ކެންސަރު ބަލި ޖެހިގެން ދުނިޔޭގައި އަހަރަކު 10 މިލިއަން މީހުން މަރުވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.


ދުނިޔޭގެ ކެންސަރު ބަލީގެ ދުވަހާއި ގުޅިގެން އެޗްޕީއޭއިން ނެރުނު ބަޔާނެއްގައި ބުނެފައިވަނީ، ކެންސަރަކީ ހަށިގަނޑުގެ ބައެއް ސެލްތައް އުފެދޭ އުފެދުން ކޮންޓްރޯލުން ނެއްޓި އާދަޔާ ޚިލާފަށް ސެލްތައް އުފެދުމުން ޖެހޭ ބަލިބަލީގެ ތެރެއިން ބައްޔެއް ކަމަށެވެ.


ކެންސަރު ބައްޔަކީ ދުނިޔޭގެ ދެވަނައަށް އެންމެ ގިނައިން މީހުން މަރުވާ އެއް ސަބަބަށްވާއިރު، ދުނިޔޭގައި އަހަރަކު 10 މިލިއަން މީހުން މި ބަލި ޖެހިގެން މަރުވާ ކަމަށް އެޗްޕީއޭއިން ވަނީ ބުނެފައެވެ.

މީގެ ތެރެއިން ގިނަ މީހުންނަކީ ދިރިއުޅުމުގެ ވައްޓަފާޅީގެ ގޮތުން ނުރަނގަޅު އެކި އާދަތަކުގެ ސަބަބުން ކެންސަރުބަލި ޖެހި މަރުވާ މީހުންނެވެ.

ދިވެހިރާއްޖޭގައި އެންމެ ގިނައިން މީހުން މަރުވާ ތިން ސަބަބުތަކުގެ ތެރޭގައި ކެންސަރު ހިމެނެއެވެ. ދުނިޔޭގެ ސިއްހަތު ޖަމްއިއްޔާއިން އަންދާޒާކުރާ 2020 ވަނަ އަހަރުގެ ތަފާސް ހިސާބުތަކުން ދައްކާގޮތުގައި ދިވެހިރާއްޖޭގައި އަހަރަކު މަރުވާ މީހުންގެ 17 އިންސައްތަ މީހުން މަރުވަނީވެސް ކެންސަރު ބަލީގައެވެ.

ކެންސަރު ބަލީގެ ދުވަސް ކޮންމެ އަހަރަކުވެސް ފާހަގަކުރަނީ ފެބްރުއަރީ މަހުގެ 4 ވަނަ ދުވަހުއެވެ.

މިއަހަރަށް ދުނިޔޭގެ ކެންސަރު ދުވަހަށް ކަނޑައަޅާފައިވާ ޝިއާރަކީ "ފަރުވާގެ ފަރަގު ކުޑަކުރަމާ" އެވެ. މި ދުވަސް ފާހަގަކުރުމަށް އެންމެ ބޮޑު އިސްކަމެއް ދީގެން ބަލިން ރައްކާތެރިވުމަށް ބައްޔާމެދު މީހުން ހޭލުންތެރިކޮށް ބަލި ޖެހުމުން ފަރުވާ ހޯދާނެގޮތާއި ގުޅޭގޮތުން މައުލޫމާތު ފޯރުކޮށްދެއެވެ.