ގއ. ކަނޑުހުޅުދޫގައި ރޭ ނުރައްކާތެރި މާރާމާރީއެއް ހިންގައި، ސީރިއަސް އަނިޔާތަކެއް ލިބިފައިވާ ކަމަށް މައުލޫމާތު ލިބިއްޖެއެވެ.
ފުލުހުން މައުލޫމާތު ހާމަކޮށްފައިވާ ގޮތުގައި ރޭ ކަނޑުހުޅުދޫގައި ދެމީހެއްގެ މެދުގައި މާރާމާރީ ހިނގި މައްސަލައެއް ފުލުހުންނަށް ވަނީ ރިޕޯޓުކޮށްފައެވެ.
މި މާރާމާރީގައި އަނިޔާވެފައިވަނީ ދެ މީހުންނަށް ކަމަށާއި، މި ދެމީހުންނަށް ގއ. އަތޮޅު ހޮސްޕިޓަލުގައި ފަރުވާދެމުން އަންނަ ކަމަށް ފުލުހުން ވިދާޅުވިއެވެ.
އެއީ އުމުރުން 37 އަހަރުގެ މީހަކާއި އުމުރުން 40 އަހަރުގެ ދިވެހި ފިރިހެނަކު ކަމަށް ފުލުހުން ވިދާޅުވެފައިވެއެވެ.
މި ހާދިސާއަކީ މަސްތުވާތަކެތީގެ މައްސަލައެއްގައި ހިނގާދިޔަ މާރާމާރީއެއް ކަމަށް އެ ރަށުން މައުލޫމާތު ލިބެއެވެ.
މި މާރާމާރީގައި އެކަކުގެ ކޮނޑު ކަށިގަނޑާއި ހަމައިން އިންޗެއް ކަފައިގެންގޮސް، އަތުގެ މުލައްދަނޑިން ވެސް އިންޗެއް ކަފައިގެން ގޮސްފައިވާ ކަމަށް އެ ރަށުން މައުލޫމާތު ލިބެއެވެ.
އަދި އެ މިހާގެ ލޭ މަނާނުވުމުގެ ސަބަބުން އިތުރު ފަރުވާއަށް މާލެ ފޮނުވާލުމުގެ މަސައްކަތް ކުރަމުންދާ ކަމަށް ވިދާޅުވިއެވެ.
ދެން ޒަހަމްވި މީހާ ބޮލުގެ ފުއްކިބައިން ދޮޅު އިންޗި ކަފައިގެންގޮސް، އޭނާގެ ކޮނޑު ހުޅަށް އަނިޔާވެފައިވީ ނަމަވެސް މިހާރު އެ މީހާގެ ހާލަތު ސްޓޭބަލްވަމުން އަންނަ ކަމަށްވެއެވެ.
