ރައީސް ޑރ. މުހައްމަދު މުއިއްޒުގެ ސަރުކާރުގެ މަކަރުވެރި ސިޔާސަތު ތަންފީޒު ކުރުމުގައި އެންމެ ކުރީގައި އުޅުއްވަނީ ހައުސިން މިނިސްޓަރު ޑރ. ހައިދަރު ކަމަށް ބުނެ ގިނަ ބަޔަކު މިނިސްޓަރު ހައިދަރުގެ ފިތުނައާއި ދޮގުން ގައުމު ސަލާމަތް ކުރަން ތެދުވުމަށް ގޮވާލައިފި އެވެ.

ގިނަ ރައްޔިތުންގެ ނުރުހުން ހައިދަރު އަށް އަމާޒުވީ ފްލެޓް ލިސްޓް އާންމު ކުރާނެ ކަމަށް ބުނެ ފާއިތުވި އެއް އަހަރު ދުވަހު އޭނާ ހައްދަވަމުންދިޔަ ދޮގުތަކުގެ ސަބަބުން ނެވެ.

ފްލެޓް ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދިނުމަށް ފަހު މި ފަހުން ހައުސިން މިނިސްޓަރު ޑރ. އަލީ ހައިދަރު ވަނީ އިތުރު ދެ ތާރީހެއް ދެއްވާފަ އެވެ. ފަހުން ދެއްވި ތާރީހު އިއްޔެ އަށް ވަނީ ހަމަވެފަ އެވެ.

ނަމަވެސް ހައިދަރު މިހާރު ވަނީ ގެދޮރުވެރިޔާ ސްކީމުގެ ދަށުން ހުޅުމާލެ 2 ގައި އިމާރާތް ކުރަމުން އަންނަ 4،000 ފްލެޓު ލިބުނު މީހުންގެ ލިސްޓު އާންމުކުރުން މުއްދަތެއް ނެތް ގޮތަށް ފަސްކޮށްފަ އެވެ.

މިކަމާއި ހިންހަމަ ނުޖެހިގެން މީހަކު ކުރި ޕޯސްޓެއްގައި ބުނީ މީ ކުރީ ސަރުކާރު ނަމަ، ވެރިޔަކަށް ހުރި މީހާ "ވައްޓާލަން" މިހާރު ގޮވާނެ ކަމަށެވެ. އޭނާ އިތުރަށް ބުނީ ލިސްޓް ކަމުނުދަންޔާ ދެން އަލުން ހުޅުވާލަންވީ ކަމަށެވެ. އަދި ބުނީ ތި އުޅެނީ އަސްލު ބޭނުންވާ ބަޔަކުގެ ނަން ލިސްޓް ގައި ނެތީމަ އެނަންތައް އިތުރު ކުރަން ކަމަށާއި ނުވަންޔާ އިސްތިއުފާ ދީފަ ގޭގަ ހައިދަރު ވެސް މަޑުކުރަން ވެއްޖެ ކަމަށެވެ.

އިތުރު މީހަކު ބުނީ ނޫސްވެރިޔަކު ސުވާލުކުރުމުން ހައިދަރު މިހަފްތާނިމުމުގެ ކުރިން ފުލެޓް ލިސްޓް ނެރޭނެ ކަމަށް ބުނި ވާހަކަ އޭނާ އަޑުއެހިކަމަށެވެ. އޭނާ ދެން މުއިއްޒު އަށާއި ހައިދަރު އަށް ކުރީ ސުވާލެކެވެ. މިހާރު މަނިކުފާނު ގަބޫލު ކޮށްފިންތޯ ރައްޔިތުން ކުރިމަތީ މަނިކުފާނުގެ އިތުބާރުގެއްލި އަގުވެއްޓިއްޖެ ކަމަށް،..؟ ރައީސް ހުވައެއް ކުރައްވައިގެން ހުރެ ރައްޔިތުންނަށް ތިހާވަރަށް އޮޅުވާ ތިލައްވަނީ ކީއްވެ ހެއްޔެވެ..؟ ރައްޔިތުން ކުރީ ކޮން ކުށެއް ހެއްޔެވެ؟

އިތުރު މީހަކު ބުނީ މާރިޔާ ބުނާހެން މުއިއްޒުއާއި އޭނާގެ ކެބިނެޓްގެ ދޮގު ހެދުމުގެ މިވަރެއް ހަޔާތުގައި ވެސް ނުދެކެން ކަމަށާއި ދެރައީ އޮރިޔާން ނިވާ ކުރާނަމޭ ހިތާ ފަޓްލޫނާ ގަމީން ލާތީ ކަމަށެވެ.

