މަޖިލިސް ރައީސް އަބްދުއްރަހީމުގެ ދާއިރާ ރައްޔިތުންތަކެއް އަސާސީ ހިދުމަތަކުން މަހްރޫމުވެފައި ތިބޭތާ ދެ ދުވަސްވެއްޖެކަން ހާމަވެއްޖެއެވެ.

އެގޮތުން އަދުރޭގެ ދާއިރާގައި ހިމެނޭ މާމެންދޫގައި ކަރަންޓާއި ފެނުގެ ހިދުމަތް ކެނޑިފައި އޮންނަތާ ދެ ދުވަސްވެފައިވާއިރު އެ ރަށުގެ ރައްޔިތުން ގެންދަނީ އެކަމާ ދެކޮޅަށް އިހުތިޖާޖު ކުރަމުން ކަމަށް "ތޭރަ އޮންލައިން" އަށް މައުލޫމާތު ލިބިފައިވެއެވެ.

އެރަށުން ކަރަންޓާއި ފެނުގެ ހިދުމަތް މެދުކެނޑުނީ 400 ކިލޯވޮޓްގެ ދެ ޖެނެރޭޓަރު ހަލާކުވުމުގެ ސަބަބުންނެވެ. އެ ދެ ޖެނެރޭޓަރު ހެދުމުގެ މަސައްކަތް އެ ރަށަށް ކަރަންޓު ފޯރުކޮށްދޭން ފެނަކައިން ގެނައި ސްޕެއަރ ޕާޓްސްއަކީ ބައުވެފައި ހުރި ބޭނުން ނުކުރެވޭ އެއްޗެހިކަމަށް ވުމުން ރައްޔިތުން ވަނީ ރަށަށް އެ އެއްޗެހި އެރުވިޔަ ނުދީ ހިފަހައްޓާފައެވެ.

މައުލޫމާތު ލިބިފައިވާ ގޮތުގައި ކަރަންޓު ދެމުން ގެންދަނީ ރަށުގެ ބައި ބަޔަށް ގަޑި ބަހައިގެންނެވެ. އަދި މައްސަލަ ހައްލުކުރެވި، ކަރަންޓާއި ފެނުގެ ހިދުމަތް ދެވެން ފެށޭނެ ވަގުތެއް ނޭނގޭ ކަމަށްވެސް ވަނީ މައުލޫމާތު ލިބިފައެވެ.

މިކަމާ ގުޅިގެން ރަށުގެ ރައްޔިތުން ދަނީ އިހުތިޖާޖުކޮށް އަދި ދާއިރާގެ މެމްބަރު އަދުރޭގެ އިސްތިއުފާވެސް ގޮވާމުންނެވެ.

700 މީހުންގެ އާބާދީއެއް ދިރިއުޅެމުންދާ މާމެންދޫގައި ހުރި 400 ކިލޯ ވޮޓްގެ ދެ ޖެނެރޭޓަރާއި 260 ކިލޯ ވޮޓްގެ ޖެނެރޭޓަރުގެ ތެރެއިން 400 ކިލޯ ވޮޓްގެ އެއް ޖެނެރޭޓަރު މީގެ ދުވަސްތަކެއް ކުރިން ހަލާކުވެ، 400 ކިލޯ ވޮޓްގެ ދެ ވަނަ ޖެނެރޭޓަރު ހަލާކުވީ ދެ ދުވަހެއް ކުރިން ކަމަށް މައުލޫމާތު ލިބިފައިވެއެވެ.

މި ސަރުކާރުގައި ރައްޔިތުން ހާލުގައި ނުޖެހޭނެ ކަމަށާ އަސާސީ ޚިދުމަތްތަކުން މަހްރޫމު ނުކުރާނެކަމަށް ބުނެ އައިސް މި ފެންނަމުން ދަނީ ދައުލަތުގެ ތިން ބާރުން އެއް ބާރުގެ ވެރިޔާގެ ދާއިރާގެ ރައްޔިތުންތަކެއް ނުހަނު ހާލުގައި އުޅެމުންދާ މަންޒަރެވެ.