ނޫސްވެރިންނާއި މީޑިއާތަކުން ވަރަށް ބޮޑަށް ދެކޮޅު ހަދަމުން އަންނަ "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު" އަނބުރާ ގެންދަން ހުށަހަޅައިފި އެވެ.

މި ބިލްގެ ފުރަތަމަ ކިޔުން އިއްވާ މަޖިލީހަށް ތައާރަފުކޮށްފައިވަނީ މިމަހުގެ 13 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގަ އެވެ.

ބިލު ހުށަހެޅުއްވި ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ވިދާޅުވީ، އެ ބިލު އަނބުރާ މިހާރު ގެންގޮސްފައިވާ ކަމަށެވެ. ސަބަބެއް ކަމަށް ވިދާޅުވީ ތާއީދު ނެތުމުން ކަމަށެވެ.

ބައެއް ފަރާތްތަކުން ތުހުމަތުކުރާ ގޮތުގައި އެއީ ސަރުކާރުގެ ބިލެކެވެ. އެހެންނަމަވެސް، ސަރުކާރަށް ތާއީދުކުރައްވާ އަމިއްލަ މެންބަރަކު ލައްވާ ބިލު ހުށަހެޅުއްވީ ސަރުކާރަށް އެފަދައިން އިނގިލި ދިށްނުކުރެވޭނެތީ ކަމަށް ތުހުމަތުތައްކޮށްފައިވެއެވެ.

މީޑިއާތަކުން ނުރުހުން ފާޅުކުރަމުން ދަނީ މީޑިއާތަކުގެ މިނިވަންކަން ގެއްލި، ސަރުކާރުން ކޮންޓްރޯލް ނަގާފާނެތީ އެވެ. އެ ބިލާ ދެކޮޅަށް ނޫސްވެރިންގެ ހައްގުގައި މަސައްކަތްކުރާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިސް ނަގައިގެން "ހަތަރެއްގެ ހައްގުގައި" ނަމުގައި ކެމްޕެއިނެއް ވެސް ވަނީ ފަށައިފަ އެވެ.

އިދިކޮޅު އެމްޑީޕީންވެސް ވަނީ މި ބިލާމެދު ކަންބޮޑުވުންފާޅުކޮށްފަ އެވެ.