އެންޓި ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަން (އީސީ)ގެ ނައިބު ރައީސުން ހިމެނޭހެން ދެ ކޮމިޝަންގެ ފަސް މެންބަރުން ވަކިކުރަން މިނިވަން މުއައްސަސާތަކާ ބެހޭ ކޮމިޓީއިން ނިންމައިިފިއެވެ.

އޭސީސީގެ މެންބަރުންގެ ތެރެއިން ވަކިކުރަން ނިންމާފައިވަނީ ކޮމިޝަނުގެ ނައިބު ރައީސް އަބްދުއްސަލާމާއި ކޮމިޝަނުގެ މެންބަރު ތޯހާ މުހައްމަދެވެ. އެ ދެ ބޭފުޅުން މަގާމުން ވަކިކުރުމުގެ މައްސަލަ ބެލުމަށް ކޮމިޓީން މަޖިލީހަށް ހުށަހެޅީ އޭސީސީގެ މެންބަރުންގެ ސުލޫކާ ހިލާފަށް އެހެން ފަރާތެއްގެ ނުފޫޒަށް ލެނބުމުގެ ތުހުމަތުގައެވެ.

އީސީގެ މެމްބަރުންގެ ތެރެއިން ވަކިކުރަން ނިންމާފައިވަނީ، އީސީގެ ނައިބު ރައީސް އަލީ ނަޝާތާއި މުހައްމަދު އާސިފް އަދި ޑރ. މުހައްމަދު ޒާހިރުއެވެ.

ސިއްރު ކޮމިޓީއެއްގައި މިނިންމުން މަޖިލީހުން ނިންމާފައިވާއިރު، އެ ބޭފުޅުންނަށް ކުރާ ތުހުމަތުތައް މަތިމަތިން ހާމަކުރި ނަމަވެސް އެއިން އެއްވެސް ތުހުމަތެއް ކުރެވޭ ގޮތަށް އެ ބޭފުޅުން ކުރެއްވި އަމަލެއް ކޮމިޓީން ހާމަނުކުރެއެވެ.

އޭސީސީ މެންބަރުން ފޮނުވުމުގެ މައްސަލައާ ގުޅިގެން ކޮމިޓީން މަޖިލީހަށް ފޮނުވި ސިޓީގައި ބުނެފައިވަނީ އޭސީސީގެ ގާނޫނުައި ކޮމިޝަނުގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެންނުވާނެ ކަމުގައި ބުނާ މާއްދާއާއި، އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތު އިސްކޮށްގެންނުވާނެ ކަމުގައި ބުނެފައިވާ މާއްދާއާ އެ މެންބަރުން ހިލާފުވެފައިވާ ކަމަށެވެ.

އީސީގެ މެންބަރުން ވަކިކުރުމާ ގުޅޭ ގޮތުން މަޖިލީހުގެ އަމީން އާންމު އިއްވެވި ސިޓީގައި ހަމައެކަނި ބުނެފައިވަނީ ސުލޫކީ މިންގަނޑާ ހިލާފުވެއްޖެނަމަ އެ މެންބަރަކު މަގާމުގައި ދެމިހުރުމަށް އެކަށީގެންނުވާ ކަމަށް ބަލައި ވަކިކުރެވޭނެކަމަށް އެ ކޮމިޝަނުގެ ގާނޫނުގައި ބުނެފައިވާ ކަމަށެވެ.

މިފަދަ ނިންމުމެއް ނިންމާފައި މިވަނީ އޭސީސީއާއި އީސީގެ ރައީސުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދޭގޮތަށް ގާނޫނަށް ބަދަލުގެންނަން ސަރުކާރުގެ ފަރާތުން ރައްޔިތުންގެ މަޖިލީހަށް ދެ ބިލެއް ހުށަހަޅާފައިވެސް ވަނިކޮށެވެ.