ރައީސް މުހައްމަދު މުއިއްޒާ އެމަނިކުފާނު ގެންގުޅުއްވާ ބޮޓުން، ރައްޔިތުންނާ ވިޔަފާރިވެރިން ޖައްސަައިފި ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، ޕީއެންއެފުން ހޯމަ ދުވަހުގެރޭ ބޭއްވި ޖަލްސާގައި ޑޮލަރު މާރުކުރމާ ގުޅޭ ގޮތުން ވާހަކަފުޅު ދައްކަވަމުންނެވެ.

އެގޮތުން ރައީސް ޔާމީން ވިދާޅުވީ، ޑޮލަރުގެ ތާށިކަން ދިމާވެގެން އުޅޭނީ ވެރިން ޑޮލަރުން ބޭކާރު ޚަރަދުތައް ކުރާތީ ކަމަށާ އެގޮތުން ވެރިކަމަށް އަހަރުވީއިރު ސަރުކާރުގެ ބޮޑެތި ވަފްދުތައް ރައީސުލްޖުމްހޫރިއްޔާވެސް ހިމެނޭހެން 14 ދަތުރުކުރައްވާފައިވާކަން ރައީސް ޔާމީން ފާހަގަކުރެއްވިއެވެ.

މީގެ އިތުރުން ރައީސް ޔާމީން ވިދާޅުވީ ޑޮލަރުގެ ކަންކަމާ ގުލޭ ގޮތުން ރައްޔިތުންނަށް މައުލޫމާތު ފޯރުކޮށްދެނީ ގޯސްކޮށް ކަމަށާ އެގޮތުން ވިޔަފާރިވެރިން ބަދުނާމުކުރަމުން ގެންދާކަމަށް ރައީސް ޔާމީން ވިދާޅުވިއެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓް ހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގައި ގަވާއިދެއް ގެޒެޓުކޮށްފައިވެއެވެ.

އެ ގަވާއިދު އުވާނުލައްވާނެކަމުގެ އިންޒާރު ރައީސް މުއިއްޒު ދެއްވީ ސަރުކާރަށް އެއް އަހަރު ފުރިގެން ސަރުކާރުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެގޮތުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގައި ގަވާއިދެއް އުފެއްދީ ގާނޫނު އަސާސީއާ އެއްގޮތަށް ކަމަށާއި މިކަމަށް ގާނޫނީ ގޮތުން ބާރު ލިއްބައި ދިނުމަށް މަޖިލިސް ތެރެއިން ފޮރެކްސް ގާނޫނެއްވެސް ވުޖޫދަށް ގެންނަވާނެކަމަށް ވެސް ރައީސް މުއިއްޒު ވިދާޅުވެފައިިވެއެވެ.

އެކަމަށް އިޝާރާތްކުރައްވާ ރައީސް ޔާމީން ވިދާޅުވީ، ގާނޫނުތަކަށް ބޯލަނބަން ޖެހޭ ކަމަށް ރައްޔިތުންނަށް ވިސްނާދެމުންދާއިރު ގާނޫނާ ގަވާއިދުތަކަށް އެންމެ ފުރަތަމަ އަމަލުކުރަން ޖެހޭ މީހާއަކީ ރައްޔިތުންގެ ޚާދިމުގެ ހައިސިއްޔަތުން އެތައް ލިޔުންތަކެއްގައި ސޮއިކުރާ ރައީސް މީހާ ކަމަށެވެ. ނަމަވެސް ރައްޔިތުންނަށް ގާނޫނުތަކަށް ބޯލަނބަން ޖެހޭ ކަމަށް ވިސްނާދޭން ރައީސް މުއިއްޒު ގެންދަވަނީ ގާނޫނުތަކުގައި ކޮޅުފައިން ޖަހަމުންނެވެ.

ރައީސް ޔާމީން ވަނީ އެމްއެމްއޭގެ ގާނޫނު ބަދަލުނުކުރާނެ ކަމަށް ރައީސް މުއިއްޒު ވިދާޅުވާއިރު އެއީ އެމަނިކުފާނާ ކިހިނެއް ގުޅުން އޮތްކަމެއްކަމާ މެދު ސުވާލު އުފައްދަވާފައެވެ. އަދި އެއީ ރައީސް މުއިއްޒަށް ގާނޫނުން ލިބޭ ބާރެއް ނޫންކަން ވެސް ރައީސް ޔާމީން ފާހަގަކުރައްވާފައިވެއެވެ.