ޑޮލަރު މާރުކުރުމާ ގުޅޭ ގޮތުން މި ސަރުކާރުން އެކުލަވާލާފައިވާ އާ ސިޔާސަތުގެ ސަބަބުން ކަޅު ބާޒާރުގައި ޑޮލަރުގެ ރޭޓު މަތިވަމުން ގޮސް މިއަދު ކަޅު ބާޒާރުގައި އެމެރިކާ ޑޮލަރެއް ގަންނަން ލިބެނީ 20 ރުފިޔާ އަށެވެ.

މީގެ ބާރަ މަސްކުރިން ބާޒާރުގައި، ޑޮލަރެއްގެ އަގު ކަޅު ބާޒާރުގައި ހުރީ 17ރ. އަށެވެ. ނަމަވެސް ކަޅު ބާޒާރުގައި ޑޮލަރުގެ މުއާމަލާތް ކުރާ އެކި ރޭޓުތައް ކުއްލިއަކަށް ވަނީ އިތުރަށް އުފުލެން ފަށައިފަ އެވެ. މިހާރު އަގުތައް ހުރީ 19.50 އާއި 20.00 ރުފިޔާއާ ދެމެދުގަ އެވެ. އަދި ބައެއް ބްލެކް މާކެޓް އޮންލައިން ޕޭޖްތަކުން އަންނަނީ 20.10ރ. އަށްވެސް ޑޮލަރު ވިއްކަމުންނެވެ.

މިިދިޔަ އޮކްޓޯބަރު 1، ގައި އެމްއެމްއޭއިން އިއުލާނު ކުރި ގަވާއިދުގައިވާ ގޮތުން ރާއްޖޭގެ ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުވެ އެވެ.

ނަމަވެސް އެ ގަވާއިދަށް އަމަލު ނުކުރާނެކަން ރާއްޖޭގެ 55 އަށްވުރެ ގިނަ ރިސޯޓުގެ ވެރިން ވަނީ އެމްއެމްއޭއަށް އަންގައިފަ އެވެ. އަދި މިގަވާއިދުގެ ސަބަބުން ބައެއް ރިސޯޓްތަކުން މިހާރު ވަނީ ޑޮލަރުން މުވައްޒަފުންނަށް ސާވިސްޗާރޖް އަދި މުސާރަ ދިނުން ހުއްޓާލައިފަ އެވެ.

މިއަދު ކަޅު ބާޒާރުގައި ޑޮލަރު އަގު ބޮޑުވާން ދިމާވި އެއް ސަބަބަކީ މި އެވެ. ޑޮލަރުގެ އަގަށް މިހާ ބޮޑު ބަދަލެއް ކުއްލިއަކަށް މި އައި އަނެއް ސަބަބަކީ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވުމެވެ.

ރާއްޖޭގައި ޑޮލަރުގެ ރަސްމީ އަގަކީ 15:42ރ އެވެ. ނަމަވެސް މަރުކަޒީ ބޭންކް އެމްއެމްއޭ އަކީ، ޑޮލަރުގެ ތާށިކަން އަންނަ ދުވަސްވަރު ފައިސާގެ މާރުކޭޓްގެ ކޮންޓްރޯލް ހޯދޭ ފަދަ ގާބިލް އިދާރާއަކަށް ނުވާތީ، ޑޮލަރުުގެ މުއާމަލާތް ހިންގަނީ އަބަދުވެސް ކަޅު ބާޒާރުގަ އެވެ.

ގިނަ ބަޔަކު ތުހުމަތުކުރާ ގޮތުގައި ޑޮލަރުގެ ކަޅު ބާޒާރު ކޮންޓްރޯލްކުރަނީ ރާއްޖޭގެ ރިސޯޓަތަކުގެ މަހުޖަނުންނާއި ބިދޭސީން ނެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތީ ޑޮލަރު ލިމިޓު އުވައިލާނެކަމުގެ ވައުދުފުޅާ އެކުގައި އެވެ. އަދި ޑޮލަރުގެ އަގު އުފުލިގެން އުޅެން ދެން ނުޖެހޭނެ ކަމަށާއި ދެން ފެންނާނީ ޑޮލަރުގެ އަގު ހެޔޮވަމުން ދާތަން ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.

ނަމަވެސް ސަރުކާރަށް އަހަރެއް ވީއިރު ރައީސް އެ ވިދާޅުވާ ހާލަތު އަދި އުފަން ނުވެ އެވެ. ޑޮލަރުގެ އަގު ހެޔޮނުވެ ފަތުއަޑު ކިޔައިފާ ދަނީ ބޮޑު ވަމުން ނެވެ. މުޅި ސަރުކާރާއި ދައުލަތް ޑޮލަރަށް ޖެހި "ސައިޒް" ވަނީ އެވެ.