ރައްޔިތުން މެންބަރުންނަށް ހަވާލުކުރި މަސްއޫލިއްޔަތަށް އިހުމާލުވެފައިވާ ކަމަށާއި އެ މެންބަރުން އެންމެ ފަހުން ހިފީ ރައްޔިތުންގެ ކަރުގައި ކަމަށް ރައްޔިތުންގެ ޚާއްޞަ މަޖިލީހުގައި އައު ޤާނޫނު އަސާސީ ޑްރާފްޓުކުރި ކޮމިޓީގެ މުޤައްރިރު އަދި އެމްޑީޕީގެ ފުރަތަމަ ރައީސް އިބްރާހީމް އިސްމާޢީލް (އިބުރާ) ވިދާޅުވެއްޖެއެވެ.

މީޑިޔާތަކަށް ދެއްވި އިންޓަވިއުއެއްގައި ވާހަކަ ދައްކަވަމުން އިބްރާ ވިދާޅުވީ މިހާރު އަމަލުކުރަމުންދާ ފެހި ގާނޫނު އަސާސީއަކީ ވަރަށް ގިނަ ދުވަހުގެ މަސައްކަތާއި ދިރާސާތަކުން ތައްޔާރުކޮށްފައިވާ ގާނޫނު އަސާސީއެއް ކަމަށެވެ.

އެހެންކަމުން މިފަދަ ބުރަ މަސައްކަތުގެ އަގު ވަޒަން ނުކޮށް އަމިއްލަ މަންފާއަށް މި ސަރުކާރުން ގާނޫނު އަސާސީ ބަދަލުކުރުމުން އިބްރާ ވަނީ ވަރަށް ބޮޑަށް ފާޑުވިދާޅުވެފައެވެ.

ދިވެހިންގެ ވިސްނުން އަދިވެސް ހުރީ ގަބީލާ ވިސްނުން ކަމަށާއި ރައްޔިތުންގެ ބާރު ނުވަތަ ޒިންމާ ރައްޔިތުންނަށް އިގެން ޖެހޭ ކަމަށް އިބްރާ ވިދާޅުވިއެވެ.

މީގެ އިތުރުން، ރައްޔިތުންގެ މަޖިލީހުން ގޯހެއް ހެދުމުން އެކަމުގެ “އަދަބު” ރައްޔިތުން ދޭން ޖެހޭނީ ދެން އަންނަ އިންތިޚާބަކުން ކަމަށް އިބްރާ ފާހަގަކުރެއްވިއެވެ.