ފްލެޓް ލިޔުން ލިބިފައި އޮތް މީހަކު ބުނީ އަސްލު ވަރަށް ދެރަވެ، މާޔޫސްވެއްޖެ ކަމަށެވެ. އޭނާ ދެން ހައިދަރު އަށް ދިނީ ނަސޭހަތެކެވެ. "ހެޔޮ ނުވާނެ ތަންކޮޅެއް ރަހުމް ހުރެބަލަ، ﷲ އަށް ބިރު ވެތިވޭ ކަލޭ ވެސް މަރު ވާނެ" އެވެ.

އިތުރު މީހަކު ބުނީ ހައިދަރު އިސްތިއުފާ ދިނުމަށް ލަސް ވެއްޖެ ކަމަށާއި "މީނާއަކަށް މިކަމެއް ނުވި" ކަމަށެވެ. އަދި މުނާފިގެއްކިބައިގައި ހުރި ހުރިހާ ސިފައެއް ހައިދަރުގެ ކިބައިން ފެންނަ ކަމަށެވެ. އެއީ ދޮގުހެދުމާއި ވައުދެއްކޮށްފިނަމަ އެވައުދަކާ ޚިލާފުވުމާއި އަދި އަމާނާތަކާ ހަވާލުވެއްޖެނަމަ އެ އަމާނާތަކަށް ޚިޔާނާތްތެރިވުން ކަމަށެވެ.

ތެދެކެވެ، "މުނާފިގުންގެ ކިބައިން ފެންނާނެ ތިން އަލާމާތެއްވެ އެވެ. (އެ ތިން އަލާމާތަކީ) ވާހަކަ ދައްކާނަމަ ދޮގުހަދާނެއެވެ. ވައުދެއްކޮށްފިނަމަ އެވައުދަކާ ޚިލާފުވާނެއެވެ. އަދި އަމާނާތަކާ ހަވާލުވެއްޖެނަމަ އެ އަމާނާތަކަށް ޚިޔާނާތްތެރިވާނެއެވެ.'(ބުޚާރީ: 1/32)

އިތުރު މީހަކު ބުނީ މުއިއްޒުގެ ވެރިކަމަށް އެއް އަހަހރު ވީއިރު މި ފެންނަނީ ހުދުމުހުތާރު ވެރިކަމަކާ ދިމާއަށް ރާއްޖެ މިސްރާބު ޖަހާފައިވާތަނެވެ. އަމިއްލަ އެދުމުން ފޯވެ ދައުލަތް އަމިއްލަ މިލްކަކަށް ހަދައިގެން އަނިޔާވެރި ޑިކްޓޭޓަރެއް ގައުމު ލޫޑުވާތަނެވެ. މިއަދު މުއިއްޒު ވެރިކަން ހިންގަވަން ގެންގުޅޭ "ސްޓްރެޓަޖީ" އަކީ ރައްޔިތުންގެ ހިތުގައި ބިރު އުފައްދައިގެން ދޮގު ހެދުމެވެ. އަދި ރައްޔިތުންގެ ކަންކަމަށް ސަރުކާރުން އަންނަނީ އަބަދުވެސް "ނޯ" ޖަހަމުންނެވެ. ރައްޔިތުން މާޔޫސްކޮށް އެތައް ދަޅައެއް ދައްކައިގެން ވެރިކަމަށް ވަޑައިގެން، ރައްޔިތުންނަށް ޖެއްސެވީ ބަލާވެރި ކަމެކެވެ.