އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ)ގެ ރައީސް އަދި ނައިބު ރައީސް އައްޔަންކުރުމުގެ ބާރު ރައީސަށް ދިނުމަށް މަޖިލީހުގެ މިނިވަން މުއައްސާތަކުގެ ކޮމެޓީން ނިންމައިފި އެވެ.

އޭސީސީގެ ގާނޫނާއި އީސީގެ ގާނޫނަށް ސަރުކާރުގެ ފަރާތުން މިދިޔަ މަހު 24ގައި ހުށަހެޅި އެ ދެ ބިލު ބަލައިގަނެ، މި މަހު 5 ވަނަ ދުވަހު ދިރާސާ ކުުރުމަށް މިނިވަން މުއައްސަސާތަކާ ބެހޭ ކޮމިޓީއަށް އޮތީ ފޮނުވާފަ އެވެ.

އޭގެ ދެ ހަފްތާއެއްހާ ދުވަސް ފަހުން، މިދިޔަ ބުދަ ދުވަހު ކޮމިޓީން ވަނީ އެ ދެ ބިލު ދިރާސާކޮށް ނިންމައި ކޮމިޓީ ރިޕޯޓު ފާސްކޮށްފަ އެވެ.

ކޮމިޓީން ނިންމާފައި އޮތީ، ސަރުކާރުން ފޮނުވި ގޮތަށް އެއްވެސް އިސްލާހެއް ނުގެނެސް އެ ބިލު ފާސްކުރުމަށެވެ.

މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރުމަށް، ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅުއްވާނީ ރައީސުލްޖުމްހޫރިއްޔާ އެވެ.

މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެ އެވެ. އަދި، ގާނޫނަށް އަމަލުކުރަން ފެށުމުގެ ކުރިން ދެ ކޮމިޝަންގެ ރައީސާއި ނައިބު ރައީސް ވެސް ގާނޫނުގައިވާ ގޮތުގެ މަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ.

މިހާރު އޮންނަ ގޮތުން އެ ދެ ކޮމިޝަނުގައި ވެސް ރައީސް އަދި ނައިބު ރައީސަކަށް މީހަކު ހަމަޖައްސަނީ ކޮމިޝަންގެ މެންބަރުންގެ ތެރެއިން އެ މެންބަރުންގެ މެދުގައި ނަގާ ވޯޓަކުންނެވެ.

މި އިސްލާހާއެކު މިނިވަން ކޮމިޝަންތަކަށް ސަރުކާރުގެ ނުފޫޒު ވަންނާނެކަމަށް ބުނެ އިދިކޮޅުން ވަނީ ކަންބޮޑުވުން ފާޅުކޮށްފަ އެވެ.

މިފަހުން ސަރުކާރުން ވަނީ ގާނޫނުއަސާސީއަށް ކުއްލި އިސްލާހެއް ގެންނަވާ މަޖިލިސް މެންބަރުން ވެސް ރައީސްގެ "މުށުތެރެއަށް" ލައްވާ ފިއްތަވާލައްވާފަ އެވެ.

ގާނޫނުއަސާސީ އަށް ގެނައި އިސްލާހުގައި ބުނާ ގޮތުން ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ސިޔާސީ ޕާޓީއަކުން އަމިއްލަ އަށް ވަކިވެއްޖެ ނަމަ ނުވަތަ ޕާޓީން ވަކިކޮށްފި ނަމަ ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލިހުގެ މެންބަރުކަމުން ވަކިވާނެ އެވެ.