ދުނިޔޭގެ އެއްވެސް މާލީ އިދާރާއަކުން މި ސަރުކާރުން އަޅާ "މާލީ ފިޔަވަޅު" ތަކަށް ތާއީދުކޮށް ވާހަކަ ނުދައްކާ ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.

ޗެނަލް13އަށ ދެއްވި ހާއްސަ ބަސްދީގަތުމެއްގައި ރައީސް ޔާމީން ވިދާޅުވީ މި އަންނަ އަހަރަށް ފާސްކުރާ ބަޖެޓުގެ ތެރޭގައި ހަރަދު ކުޑަކުރަން މުހިއްމު ފިޔަވަޅުތަކެއް އެބަހުރި ކަމަށާއި އެކަމު އެއީ، ސަރުކާރުގެ ތެރެއިން ހަރަދު ކުޑަނުކޮށް ރައްޔިތުންގެ އެންމެ އަސާސީ ދާއިރާތަކުން އެމީހުންނަށް އިތުރަށް ގެއްލުންތަކެއް ލިބޭނެ ކަންކަން ކަމަށެވެ.

މިކަމުން މިސާލެއް ދައްކަވަމުން އެމަނިކުފާނު ވިދާޅުވީ މަސްވެރިންނަށް ތެލުގެ ސަބްސިޑީ ކަނޑާލާ ކަރަންޓް ސަބްސިޑީ ކަނޑާލުމުން ކަރަންޓް ބިލުތައް ވެސް އުފުލިގެން ދާނެ ކަމަށާއި ކާޑުގެ ސަބްސިޓީ ކަޑާލާ އަދި ކާޑުން ޑިއުޓީ ނުނަގާނެ ކަން ވެސް ނޭނގޭ ކަމަށެވެ.

ރައީސް ޔާމީން ވިދާޅުވީ އާސަންދައަކީ އެންމެ ނިކަމެތި ރައްޔިތުންނަށް ދައުލަތުން ދޭ އެހީ ކަމަށެވެ. ނަމަވެސް އާސަންދަ އަށް ވެސް ހަރަދު ކުޑަކުރުމުގެ ބަދަލުތަކެއް އައުމާއިއެކު ފަގީރުންގެ ފަގީރުކަން އިތުރަށް ފަގީރުވާނެ ކަމަށެވެ.

ރައީސް ޔާމީން ވިދާޅުވީ މީހުންގެ އަތްމަތި ތަނަވަސް ނުވާ ކަމަށާއި ޑޮލަރުން ދިވެހި ރުފިޔާގެ އަގު މައްޗަށް ދިއުމުގެ ނަތީޖާއަކީ އެކަން އެޖެސްޓް ކުރުމަށް މާލޭގެ ރެންޓް ބޮޑުވެ، ދިރިއުޅުމުގެ ހަރަދާއި މިހުރިހާ އެއްޗެއް ބޮޑުވެގެން ދިޔުން ކަމަށެވެ.

އެމަނިކުފާނު ވިދާޅުވީ ވަރަށް ގިނަ މީހުންނަކީ މުސާރަ ވެރިންކަމަށާއި މުސާރަވެރިންގެ މުސާރަތައް ބޮޑު ނުވާނަމަ ކުރަންޖެހޭ ހަރަދު އިތުރު ވީކަމަށެވެ. އަދި ވިދާޅުވީ މި ސަރުކާރުގެ ހަރަދު ކުޑަ ކުރުމުގެ ސިޔާސަތުތަކެއް މަޖުބޫރުވެގެން ނަމަވެސް ދެން އެނޫން ގޮތެއް ނެތިގެން އެކަން ކޮށްފާނެ ކަމުގެ އިޝާރާތެއް މިފަހަރު މިފެންނަނީ އަންނަ އަހަރަށް ފާސްކުރާ ބަޖެޓުން ކަމަށެވެ.

ރައީސް ޔާމީން ދެން ކުރެއްވީ ސުވާލެކެވެ.

ވިދާޅުވީ އިބްރާހިމް މުހައްމަދު ސޯލިހް ސަރުކާރުން ކްރެޑިޓް ރޭޓިން ދަށްވެގެން ދިޔައީ އިޒްރޭލް ޕާސްޕޯޓް ހިފަހައްޓައިގެން ތޯ ކަމަށެވެ..؟

މި ސުވާލަށް ޖަވާބު ވެސް ދެއްވަމުން ރައީސް ޔާމީން ވިދާޅުވީ ޖަވާބަކީ "ނޫން" ކަމަށާއި އެމަނިކުފާނުގެ ސަރުކާރުކާރުގައި އިޒްރާއީލް މެދު ނަގައިފަ އޮތީ ވަރަށް ޓަފް ސްޓޭންޑެއް ކަމަށެވެ. އެގޮތުން އިޒްރޭލުގެ މުދާ ރާއްޖެ އިންޕޯޓް ކުރުން ހުއްޓުވާލި ކަމަށެވެ. ނަމަވެސް ކްރެޑިޓް ރޭޓިން ބީ ޕްލަސް ގައި ހިފެހެއްޓުނު ކަމަށް އެމަނިކުފާނު ވިދާޅުވި އެވެ.

