ސަރުކާރު އަހަރު ފުރުނުއިރު ފެނިގެން ދަނީ ބާރުވެރިކަން އެއްކުރުމުގެ ހުރިހާ ސިފައެއް އަށަގެންފައިވާ މަންޒަރު ކަމަށް އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ބިގޭ މިފަދައިން ވިދާޅުވެފައިވަނީ، ބުދަ ދުވަހު، ރައްޔިތުންގެ މަޖިލިސް ކައިރީގައި ކުރިއަށް ދިޔަ އިހުތިޖާޖުގެ ތެރެއިން ރާއްޖެޓީވީއަށް ދެއްވި އިންޓަރވިއުއެއްގައެވެ.

ބިގޭ އަދުގެ ސަރުކާރު ކޯލިޝަންގައި ހިމެނޭ ޕީޕީއެމް/ޕީއެންސީ ސިފަކުރީ ބާރުތައް އެއްކުރުމުގެ ވިސްނުން ގެންގުޅޭ ޕާޓީތަކެއްގެ ގޮތުގައެވެ. މީގެ އިތުރުން އޭނާ ވަނީ ދޮގާއި މަކަރާއި އޮޅުވާލައިގެން ވެރިކަމަށް އައިސް ރައީސް މުހައްމަދު މުއިއްޒު ރައްޔިތުންގެ ހައްގުތައް ހަނިކުރާކަމުގެ ތުހުމަތު ކޮށްފައެވެ.

އެގޮތުން މަޖިލިސް މެމްބަރުންގެ ބާރުތައް ހަނިކޮށް ތަޅުއަޅުވަމުންދާކަމަށް ވިދާޅުވެ ބިގޭ އިތުރަށް ވިދާޅުވީ، ބުދަ ދުވަހު ފާސްކޮށް ތަސްދީގުކުރި އިސްލާހާ އެކު މިހާރު ސަރުކާރުން މެމްބަރުން ކަސްތޮޅުއަޅުވާފައިވާކަމަށެވެ.

ރައީސް ޑރ.މުހައްމަދު މުއިއްޒު ހިތްހަމަ ނުޖެހޭ ގޮތަށް މެމްބަރަކަށް ދެން އެއްވެސް ކަމެއް ނުކުރެވޭނެ ކަމަށް އޭނާ ވަނީ ވިދާޅުވެފައެވެ. މިއީ މަޖިލީހުގެ ބާރު ކެނޑި އަޅުވެތިކަމަށް ވެއްޓުން ކަމަށް އޭނާ ވަނީ ސިފަކުރައްވާފައެވެ.