މާލޭގައި ހުންނަ ފުރުގާން މިސްކިތަށް ގެއްލުންތަކެއް ދިން މީހާ ހައްޔަރުކޮށްފި އެވެ.

މި މައްސަލާގައި ހައްޔަރުކުރީ ނައުޝާދު މޫސާ 30، ގ. މާލެހިޔާ 2-02-13 އެވެ.

ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން 15 ދުވަސް ބަންދުކޮށްފައި ބަހައްޓަން ކޯޓުން އަމުރު ކުރި ކަމަށެވެ.

ފުރުގާން މިސްކިތަށް ދީފައިވާ ގެއްލުންތަކުގެ ވީޑިއޯއެއް ސޯޝަލްމީޑިއާގައި އާންމުކޮށްފައިވާއިރު ވީޑިއޯ އިން ފެންނަ ގޮތުން މިސްކިތުގެ އިމާމް ހުންނަ ދިމާލުގެ ކަރަންޓް ބޯޑުތަކަށް ވަނީ ގެއްލުން ދީފަ އެވެ.

މީގެ އިތުރުން ވުޟޫކުރާ ބައިގެ ބައެއް އިސްކުރުތައް ބިންދާލައި ގެއްލުންދީފައިވެ އެވެ. އަދި މިސްކިތުގައި ހުރި މުސްހަފްތައް މުޅި ތަނަށް ވަނީ އުކާލާފަ އެވެ.

ފުރުގާން މިސްކިތަށް ގެއްލުން ދީފައިވަނީ މިދިޔަ ހޮނިހިރު ދުވަހުގެ ރޭގެ ވަގުތެއް ގައެވެ.