ރައީސް ޔާމީން އިތުރަށް ވިދާޅުވީ ރައްޔިތުންގެ އާންމު ދިރިއުޅުމުގެ ހާލަތާއި ގުޅޭ ކަންކަމާއި ދައުލަތުގެ އެންމެ މުހިއްމު އެންމެ ބޮޑެތި ކަންކަމާއި ބެހޭ ގޮތުން ސިޔާސީ ޕޯޑިއަމްގައި ވާހަކަ ދައްކާ ގޮތަށް ވާހަކަ ދެއްކެވީމާ ރައްޔިތުންނަށް އެހާ ފަސޭހައެއް ނުވާނެ ކަމަށެވެ. އަދި އެކަން ރައްޔިތުން ބަލައި ނުގަންނާނެ ކަމަށެވެ.

ރާއްޖޭން ބޭރުގެ އެކި ފަރާތްތަކަށް ދައްކަން ޖެހޭ ދަރަނި ނުދެއްކި ޑީފޯލްޓަކަށް ދިޔުމުގެ ފުރުސަތު މިހާރު ވަރަށް ބޮޑު ކަމަށް ބުނެ ދުނިޔޭގެ އެންމެ އިތުބާރު ހިފޭ ކްރިޑިޓް ރޭޓިން އެޖެންސީ، ފިޗްއިން ރާއްޖޭގެ ރޭޓިން ވަނީ "ސީސީސީ ޕްލަސް"އަށް ދަށްކޮށްފަ އެވެ.  އެއީ މާލީ ހާލަތު ގޯސްވެ، ދަރަނި ނުދެއްކިދާނެ ފަދަ ވަރަށް ބޮޑު ފުރުސަތެއް އޮތް ގައުމުތަކަށް ދޭ ރޭޓިންއެކެވެ.

އަދި ބޭރުން ފައިސާ ނުލިބިއްޖެ ނަމަ ދަރަނި ނުދެއްކޭ ފަދަ ހާލަތަކަށް ރާއްޖެ ދިޔުމުގެ ފުރުސަތު ވަރަށް ބޮޑު ކަމަށް ލަފާކޮށް ދުނިޔޭގެ ކްރިޑިޓް ރޭޓިން އެޖެންސީ، މޫޑީސްއިން ވެސް ރާއްޖޭގެ ރޭޓިން ވަނީ ސެޕްޓެމްބަރު މަހު ދަށްކޮށްފަ އެވެ.

ކްރެޑިޓް ރޭޓިންއަކީ އިންވެސްޓަރުންނަށް އެ މީހުންގެ އިންވެސްޓުމެންޓުގެ ފައިދާ ނެގޭނެ މިންވަރާއި އެ ގައުމެއްގެ ދަރަނި އަދާކުރުމުގެ ގާބިލުކަން ހުރި މިންވަރު އަންދާޒާކުރެވޭ އިންޑިކޭޓަރެކެވެ. އިންވެސްޓަރުންގެ އިތުބާރު ހޯދުމަށް ރަނގަޅު ކްރެޑިޓް ރޭޓިންއެއް މުހިއްމުވަނީ މި ސަބަބާހުރެ އެވެ.

ކްރެޑިޓް ރޭޓިން ދަށްވުމަކީ އިންވެސްޓަރުންނަށް އޮތް ރިސްކު ބޮޑުކަން އަންގައިދޭ އިންޑިކޭޓާއެއް ވެސް މެއެވެ. މިއީ ދަރަނި ބޮޑުވެ، ދަރަނި ނުދެއްކޭ ހާލަތަށް އިގުތިސާދު ގޮސްދާނެ ކަމަށް ބެލެވޭ "މާލީ އިންޒާރެ" ކެވެ. އޭގެ އިތުރުން، ރޭޓިން ދަށްވުމުން އިންވެސްޓަރުންގެ ކޮންފިޑެންސް ވެސް ރާއްޖެއަށް ގެއްލޭނެ އެވެ. އެހެންކަމުން ކުރިއަށް އޮތް ދުވަސްތަކުގައި ރާއްޖެއަށް ބޭރު އިންވެސްޓުމަންޓު ގެނައުން ވާނީ ބޮޑު ގޮންޖެހުމަކަށެވެ.