ނުރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުހައްމަދު، ރޭ އިނގިރޭސިވިލާތަށް ފުރާވަޑައިގެންފި އެވެ.

ރައީސްގެ އޮފީހުން ބުނީ، މި ދަތުރުފުޅުގައި، ރައީސް ކުރައްވާ އިދާރީ މަސައްކަތްޕުޅުތަކުގެ ހަރަދާއި، އާއިލާއާއި އަމިއްލަފުޅު ކަންކަންވެސް ހިމެނޭގޮތުން، މުޅި ދަތުރުފުޅުގެ ހުރިހާ ހަރަދެއްވެސް ކުރައްވާނީ ރައީސް އަމިއްލަފުޅަށް ކަމަށެވެ.

އެ މަނިކުފާނު ދަތުރުފުޅަށް ފަހު އެނބުރި ވަޑައިގަންނަވާނެ ތާރީހެއް އެ އޮފީހުން ހާމައެއްނުކުރެ އެވެ.

މީގެ ކުރިން ރައީސް ނުރަސްމީ ދަތުރުފުޅުތަކުގައި ސިންގަޕޫރަށް ވަރަށް ގިނައިން ވަޑައިގެންފައިވެ އެވެ.

ނުރަސްމީ ދަތުރެއް ކަމަށް ބުނެ ރައީސް އިނގިރޭސިވިލާތަށް ޗުއްޓީއަށް ވަޑައިގެންނެވިއިރު އެމަނިކުފާނުގެ އިސްނެންގުވުމަށް ރައްޔިތުންގެ މަޖިލީހަށް މެމްބަރުން އިންތިހާބުވެވަޑައިގަންނަވާ ޕާޓީ ބަދަލު ކުރައްވައިފި ނަމަ، އެ މެންބަރެއްގެ ގޮނޑި ގެއްލޭ ގޮތަށް ގާނޫނުއަސާސީ އަށް ހުށަހެޅި އިސްލާހު މަޖިލިހުން އިއްޔެ ކުއްލިއަކަށް ފާސްކޮށް ރޭ ވަނީ ތަސްދީގު ކުރައްވައިފަ އެވެ.

މިއާއެކު މެންބަރުންނަށް ބުނެވޭ ބަހަކުން ކުރެވޭ ކަމަކުން ގޮޑި ގެއްލުމުގެ ފުރުސަތު ވަރަށް ބޮޑެވެ.