ ބަދަލެވެ.

ކުރިން ކެބިނެޓަށް ބަދަލު ގެނައީ ފިނޭންސް މިނިސްޓަރަކަށް ހުންނެވި ޑރ. މުހައްމަދު ޝަފީގު މަގާމުން އިސްތިއުފާ ދެއްވުމާ ގުޅިގެން ގެނައި ބަދަލުތަކެކެވެ.