ޕީއެންސީގެ އެތެރޭގެ އިންތިހާބުގައި ވޯޓު ފޮށި ފަޅާލާ މާރާމާރީ ހިންގައިފިއެވެ.

އެގޮތުން ޕީއެންސީގެ ދާއިރާތަކުގެ މަގާމުތަކަށް މީހުން ހޮވުމަށް މިއަދު ކުރިއަށް ގެންދިޔަ އިންތިހާބުގައި ތ. ކަނޑޫދޫ ދާއިރާއަށް ވާދަކުރި ދެ ކެންޑިޑޭޓުންގެ މެދުގައި ހަމަނުޖެހުން ހިނގައި ވޯޓު ފޮށި ފަޅާލައިގެން ވޯޓު ކަރުދާސްތައް ވެސް އިންތިހާބީ މަރުކަޒުން ބޭރަށް ގެންގޮސްފައިވެއެވެ.

މީސް މީޑިޔާގައި ދައުރުވާ ވީޑިއޯއަކުން ފެންނަ ގޮތުގައި ބަހައްޓާފައި ހުރި ވޯޓު ފޮށްޓެއް ކައިރިއަށް މީހަކު ގޮސް ކައިރިވާން މަސައްކަތް ކުރުމުން އިތުރު މީހަކު ގޮސް ބައްދާ ތަނެވެ. ދެ މީހުން ބައްދައިގަނެގެން އޮޅުލަމުން ގޮސް ބިން މައްޗަށް ވެއްޓޭ މަންޒަރު ވެސް ވީޑިއޯއިން ފެނެއެވެ.

މައުލޫމާތު ލިބިފައިވާ ގޮތުގައި އެކަން ހިނގާފައިވަނީ، މެންދުރުފަހު 2:30 ހާއިރު ކަމަށެވެ. އަދި ހަމަނުޖެހުން ހިންގި ދެ ކެންޑިޑޭޓުންގެ ތެރެއިން އެކަކު ވޯޓު ފޮށި ފަޅާލައި ކަރުދާސްތައް އޭނާގެ ގެއަށް ގެންގޮސްފައިވެއެވެ.

މިފަދަ ހަމަނުޖެހުމެއް ވެރިކަން ކުރާ ޕާޓީގެ އެތެރޭގެ އިންތިހާބުގައި ހިނގާފައި މިވަނީ މައުލޫމާތު ލިބިފައިވާ ގޮތުގައި ވޯޓާސް ލިސްޓަށް އައި ބަދަލަކާ ގުޅިގެން ދެ މީހުން ހިތްހަމަނުޖެހިގެންނެވެ.

ޕީއެންސީގެ އެތެރޭގެ އިންތިހާބަށް ކުރިމަތިލި ކެންޑިޑޭޓުންގެ ލިސްޓު ނޮވެމްބަރު 13، ގައި އިއުލާނު ކުރިއިރު، ބައެއް ކެންޑިޑޭޓުންގެ ނަން އުނިކޮށް، ކުރިމަތި ނުލާ މީހުންގެ ނަން އިތުރު ކޮށްފައި ހުރުމުން ވަރަށް ބޮޑަށް މައްސަލަ ގޯސްވިއެވެ.

އެ ހިތްހަމަ ނުޖެހުމުގައި ބައެއް ކެންޑިޑޭޓުން އެމީހުންގެ ނަން ވެސް އަނބުރާ ގެންދިޔައެވެ.